Caritas ya Diyosezi ya Kibungo yoroje imiryango 12 itishoboye ihene

Kwizihiza umunsi w’Umukene muri Paruwasi ya Gishanda byabanjirijwe n'Igitambo cya Misa. Padiri Mujyambere Félicien, umuyobozi wa Caritas ya Diyosezi Kibungo, wayisomye yagarutse ku butumwa bwa Nyir’ubutungane Papa Fransisko yatanze kuri uyu munsi, asaba abakristu gukomeza gushyira imbaraga mu gufasha abakene. Aha yatanze urugero rw’abakristu bigeze gushyira hamwe bagakorera urutoki rw’umukecuru wari ukennye, urutoki rukera akagurisha, hashize umwaka akubaka inzu nshya kuko iyo yari afite yari igiye kumugwaho kubera gusaza.

Nyuma y’igitambo cya Misa, imiryango 12 itishoboye yorojwe ihene zizayifasha kubaha ifumbire, bakiteza imbere. Umuryango worojwe ihene uzaziturira undi inshuro imwe. Mu nyigisho yatanze mu gitambo cya Misa, Padiri Mujyambere Félicien, yabasabye kuzaziturira abandi bakennye batabikoze kuko babisabwe, ahubwo bakazabikorana umutima ukunze Imana na bagenzi babo.

Iyi miryango kandi yanahawe ibyo kurya (ibishyimbo n’ifu y’ibigori), bibafasha muri iyi minsi. Abahawe ubu bufasha barashima kuko batekerejweho, kandi byaberetse ko Kiriziya ibafitiye urukundo.

Muri uku kwizihiza umunsi w’umukene muri Paruwasi ya Gishanda, abakorerabushake 30 ba Caritas bambitswe udutambaro, turiho ikirango cya Caritas nk’ikimenyetso bazajya bambara bari mu butumwa (foulards), basanga abandi 52 bari baratwambitswe mbere.

Umunsi mpuzamahanga w’umukene kandi wanizihijwe hirya no hino mu ma paruwasi gatolika, aho abakristu bakusanije inkunga zinyuranye zihabwa imiryango ikennye. Habayeho gusangira n’abakene, gutanga ibiribwa, ahandi batanga amatungo, imyambaro, ibikoresho by’ishuri n’ibindi. Ibi byose Kiriziya ibikora mu rwego rwo kwegera umukene no kumusubiza agaciro agenda yamburwa na sosiyete ya none.