Abaganga ba Papa Leo XIV bemeje ko nta bundi buvuzi akeneye nyuma yo kubagwa
Abaganga bavura Papa Leo XIV batangaje ko ikibyimba cyakuwe mu bihaha bye ku wa 13 Ukwakira 2026 ari kanseri y’ibihaha izwi nka lung adenocarcinoma, ariko ko yari ikiri ahantu hamwe. Nyuma y’isuzuma ryimbitse, bemeje ko nta bundi buvuzi akeneye.
Mu itangazo ryashyizwe ahagaragara n’Ibiro Ntaramakuru bya Vatikani ku wa Gatatu, tariki ya 21 Ukwakira 2026, abaganga Dr. Luigi Carbone na Prof. Stefano Margaritora batangaje ko ibisubizo by’ibizamini byakozwe ku nyama zavanywe mu bihaha bya Nyirubutungane byemeje ko iyo kanseri itari yarakwirakwiriye mu bindi bice by’umubiri.
Papa Leo XIV yari yarabazwe hakurwamo igice cyo hasi cy’igihaha cy’iburyo, mu rwego rwo gukuraho icyo kibyimba.
Mu itangazo ryuzuye ryashyizwe ahagaragara n’Ibiro Ntaramakuru bya Vatikani, abaganga be bagize bati “Ibisubizo bya nyuma by’isuzuma ry’inyama zavanywe mu mubiri, birimo n’ibizamini byo gusesengura imiterere y’uturemangingo, byabonetse uyu munsi. Byemeje ko ikibyimba cyari kanseri y’ibihaha izwi nka adenocarcinoma kandi ko indwara yari ikiri ahantu hamwe. Isuzuma ryakurikiyeho ryakozwe n’inzobere mu kuvura kanseri ryemeje ko nta bundi buvuzi bukenewe.”
Ibitekerezo (0)
- Nta gitekerezo kirahaba. Ba uwa mbere utanga igitekerezo.
