Abapadiri ba Butare na Kigali bahuriye mu mikino yo gushimangira ubuvandimwe

Ku ikubitiro, abapadiri bo muri Diyosezi ya Butare basuye bagenzi babo bo muri Arikidiyosezi ya Kigali, bahuzwa n’imikino itandukanye irimo imikino y’amaboko ya Volleyball na Basketball yabereye muri Sainte Famille Gymnasium, ndetse n’umupira w’amaguru wabereye muri St Andre kuri Stade Mumena.

Mu kiganiro Kinyamateka yagiranye na Nyiricyubahiro Musenyeri Jean Bosco Ntagungira, Umwepiskopi wa Diyosezi ya Butare, yatangaje ko iyi mikino yateguwe hagamijwe gushimangira ubuvandimwe n’imibanire myiza hagati y’abasaserdoti.

Yagize ati “Twaje tuvuye i Butare tuzanywe n’ubuvandimwe, gusabana no kurushaho kumenyana, kuko burya hari byinshi abasaserdoti baganiraho, bagirana inama kandi bikabubakira.”

Musenyeri Jean Bosco yakomeje asobanura ko uru ruzinduko rwari n’amahirwe yo kongera kugaruka mu rugo I wabo, agasubira aho yabaniye n’abandi basaserdoti, abo bakoranye ubutumwa n’abo yareze mu maseminari.

Ati “Hari abasaserdoti nakoranye nabo hano i Kigali, hari abo nareze mu maseminari, abo twabanye mu butumwa n’abandi. Guhura gutya bituma twongera gusabana no gukomeza umubano.”

Yashimangiye ko intego nyamukuru atari ugutsinda mu mikino, ahubwo ari uguhurira hamwe no kwishimana.

Yagize ati “Abantu barakina bagatsinda cyangwa bagatsindwa, ariko icy’ingenzi ni uko twahuye, tugakina, tukishimana. Iyo abasaserdoti bahuye kiba ari igitego cya mbere, igitego cy’ubuvandimwe. Ni yo mpamvu dushishikariza n’abandi kujya bahura.”

Ku ruhande rw’abakiriye abashyitsi, Nyiricyubahiro Antoine Karidinali Kambanda, Arikiyepiskopi wa Kigali, yagarutse ku kamaro k’imikino mu kubaka umubano w’abapadiri, agaragaza ko siporo ituma impano zitandukanye zigaragara kandi ikongera ubumwe.

Yagize ati “Mu mukino hagaragaramo impano zitandukanye abapadiri bifitemo, bikabafasha no kuruhura ingingo. Byongera ibyishimo, bigatuma abantu bashyira hamwe, bakiga gukorera mu ikipe, batsinda ukwikunda, kwiharira no kwireba. Ndetse bakiga kwihangana.”

Yakomeje avuga ko siporo yigisha kwakira gutsindwa n’intsinzi, aho utsinzwe abigira isomo rimutegurira ejo hazaza, utsinze na we akishima ariko atirara.

Kinyamateka kandi yaganiriye na bamwe mu bapadiri bitabiriye iyi mikino bagaragaza ibyishimo n’akamaro bayibonamo.

Padiri Thierry Karangwa, Padiri mukuru wa Paruwasi ya Kanombe yitiriwe Mutagatifu Yohani Pawulo wa II, yavuze ko iyi mikino ari umwanya mwiza wo kongera guhura no gusabana n’abapadiri bo mu yandi madiyosezi.

Yagize ati “Ni ubwa mbere duhuye n’abapadiri bo muri Diyosezi ya Butare. Hari abo twiganye, abakuru bacu batubanjirije ndetse na barumuna bacu. Guhura gutya bituma umubano urushaho gukomera, kandi bigatuma duha agaciro ubuvandimwe Nyagasani atwifuzamo.”

Padiri Robert Dushime, ukorera ubutumwa muri Diyosezi ya Butare muri Paruwasi ya Nyanza, mu Ishuri rya Igihozo Secondary School, yavuze ko bishimiye gusura bagenzi babo bo muri Arikidiyosezi ya Kigali hagamijwe gutsura umubano no kurushaho kumenyana nk’abasaserdoti.

Yongeyeho ko bishimiye kuza baherekejwe n’umwepiskopi wabo, bikabafasha kongera kwiyumvamo ubumwe ndetse bikerekabagenzi babo bo muri Arikidiyosezi ya Kigali ko aho Umwepiskopi wabo ari, yasanze abasaserdoti bakora ubutumwa kandi bashoboye no muri siporo.

Mu mikino yahuje aba bapadiri, abapadiri bo muri Diyosezi ya Butare begukanye ibikombe bibiri mu mikino y’amaboko, batsinze abapadiri ba Kigali mu mikino ya Volleyball na Basketball. Muri Volleyball, batsinze amaseti 2 kuri 0, naho muri Basketball batsinda amanota 39 kuri 32.

Mu mukino w’umupira w’amaguru, abapadiri bo muri Arikidiyosezi ya Kigali begukanye igikombe batsinze abapadiri bo muri Diyosezi ya Butare kuri penaliti 3 kuri 2.

Iyi mikino kandi yaranzwe n’ibyishimo n’ubusabane, aho abapadiri bose bakinnye imikino inyuranye bashimiwe bakambikwa imidari.