Nijeriya: Umupadiri wari washimuswe yarekuwe nyuma y’iminsi itanu
Padiri John Inalegwu Otache wo muri Diyosezi Gatolika ya Otukpo, muri Nijeriya, yarekuwe nyuma y’iminsi itanu yari amaze mu maboko y’abamushimuse. Yashimuswe ku wa Kabiri, tariki ya 13 Ukwakira 2026, arekurwa ku Cyumweru, tariki ya 18 Ukwakira, nk’uko byatangajwe n’ubuyobozi bwa Diyosezi ya Otukpo.
Mu itangazo ryashyizwe ahagaragara kuri iki Cyumweru yarekuriweho, Padiri Joseph Itodo, umunyamabanga wa Diyosezi ya Otukpo, yatangaje inkuru y’irekurwa ry’uyu mupadiri, ashimira Imana kuba yaragarutse amahoro.
Yagize ati “Tunejejwe cyane kandi imitima yacu yuzuye ishimwe ku Mana, mu kubamenyesha ko umupadiri wacu, Padiri John Inalegwu Otache, yarekuwe amahoro nyuma yo gushimutwa.”
Padiri Otache yashimuswe ari mu nzira ya Otobi Amejo - Ajege, mu karere ka Ohimini, muri Leta ya Benue, mu majyaruguru yo hagati ya Nijeriya.
Musenyeri Michael Ekwoyi Apochi, uyobora Diyosezi ya Otukpo, yashimiye Imana kuba uyu mupadiri yagarutse amahoro.
Nk’uko byatangajwe na Padiri Itodo, Musenyeri Apochi yahaye Imana icyubahiro, anashimira abapadiri, abihayimana n’abakristu bo muri diyosezi, hamwe n’abandi bose bagaragaje ubufatanye kandi bagasengera Padiri Otache muri icyo gihe cyari giteye impungenge.
Padiri Itodo yavuze ko Kiliziya muri Diyosezi ya Otukpo ikomeje gusabira n’abandi bantu benshi bagifunzwe n’imitwe y’abagizi ba nabi hirya no hino muri Nijeriya, kugira ngo na bo babashe gutabarwa no gusubira mu miryango yabo.
Yagize ati “Turashimira Imana kandi tuyisaba gukomeza kuturinda ikibi cyose no kugarura amahoro n’umutekano mu gihugu cyacu.”
Irekurwa rya Padiri Otache rije mu gihe Nijeriya ikomeje guhangana n’ibibazo by’umutekano muke, birimo gushimuta abantu hagamijwe kwaka amafaranga y’incungu, ibitero by’imitwe yitwaje intwaro n’ubwicanyi.
Kuva mu mwaka wa 2009, umutwe w’iterabwoba wa Boko Haram na wo wakomeje guteza umutekano muke muri icyo gihugu, binyuze mu bitero byibasiye abaturage n’inzego za Leta. Mu tundi turere, amakimbirane hagati y’abaturage n’aborozi, hamwe n’ibikorwa by’imitwe yitwaje intwaro, na byo byakomeje kongera impungenge z’umutekano.
Nubwo Padiri Otache yarekuwe, ikibazo cy’abandi bantu bagishimutwa kiracyahangayikishije imiryango yabo n’abaturage muri rusange. Kiliziya Gatolika muri Diyosezi ya Otukpo irasaba Imana gukomeza kurinda abari mu kaga, ikabasubiza mu miryango yabo, ndetse igasubiza amahoro n’umutekano muri Nijeriya.
Ibitekerezo (0)
- Nta gitekerezo kirahaba. Ba uwa mbere utanga igitekerezo.
