Abepisikopi Gatolika muri Kenya bunamiye Raila Odinga wabaye Minisitiri w'intebe

Mu butumwa boherereje Perezida wa Kenya, Dr. William Samoei Ruto, ndetse na Madamu Ida Odinga, umugore wa nyakwigendera, kuwa 18 Ukwakira 2025, Abepisikopi bagaragaje ko Kiliziya Gatolika muri Kenya ibabajwe n'urupfu rw'uyu muyobozi wari indashyikirwa mu bikorwa bye, kandi ikifatanya n'umuryango we mu bihe bikomeye by'akababaro.

Mu itangazo ryasohowe na Arikiyepisikopi Maurice Muhatia Makumba wa Arkidiyosezi ya Kisumu, Perezida w'Inama y'Abepiskopi Gatolika muri Kenya, riragira riti 'Twifatanyije n'Abanya Kenya bose mu kunamira umuyobozi w'intwari, witanze kandi wakomeje kurwanira demokarasi, uburenganzira bwa muntu n'iyubahirizwa ry'amategeko, kenshi abigirira mu byago bye bwite.

Abepisikopi bongeyeho ko ubwitange, kwihangana n'icyerekezo cyiza cya Raila Odinga mu kurwanira igihugu n'abaturage bizahora ari umurage uzasigara uranga Kenya iteka ryose.

Raila Odinga, umwe mu banyapolitiki bakomeye kandi bubashywe muri Kenya, azibukirwa cyane ku rugamba rwe rwo kwamagana igitugu, guharanira uburenganzira bw'abatagira ijwi, no kurwanya akarengane mu gihugu cye.

Abepisikopi bagaragaje ko kandi urupfu rwa Raila Odinga rusize icyuho gikomeye mu rugendo rwa demokarasi muri Kenya, ariko bashimangira ko Kiliziya Gatolika izakomeza guhagarara hamwe n'abaturage mu guharanira ubutabera, amahoro n'ubwiyunge nyabyo.

Basoze bagira bati "Dusabira nyakwigendera Raila Odinga, kandi dusabira igihugu cyose ngo Imana igihe imbaraga, ubufatanye n'ubwiyunge muri ibi bihe by'akababaro.

Ubu butumwa bw'Abepiskopi bugaragaza kandi uruhare rukomeye Kiliziya Gatolika yakomeje kugira mu rugendo rwa demokarasi muri Kenya, ihora ihagarariye abaturage mu rugamba rwo gushakira igihugu ubutabera, amahoro n'ubwiyunge nyabyo.

Amwe mu mateka ya Raila Odinga, agaragaza ko yinjiye mu Nteko Ishinga Amategeko ya Kenya mu 1992, akaba yariyamamaje bwa mbere ku mwanya wa Perezida w'icyo gihugu mu 1997, yongera mu 2007, 2013, 2017 ndetse na 2022, ariko izo nshuro zose agatsindwa, avuga ko yibwe amajwi.

Yabaye Minisitiri w'Intebe wa Kenya kuva mu 2008 kugeza mu 2013.Raila Odinga ukomoka mu bwoko bwaba Luo, igihe kinini cye cy'ubuzima yakimaze muri Politiki, aho rimwe na rimwe yabaga yahunze igihugu, ubundi yafunzwe nk'aho yamaze imyaka umunani muri gereza, azira ubuhirimbanyi bwe aharanira Demokarasi, gusa akaba yitabye Imana ku myaka 80 y’amavuko atageze ku nzozi ze zo kuba Perezida wa Kenya.