Papa Leo XIV yashyizeho abagize Komisiyo Mpuzamahanga ishinzwe Tewolojiya

Iyi komisiyo ubu igizwe n’abanyamuryango 30, bavuye kuri 28 bari bayigize mu myaka itanu ishize. Ibigize iyi komisiyo byagaragaje ubwiyongere bw’abahagarariye umugabane wa Afurika, Aziya na Amerika y’Epfo, hagamijwe gukomeza kugaragaza ubudasa bw’abahanga mu bya tewolojiya bo mu bice bitandukanye by’isi.

Mu bagize komisiyo bashya harimo Padiri Gaston Ogui Cossi wo muri Bénin, usanzwe ari umuyobozi w’ishami rya Kaminuza Gatolika ya Afurika y’Iburengerazuba riherereye i Bobo-Dioulasso, ndetse na Padiri Patrick Mwania wo muri Kenya, uri mu buyobozi bwa Kaminuza ya Tangaza i Nairobi.

Papa Leo XIV yanongeye manda ya Musenyeri Piero Coda, Umunyamabanga Mukuru w’iyi komisiyo, kugira ngo akomeze kuyobora imirimo yayo mu yindi myaka itanu.

Imibare igaragaza kandi ko abagore bari muri iyi komisiyo biyongereye, bava kuri batanu bagera ku munani, barimo abagore batanu, mu gihe umubare w’abanyamuryango bose batari abapadiri wageze ku munani, wikubye kabiri ugereranyije na manda yashize.

Komisiyo Mpuzamahanga ishinzwe Tewolojiya Gatolika yashinzwe mu 1969 na Papa Pawulo VI, ifite inshingano zo gufasha Ibiro bya Vatikani bishinzwe inyigisho z’ukwemera gusuzuma ibibazo bikomeye birebana n’inyigisho za Kiliziya Gatolika, cyane cyane ibifite akamaro mu bihe by’ubu.

Abanyamuryango bayo batoranywa hashingiwe ku bumenyi n’ubushakashatsi bafite mu bya tewolojiya, ndetse no ku budahemuka ku nyigisho n’ubuyobozi bwa Kiliziya. Ibyavuye mu bushakashatsi bwabo bishyikirizwa Papa, bikanafasha ibiro bya Vatikani mu isesengura ry’ibibazo birebana n’ukwemera n’inyigisho za Kiliziya.

Inama rusange y’iyi komisiyo iteganyijwe kuva ku wa 23 kugeza ku wa 27 Ugushyingo 2026, ikaba izaba mu bikorwa byayo bya mbere muri iyi manda nshya.