Abakristu Gatolika muri Uganda bahimbaje Imyaka 108 Abahire Daudi Okello na Jildo Irwa bishwe bazira ukwemera

Uyu mwaka, ibirori byo kubibuka byari bifite insanganyamatsiko igira iti“Dushore imizi muri Ukarisitiya, twunge ubumwe na Mutagatifu Yozefu n’Abahire Daudi Okello na Jildo Irwa.”

Ibirori byo kwibuka aba bahire byitabiriwe n’abepiskopi, abapadiri, abihayimana, abayobozi b’inzego za leta, abahagarariye amatsinda n’imiryango ya Kiliziya Gatolika, ndetse n’abandi bakirisitu baturutse hirya no hino muri Uganda. Abakirisitu baturutse muri Otirishiya no mu Budage na bo bifatanyije n’abandi mu kwizihiza uyu munsi ngarukamwaka.

Uwayoboye Igitambo cya Misa ni Musenyeri Sabino Ochan Odoki, Umwepiskopi wa Diyosezi ya Arua. Mu ijambo ryo kwakira abitabiriye ibirori, yashimiye amatsinda n’abantu bose bari bateraniye kuri iyo ngoro kugira ngo bunamire kandi bibuke Abamaritiri ba Paimol.

Musenyeri Odoki yavuze ko bateraniye aho kugira ngo bizihize ubuzima n’ubuhamya by’ukwemera byaranze Abahire Daudi Okello na Jildo Irwa, bakoreye abaturage bo muri Paimol mbere yo gutanga ubuzima bwabo bazira ukwemera.

Yagaragaje icyizere ko urugendo nyobokamana n’ibirori byo kwibuka abo bahire bizagira uruhare mu gukomeza ukwemera no guhindura ubuzima bwa roho bw’abitabiriye ibyo birori.

Yagize ati “Imana ibahe umugisha binyuze muri uru rugendo mwakoze, ibatandukanye n’icyaha kandi ibategurire kujya mu Ijuru.”

Abamaritiri ni urugero rwo kwihangana no gukomera ku kwemera

Mu kuzirikana ubuzima bwa Daudi Okello na Jildo Irwa, Musenyeri Odoki yavuze ko aba bahire bakomeje kubera abakirisitu urugero rw’abantu bafite ukwemera gukomeye, ubutwari no kwihangana mu rugendo rwabo rwa gikristu.

Yashishikarije abakirisitu gukomeza gukora ibyiza no gukomera ku ndangagaciro za Gikristu, n’igihe bahuye n’ingorane, imibabaro cyangwa ababatambamira mu byo bakora.

Yakomeje abibutsa ko badakwiye gutinya imibabaro ishobora kubageraho bitewe no gukora ibikwiriye. Yasobanuye ko umukirisitu akwiriye kubona ko ari umugisha kugira uruhare mu mibabaro ya Kristu, cyane cyane iyo iyo mibabaro ayihanganira ari uko yanze kuva ku kuri no ku bikorwa byiza.

Yashimangiye ko imibabaro yihanganiwe mu budahemuka ku Mana ishobora guhinduka isoko y’ibyishimo by’iteka mu ikuzo ry’Imana.

Kwizihiza imyaka 108 ishize Abahire Daudi Okello na Jildo Irwa bishwe byabaye umwanya wo kuzirikana igitambo bitanze, ubudahemuka bwabo ku kwemera n’uruhare bagize mu kwamamaza Ivanjili.

Aba bahire, bazwi kandi nk’Abamaritiri ba Paimol bo muri Arikidiyosezi ya Gulu, bashyizwe mu rwego rw’Abahire na Papa Yohani Pawulo wa Kabiri ku wa 20 Ukwakira 2002, mu birori byabereye kuri Bazilika ya Mutagatifu Petero i Vatikani, ku Cyumweru Mpuzamahanga cy’iyogezabutumwa.

Ubuzima bwabo bukomeje kubera abakirisitu urugero rw’uko ukwemera kutagomba gushingira gusa ku magambo, ahubwo kugomba kugaragarira mu bikorwa, mu gukorera abandi no mu gukomeza kuba indahemuka kuri Kristu, n’igihe umuntu ahuye n’ibimugora.

Kwamamaza Ivanjili, gukomera ku kuri no kwitangira abandi ni bimwe mu nyigisho abakirisitu bakomeza kuvanamo amasomo mu buzima n’urupfu by’aba bahire.