Umwami mushya w'Abatooro muri Uganda yitabiriye Misa y'Icyumweru muri Katederali ya Virika iherereyemo Ingoro ye
Kuri iki cyumweru tariki 18 Ukwakira 2026, Umwami mushya w'ubwami bwa Tooro muri Uganda, Eduard Rukidi Nyabongo I, yitabiriye Igitambo cya Misa y'icyumweru, yaturiwe muri katederali ya Virika, ya Diyosezi ya Fort Portal ari na yo iherereyemo ingoro ye. Iyi Misa yatuwe na Myr. Robert Muhiirwa Akiiki, Umwepiskopi wa Diyosezi ya Fort Portal.
Ni muri gahunda amazemo iminsi yo gusura amadini y'ingenzi akorera mu bwami bwe, aho yasuye Itorero ry'Abangilikani, agakomereza mu ba Islam kuri ubu akaba yanasuye Kiliziya Gatolika.
Mu butumwa Myr Muhiirwa yamugejejeho yamusezeranyije ko Kiliziya Gatolika izamuba hafi mu nshingano yemeye gukora zo kwita ku baturage b'ubwami bwa Tooro.
Ati"Nyiricyubahiro nzi neza ko wemeye izi nshingano udakurikiye icyubahiro ahubwo ugamije gukorera abaturage b'ubwami bwa Tooro. Tukwijeje ko Kiliziya Gatolika izakuba hafi muri izo nshingano."
Umwami mushya wa Tooro yatangiye imirimo ye tariki 29 Nzeri 2026. Yasimbuye Oyo Nyimba Kabamba Iguru Rukidi IV witabye Imana tariki 27 Kanama 2026 azize Kanseri.
Ibitekerezo (0)
- Nta gitekerezo kirahaba. Ba uwa mbere utanga igitekerezo.
