Butare: 108 basoje urugendo rw’Isanamitima

Ni inyingisho zatanzwe mu gihe cy’amezi atandatu aho zahawe abagize uruhare muri Jenoside yakorewe Abatutsi mu 1994 ndetse na bamwe mu bayikorewe.

Umuhango wo gusoza uru rugendo wabanjirijwe n’Igitambo cya Misa cyayobowe na Musenyeri Filipo Rukamba, Umwepiskopi wa Diyosezi ya Butare, kikanitabirwa n’abandi banyacyubahiro barimo Umuyobozi Nshingwabikorwa w’Ishami ry’Ubumwe n’Ubudaheranwa muri Minisiteri y’Ubumwe bw’Abanyarwanda n’Inshingano Mboneragihugu, Uwera KAYUMBA Marie Alice n’Umuyobozi w’akarere ka Gisagara wungirije ushinzwe iterambere ry’ubukungu Habineza Jean Paul.

Mu nyigisho yatanze, Myr Rukamba yibukije abasoje urugendo ko abantu baba bakwiye guhuza umutima wabo n’Imana mu rukundo n’ineza kuko iyo uwo mutima udahuye n’Imana, umutima ushobora kubamo ibitekerezo by’ubugome. Ati “Isanamitima rero, rifasha uwahemukiwe kudaherwana kandi rikubaka igihugu.”

Myr Rukamba akomeza asaba abasabye imbabazi kwerekana ko ari abavandimwe bafasha abo bahemukiye kugira ngo bongere bumve ko bafite umuryango bityo barusheho no gutera imbere binyuze mu bikorwa bafatanyamo.

Umuyobozi Nshingwabikorwa w’ishami ry’Ubumwe n’Ubudaheranwa muri Minisiteri y’Ubumwe bw’Abanyarwanda n’Inshingano Mboneragihugu, Uwera KAYUMBA Marie Alice, yasabye abakirisitu gukomera ku mahitamo y’Abanyarwanda birinda ko Jenoside yakongera kubaho ukundi.

Madamu Uwera Kayumba yaboneyeho gushimira Kiliziya Gatolika kubw’ubufatanye n’ibikorwa byiza bifasha abanyarwanda mu Bumwe, Ubwiyunge n’Ubudaheranwa. Ati “Ibi biduha icyizere ko nka nyuma y’imyaka 30 Abanyarwanda bazaba bamaze gutekana mu mutima.”

Gushimira Kiliziya byagarutsweho n’Umuyobozi w’Akarere ka Gisagara wungirije ushinzwe Iterambere ry’Ubukungu Bwana Habineza Jean Paul washimiye Musenyeri Filipo Rukamba wakomeje kubafasha no kubana na bo mu bikorwa binyuranye bagiye bakorana.

Ati “Kubera ubwo bufatanye, turishimira urwego akarere kacu kagezeho muri gahunda y’Isanamitima, Ubumwe, Ubwiyunge n’Ubudaheranwa.”

Abatanze imbabazi nabo yabasabye kugira umutima muzima, no kwirinda kumva ko abantu bose ari abagome banumva ko ibyabaye byatewe n’ubuyobozi bubi bityo ko abantu bashobora kongera kubana neza no kumvikana.

Rwigema Emile wagize uruhare muri Jenoside yavuze ko yahoraga yihebye kubera ibyaha bya Jenoside yakoze, agahorana ipfunwe gusa ko akimara gufungurwa yaje kwigishwa asanga nta mpamvu yo guhora yihisha, bituma asanga bagenzi be bakorana urugendo rw’isanamitima ku buryo kuri ubu abanye neza n’abo yahemukiye ari nabyo yishimira ashimira.

Ku ruhande rw’abahemukiwe bagaragaza ko inyigisho bahawe zabafashije kongera kwisanga mu bandi no kubisanzuraho.

Umwe muri bo witwa Gakwaya Francois agira ati “Nyuma ya Jenoside nahuraga n’uwampemukiye nkumva mfite impungenge ko ashobora kongera kutwicira n’abo twari dusigaranye. Gusa nyuma y’izi nyigisho zijyanye n’Isananamitima, byarahindutse kuko nsigaye nisanzura ndetse niteguye gukomeza gutanga imbabazi ku baduhemukiye.”

Umuhuzabikorwa wa Komisiyo y’Ubutabera n’Amahoro ya Diyosezi ya Butare Emmanuel Niringiyimana, asaba abatarabohoka gutangira urugendo rw’isanamitima no gutera intambwe bagatinyuka gusaba imbabazi no kuzitanga kuko bikiza kandi bikabohora umutima.

Abasoje inyigisho z’isanamitima bo muri Paruwasi ya Mugombwa ni icyiciro cya 3 aho iyi Paruwasi itangaza ko mu Ukwakira 2024 hazatangira ikindi kiciro, ku bufatanye n’Akarere ka Gisagara, Komisiyo y’Ubutabera n’Amahoro ya Diyosezi ya Butare na Alert International mu mushinga ‘Dufatanye Urumuri’ ifashwamo na USAID.