Abakiristu barashishikarizwa gushyigikira Umuryango wa Bibiliya mu Rwanda kuri iki cyumweru cy’Ijambo ry’Imana

Mu kiganiro Kinyamateka yagiranye na Robert Byiringiro, umukozi w’Umuryango wa Bibiliya mu Rwanda ushinzwe kwamamaza Bibiliya n’itumanaho, kuri uyu wa 07 Gicurasi 2026, yasobanuye ko iki cyumweru kigamije gushishikariza abakiristu bo mu madini n’amatorero ndetse na Kiliziya Gatolika gusoma no gukunda Bibiliya, kugira ngo ubuzima bwabo buhindurwe n’Ijambo ry’Imana.

Agaruka ku bikorwa biteganyijwe muri iki cyumweru, yagize ati “ Icyumweru cy’Ijambo ry’Imana tugitegura dufatanyije n’amatorero ndetse na Diyosezi zikorera mu Rwanda. Muri icyo cyumweru abantu bakora ibikorwa byo gusoma no kuzirikana Ijambo ry’Imana, hakaba n’aho bakora amarushanwa yo gusoma Bibiliya, abandi bagakora ivugabutumwa ndetse n’amasengesho n’ibiganiro bigamije gukomeza ukwemera no kwimakaza ubumwe bw’abakiristu dukomora kuri Yezu.”

Yatanze urugero avuga ko hirya no hino muri za Diyosezi hateguwe ibikorwa bitandukanye. Nko muri Diyosezi ya Cyangugu hateguwe amarushanwa yo gusoma Bibiliya n’itangwa ry’ibihembo, muri Diyosezi ya Butare hakazatangwa impamyabushobozi ku barangije ishuri rya Tumenye Bibiliya, mu gihe muri Diyosezi za Nyundo, Byumba n’ahandi na ho hateguwe ibikorwa bitandukanye byo kwizihiza iki cyumweru.

Robert Byiringiro yakomeje avuga ko, nk’Umuryango wa Bibiliya, ibikorwa byabo by’umwihariko muri iki cyumweru ari ukwegereza abakiristu Bibiliya kugira ngo igere kuri buri wese kandi ku giciro cyoroheye abantu.

Ati “ kuri iki cyumweru tuzajya hirya no hino muri za Diyosezi n’amatorero atandukanye kugira ngo abantu bakeneye Bibiliya babashe kuyibona, tunashishikarize abantu gushyigikira Bibiliya kugira ngo bidufashe gucapisha Bibiliya, ibashe kugera kuri buri wese kandi idahenze.”

Yasobanuye kandi ko Umuryango wa Bibiliya ufite inshingano zo kwamamaza no gukwirakwiza Ijambo ry’Imana, kugira ngo abantu bose babone Bibiliya mu rurimi bumva kandi basobanukiwe. Ibyo bikorwa ku bufatanye n’amatorero ndetse na Kiliziya Gatolika, harimo gutegura inyigisho za Bibiliya no kuyikundisha abakiristu.

Yongeyeho ko Bibiliya nyinshi zicapirwa hanze y’u Rwanda, nko mu Bushinwa, muri Koreya no mu bindi bihugu, hanyuma zigahita zigezwa mu madini, amatorero na Kiliziya Gatolika, kugira ngo byorohereze buri wese uyikeneye kuyibona hafi.

Yasabye abakiristu bose gushyigikira ibikorwa bya Bibiliya, kugira ngo abantu benshi babashe gutunga Ijambo ry’Imana, ndetse n’abatishoboye bafashwe kubona Bibiliya binyuze mu maturo yihariye azatangwa muri iki cyumweru cyahariwe Ijambo ry’Imana.

Yagize ati “ Ndashishikariza abakiristu bose mu gihugu gushyigikira Bibiliya kugira ngo babashe gutunga Ijambo ry’Imana, gutunga Bibiliya ariko kandi na yo ibashe kubatunga, ndetse ubutumwa bakuramo bubahindure banabusangize abaturanyi babo. Icya kabiri turasaba abafite ubushobozi gushyigikira Bibiliya kugira ngo ibashe kugera kuri bose kuko twamaze gusobanukirwa ko Bibiliya igira uruhare mu guhindura imyitwarire n’imibereho ya muntu.”

Mu gusoza, yashimangiye ko umuntu utunze Bibiliya aba umukiristu mwiza kandi akaba n’umuturage mwiza, bityo bikamufasha kwimakaza indangagaciro z’urukundo, ubumwe, ubwiyunge n’ubufatanye, hagamijwe kubaka igihugu gifite amahoro n’iterambere rirambye.

Umuryango wa Bibiliya mu Rwanda utangaza ko Icyumweru cy’Ijambo ry’Imana gitangira tariki ya 10 kigasozwa tariki ya 17 Gicurasi buri mwaka.