Abimukira 122 bavuye muri Libiya bageze mu Butaliyani

Aba bimukira bakomoka ahanini muri Sudani, Sudani y’Amajyepfo na Eritereya. Muri bo harimo abagore 31 n’abana 62 bari bamaze igihe mu buzima bwo guhohoterwa, ubukene bukabije n’ivangura muri Libiya.

Iyi nzira yo kubohora ubuzima bwabo yashobotse kubera amasezerano yasinywe mu Ukuboza 2023 hagati ya Minisiteri y’Umutekano w’imbere mu gihugu, Minisiteri y’Ububanyi n’Amahanga, UNHCR, ARCI n’Umuryango wa Sant’Egidio. Ubu bufatanye bumaze gufasha abantu 659 kuva mu buzima bushaririye no kugera ahantu hatekanye.

Aba bimukira bazakirwa mu ngo n’ibigo bitandukanye hirya no hino mu ntara z’u Butaliyani. Umuryango wa Sant’Egidio uzakira 53, ARCI yakire 30, naho 39 bajye mu rwego rwakira no gutuza impunzi ruzwi nka Reception and Integration System.

Muri bo harimo abarokotse iyicarubozo, abagore bahohotewe n’abacuruza abantu, abana b’imfubyi, n’abarwayi bakeneye ubuvuzi bwihutirwa.

Iyi gahunda kandi ishoboka binyuze muri [Humanitarian corridors] uburyo bwatangiye mu 2016, bugamije kugeza impunzi mu bihugu bitekanye nta kunyura mu nzira zinzitane cyangwa mu maboko y’abacuruza abantu.

Ni gahunda ishingiye ku masezerano hagati ya Leta y’u Butaliyani n’imiryango irimo Sant’Egidio, Ihuriro ry’Amatorero ya Gikristo mu Butaliyani n’Umuryango wa Valdese. Ni bo bishyura amafaranga yose y’iyi gahunda, bakohereza n’abakorerabushake mu bihugu impunzi zibamo kugira ngo bazifashe.

Bohereza urutonde rw’abakeneye ubufasha ku nzego za dipolomasi z’i Roma, zigatanga Visa zidasanzwe zorohereza impunzi kwinjira mu Butaliyani mu mutekano.Aho imaze gutuma abantu barenga 8,300 bava mu byago no mu nzitane kuva mu 2016.

Mu kiganiro n’abanyamakuru cyabereye ku Kibuga cy’Indege cya Fiumicino, Filippo Ungaro, umuvugizi wa UNHCR mu Butaliyani, yashimye intambwe u Butaliyani butera mu kwakira abimukira mu buryo butekanye.Yagize ati “Ku isi hari impunzi zisaga miliyoni 2.8, ariko 8% gusa ni zo zimaze kwimurirwa mu bindi bihugu. Humanitarian corridors ni inzira nziza yo gutuma impunzi zigera ahantu hatekanye. Twizera ko uburyo bw’u Butaliyani buzafatwa n’ibindi bihugu nka model nziza.”

Iyi gahunda yerekana ko ubufatanye bwa Leta n’imiryango itegamiye kuri Leta bushobora gukiza ubuzima bw’abantu bari mu kaga, bugaha icyizere abahungijwe n’intambara n’ubukene bakabona amahirwe mashya.Ni isomo ribereye amahanga yose ko ubuzima bwa muntu buruta byose, kandi ko n’ubufasha buto bushobora gukiza ubuzima bwinshi.