Forum ya 9 y'urubyiruko rwa Diyosezi ya Kabgayi yitabiriwe n'abasaga 800

Mu ijambo rye ritangiza iyi Forum, Musenyeri Hodari Jean de Dieu yibukije urubyiruko rwitabiriye iri huriro ko rukundwa kandi ruzirikanwa buri gihe na Kiliziya, arusaba gukoresha neza aya mahirwe yo gukomeza gukurira mu kwemera no mu buvandimwe.

Padiri Gracien Nkurikiyimana, ushinzwe Ikenurabushyo ry'urubyiruko muri Diyosezi ya Kabgayi, yavuze ko iyi Forum igamije gufasha urubyiruko gukomeza ubuzima bwa gikristu binyuze mu masengesho, inyigisho n'ubusabane.

Ati "Muri iyi Forum urubyiruko ruraza tugasenga tukidagadura tukunguka abandi babyeyi bityo bwa buvandimwe Yezu Kristu adusaba bukarushaho gukura no gusagamba. Muri iri huriro rero tuzigamo byinshi bijyanye n'insanganyamatsiko y'uyu mwaka ya Turi abahamya b'amizero, ubuvandimwe n'amahoro."

Padiri Gracien yakomeje avuga ko iyi nsanganyamatsiko ije isubiza ikibazo cy'icyizere gikomeje kugenda kibura muri bamwe, bityo ko urubyiruko rugomba kongera kwisunga Kristu kugira ngo rusubirane icyizere cy'ubuzima n'icy’ukwemera.

Ati "Muri iyi si amizero arakenewe cyane kuko kuri bamwe icyizere ku rubyiruko cyaratakaye. Bityo rero ni igihe cyo kongera kugaruka imbere ya Nyagasani, imbere ya Yezu Nyirimpuhwe by'umwihariko kugira ngo yongere atugaruremo icyizere cy'ubuzima, icy'ubukristu kandi koko amahoro atanga aganze mu mitima yacu."

Yanibukije urubyiruko ko rugomba gukoresha neza iyi minsi ine rugiye kumarana, batega amatwi kandi bashyira mu bikorwa inyigisho bazahabwa.

Ati "Mbere na mbere ni ukumenya icy'abazanye, twaje tuje gusenga, twaje tuje imbere ya Nyagasani, twaje tuje kumutega amatwi. Ndabasaba rero kuzamutega amatwi no kwitwararika kurangwa n'ikinyabupfura kugira ngo ibyo Nyagasani azatugenera, ibiganiro tuzumva aha ngaha ntibizinjirire mu gutwi kumwe ngo bisohokere mu kundi."

Mu muhango wo gutangiza iyi Forum hanabaye igikorwa cyo guhererekanya umusaraba hagati y'urubyiruko nk’ikimenyetso cy'umusaraba Mutagatifu Papa Yohani Pawulo wa II yasigiye urubyiruko, abasaba kuwurangamira no kuwuramya kugira ngo ubafashe mu rugendo rwabo rw'ukwemera.

Aho Paruwasi iwakiriye muri uwo mwaka isabwa gukomeza kuwuzirikana, ikazirikana ko Yezu Kristu wabambwe ku musaraba ahora ari kumwe n'abamwemera mu buzima bwa buri munsi.

Forum y'uyu mwaka yitabiriwe n'urubyiruko rusaga 800 rwatutse muri Paruwasi 31 zigize Diyosezi ya Kabgayi, ruherekejwe n'abapadiri barushinzwe ndetse n'abihayimana bo mu miryango inyuranye. izasozwa ku Cyumweru, tariki ya 12 Nyakanga 2026.