Cyangugu: Padiri Thadée yasabye abitegura gushyingirwa kubanza kwisuzuma niba bakwiye ingo nziza bifuza

Abasore n’inkumi basaga 250 bitegura guhabwa Isakramentu ry’Ugushyingirwa, baturutse mu maparuwasi 22 agize Diyosezi Gatolika ya Cyangugu, bakoze umwiherero wo kuzirikana ku ngo bifuza kuzubaka, basabwa kutibanda ku myiteguro y’ibirori by’ubukwe gusa, ahubwo bakitegura no kuzuza inshingano z’ubuzima bw’abashakanye.

Uyu mwiherero wabaye ku Cyumweru, tariki ya 11 Ukwakira 2026, ku Gasozi k’Ibanga ry’Amahoro muri Diyosezi Gatolika ya Cayangugu, witabirwa n’abafiyanse bari bamaze amezi hafi atandatu biga ku mubano mu rwego rwo kwitegura isakramentu ry’Ugushyingirwa.

Wateguwe na Komisiyo ya Diyosezi ya Cyangugu ishinzwe Ikenurabushyo ry’umuryango, ku nsanganyamatsiko igira iti “Urugo twifuza muri Diyosezi ya Cyangugu”, hagamijwe kubafasha gusuzuma uko biteguye gushinga ingo za Gikristu, kumenya inshingano zibategereje no kuzirikana indangagaciro zigomba kuranga imiryango bazashinga.

Mu nyigisho yabagejejeho, Padiri Thadée Nsengumuremyi, uyobora Komisiyo ishinzwe Ikenurabushyo mu Muryango muri Diyosezi ya Cyangugu, yabasabye kwisuzuma byimbitse, bakareka kureba gusa ku byo bifuza kuzageraho mu buzima bw’urugo, ahubwo bakibaza niba na bo ubwabo biteguye gutanga umusanzu ukenewe kugira ngo ibyo bifuza bizagerweho.

Padiri Thadée yasabye abafiyanse kwisuzuma mbere yo kwifuza urugo rwiza

Padiri Thadée yibanze ku kuba abantu benshi bifuza kugira ingo nziza, abagabo n’abagore beza, abana beza n’ubuzima bwiza bw’umuryango, ariko ntibahore bibaza niba imyitwarire yabo n’imyiteguro yabo bihuye n’ibyo bifuza.

Yagize ati “Urifuza kwitwa umugabo, umutware w’urugo, ukumva ko umugore wawe mwitanaga cheri, uyu munsi n’umara gushyingirwa ibya cheri bivaho akajya akwita umutware? Ntacyo bintwaye, nge nakwite we rwose ni byiza, ariko se urabikwiye? Uhoraho ati ‘Abatumiwe ntibari babikwiye.’ Ibyiza birahari, turabishaka, ariko se turabikwiye?”

Yakomereje ku nshingano z’umugore mu muryango, agaragaza ko kwifuza gukundwa no kubahwa bigomba kujyana no kugira imyitwarire myiza, kwihangana, kuvugisha ukuri no kubaha uwo mwashakanye.

Ati “Urifuza kuba umugore mwiza, ukunzwe, umutima w’urugo, ariko se urabikwiye? Uritonda? Urumvikana? Uzi koroshya? Urihangana, uvugisha ukuri? Nturyarya umugabo wawe? Ntumuca inyuma? Niba ibyo ngibyo ukibigwamo, rwose wahera aho bakubwira ngo: ‘Sohoka, uru rugo, urugo rwiza nturukwiye.’”

Mu butumwa bwe, yagaragaje ko kubaka urugo rudahungabanywa n’ibibazo bisaba ko buri wese abanza gukora ku myitwarire ye, akiga kubana n’uwo bashakanye mu kuri, mu bwubahane no mu kwihangana.

Yibukije kandi abafiyanse ko kwifuza kuzagira abana beza bidakwiye gutandukanywa no kwitegura kuba ababyeyi babereye abo bazabyara, cyane cyane binyuze mu kumvira no gushyira mu bikorwa inyigisho za Kiliziya ku buzima bw’abashakanye.

Yagize ati “Urifuza kuba umubyeyi ufite abana beza bamwizihiye, ni byiza rwose, ariko se iyo Imana ikurebye ibona ukwiye abo bana? Wumviye amabwiriza Imana iguha yerekeye umubano w’abashakanye? Mumaze iminsi mwiga, amezi agiye kuba atandatu. Warumvaga? Warumviye? Hari ibyo wakurikije, hari icyo byaguhinduyeho byatuma Imana iguha umwana uzayirerera?”

Padiri Thadée yagaragaje ko amezi hafi atandatu abafiyanse bamaze biga ku mubano atagomba kuba igihe cyo kurangiza amasomo kugira ngo bemererwe gushyingirwa gusa, ahubwo ko akwiye kubafasha guhindura imyumvire, imyitwarire n’uko bitegura kubana.

Yababuriye ku myumvire yo gufata inyigisho bahabwa nk’igihe kibatesha umwanya, mu gihe bo baba bihutira kurangiza imyiteguro y’ibirori by’ubukwe.

Ati “Cyangwa wumva izi nyigisho ari ukugutwara umwanya, kugutesha igihe, cyangwa ushaka kuzarwubaka uko ubyumva, bitari uko Imana ibyumva, bitari uko Kiliziya ibyumva? Uko ubyumva ni ko uzarwubaka, uti: ‘Sindi akagabo se?’ Yee, uzagira urugo rw’akagabo kawe nyine, naho rwa rugo Imana yubaka, nyine ntabwo uzaba urukwiye.”

Yongeye kubabaza niba koko bazirikana inyigisho bahabwa ku burere bw’abana n’inshingano z’ababyeyi, cyangwa niba bazumva gusa bagahita bazibagirwa, bagakomeza kwihutira gushyingirwa.

Yagize ati “Ese witwararika ibyo Imana igusaba mu burere bw’abana? Cyangwa twarabikubwiye byinjirira mu gutwi kumwe bisohokera mu kundi, uti: ‘Nibagire vuba, nibavuge vuba nigire gukata umugi, nigire gushaka invitations, nzashyingirwe.’ Maze se n’ushyingirwa bigende bite?”

“Urugo utatekerejeho mbere yo kurushinga rushobora kukubera umusaraba”

Padiri Thadée yakomeje agaragaza ko kwihutira gushyingirwa utaratekereje ku nshingano zabyo bishobora gutuma umuntu ahura n’ibibazo atiteguye guhangana na byo.

Yagize ati “Nyamara uzazanga uri kwiyahura. Uzasanga uri kurushywa n’ibintu ujyanwa ngo ubibambweho. Kuko urugo wagiyemo uhubutse, utatekereje, utashatse umwambaro w’ubukwe ni nko kwitwaza umusaraba bari bukubambeho.”

Yasobanuye ko mbere yo gufata icyemezo cyo gushinga urugo, buri wese akwiye kubanza gutekereza ku nshingano z’urugo, akareba niba zishobora guhuza n’uko ateye, hanyuma agaharanira guhindura ibishoboka guhinduka, ibirenze ubushobozi bwe akabitura Imana.

Ati “Kubaka urugo utarabanza kuzirikana icyo rusaba ngo ugihuze n’uko uteye, ngo uhindure ibishoboka guhinduka, ibyo utahindura ubiture Imana, ugapfa kwiyahura ngo n’abandi barubatse, ngo mfite imyaka ikwiye. Ibyo ni ugucura umusaraba uzi neza ko bazakubambaho. Urwo rugo bazarukubambaho.”

Yashimangiye ko imyaka umuntu agezemo cyangwa kuba abandi barashatse bitagomba kuba impamvu yonyine yo kwihutira gushyingirwa, kuko icy’ingenzi ari ukuba umuntu yiteguye kwakira no kuzuza inshingano zijyana n’ubuzima bw’abashakanye.

Yibukije abafiyanse ko inyigisho za Kiliziya zitagenewe kubabangamira, ahubwo ko ari ubuyobozi bubafasha kwitegura neza no kubaka ingo zishingiye ku mahame ya Gikristu.

Ati“Impanuro uhabwa na Kiliziya uziha agaciro, urazizirika cyangwa uzica amazi? Niba ari ibyo rero, ntugasabe Imana urugo rwiza wasuzuguye inzira zayo. Niba inzira z’Imana waziteye umugongo, ntukayibaze impamvu itaguha urugo rwiza.”

Nubwo yashimangiye akamaro ko gukurikiza inyigisho za Kiliziya, Padiri Thadée yanibukije abitegura gushyingirwa ko abantu badatunganye, bityo ko bakwiye gukomeza guharanira kuba beza, gusenga no gusabirana kugira ngo Imana ibafashe mu rugendo rwabo.

Yasoje agira ati“Dusabe, ntabwo turi abamalayika, hari n’igihe twifuza kuba beza rwose bikanga, tubyifuza. Icyo kifuzo nikigumeho rwose, ni icyo Imana iheraho iguha ibizakubakira, dore ko atari twe tubyiha, ariko tugire imitima ibirarikira, tunitwararike kugira ngo Imana ibone aho ibinyuza. Dusabe rero tunasabirane ngo Imana yacu yifuza ko tugira ingo nziza, iduhe guhorana umwambaro w’ubukwe ukwiye, bityo tubashe kuronka ibyiza itugenera hano ku isi kandi tuzasangire na yo ihirwe rihoraho mu ijuru.”

Abafiyanse batekereje ku nkingi eshanu z’urugo

Mu bindi bikorwa by’ingenzi byaranze uyu mwiherero, abafiyanse bahawe umwanya wihariye wo kuganira hagati yabo ku nkingi eshanu z’ingenzi zifasha urugo kugira umurongo n’icyerekezo.

Izo nkingi ni umubano hagati y’abashakanye ubwabo, umubano wabo n’Imana, umubano wabo n’ibintu n’umutungo, umubano wabo n’abana, ndetse n’umubano wabo n’abandi bantu.

Ibi biganiro byari bigamije kubafasha kureba ubuzima bw’urugo mu buryo bwagutse, bakazirikana ko kubana neza bidasaba urukundo rw’abashakanye gusa, ahubwo ko bisaba no kumvikana ku micungire y’umutungo, ku burere bw’abana, ku kwemera no ku mubano n’imiryango bakomokamo ndetse n’abandi bantu.

Byanabahaye umwanya wo kongera kuganira ku byifuzo byabo, gusuzuma ibyo bumvikanyeho no gutekereza ku ngingo bazakenera gukomeza kumvikanaho mu gihe bazaba bamaze gushinga urugo.

Abitabiriye kandi bateze amatwi ubuhamya bw’urugo rushya rwashyingiwe mu mpeshyi ishize, bubafasha gusobanukirwa n’ibyo abamaze gutangira ubuzima bw’abashakanye banyuzemo no kubigiraho mu rugendo rwabo.

Irambagiza ryabereye mu Gitambo cya Misa

Uyu mwiherero waranzwe kandi n’isengesho, ibiganiro n’umuhango w’irambagiza wahurije abafiyanse imbere y’Imana.

Ibikorwa by’umunsi byatangijwe no gusengera hamwe ishapule mu busitani bw’Ibanga ry’Amahoro, aho abitegura gushyingirwa bashyize ibyifuzo byabo mu maboko ya Bikira Mariya, basabira ingo zabo z’ejo hazaza n’urugendo rwo kwitegura kwakira Isakramentu ry’Ugushyingirwa.

Nyuma y’isengesho, habaye umwanya wo kwakira abitabiriye, kumenyana no gusabana, hakurikiraho ibiganiro byibanze ku buzima bw’urugo n’inshingano z’abashakanye.

Umuhango w’irambagiza wabereye mu Gitambo cya Misa, aho abafiyanse bambikanye impeta z’irambagiza banahana indabo, nk’ikimenyetso cy’urugendo barimo rwo gukomeza kumenyana no kwitegura gusezerana imbere y’Imana.

Mu Gitambo cya Misa, batuye Imana ibyifuzo byabo, basaba umugisha ku rugendo rwabo no ku ngo bifuza kuzubaka.

Kuba umuhango w’irambagiza warizihirijwe ku rwego rwa Diyosezi byahaye abafiyanse baturutse mu maparuwasi 22 umwanya wo gusangira ibyishimo, gukomeza ubusabane no kuzirikana umuhamagaro bahuriyeho wo gushinga imiryango ya Gikristu.

Nyuma ya Misa n’umuhango w’irambagiza, abitabiriye bagize umwanya wo gutembera mu Kiyaga cya Kivu bifashishije amato yari yateguwe, banahabwa ibyo kurya n’ibyo kunywa. Iki gikorwa cyabaye umwanya wo kuruhuka, gusabana no gusoza umunsi bari bamaze bahuriyemo mu isengesho no mu biganiro byubaka.

Ni gahunda ya buri mwaka mu ikenurabushyo ry’umuryango

Uyu mwiherero ni imwe muri gahunda zisanzwe zikorwa buri mwaka na Komisiyo ya Diyosezi ya Cyangugu ishinzwe Ikenurabushyo ry’umuryango, mu rwego rwo guherekeza ingo no gufasha abakristu kubaka imiryango myiza ya Gikristu.

Binyuze muri iyi gahunda, Diyosezi iha abitegura gushyingirwa umwanya wo kwitegura mu buryo bwa roho , mu mitekerereze no mu mibanire, kugira ngo bazinjire mu Isakramentu ry’Ugushyingirwa basobanukiwe n’inshingano zabo, aho kwibanda gusa ku birori byo gusezerana.

Insanganyamatsiko igira iti “Urugo twifuza muri Diyosezi ya Cyangugu” yashimangiraga ko urugo rwiza rutangirira ku myiteguro ifite intego, ibiganiro byubaka, ubushake bwo guhinduka no gushyira mu bikorwa indangagaciro za Gikristu.

Ku basore n’inkumi basaga 250 bagiye kumara amezi hafi atandatu biga ku mubano, uyu mwiherero wabaye umwanya wo kwisuzuma, kongera gusobanukirwa n’icyo bisobanura gushinga urugo no kwibuka ko urugo rwiza rutubakwa n’ibyifuzo gusa, ahubwo ko rusaba imyiteguro, ubwitange, ukwizerana, ukwemera n’inshingano za buri wese.

Ubutumwa bwa Padiri Thadée Nsengumuremyi bwongeye kubibutsa ko mbere yo kwifuza urugo rwiza, buri wese akwiye kubanza kwibaza uruhare rwe mu kurwubaka, agaharanira guhinduka no gukurikiza inama n’inyigisho bimufasha gutegura neza ubuzima bw’abashakanye.