Imikino ya gicuti yahuje abapadiri ba Gikongoro n'aba Butare yarangiye banganyije

Ni imikino yitabiriwe n'abaseminari ba Petit Seminaire Saint Jean Paul II, Abarezi babo, inzego z'ubuyobozi zitandukanye zirimo iz'umutekano, bamwe mu babyeyi n'abandi bari baje kwihera ijisho uko abapadiri bahatana mu mikino.

Misa igihumuza, nyuma yo guhindura imyenda ya Liturujiya no kwambara imyenda ya siporo yabugenewe, amakipe y'abapadiri yasesekaye ku bibuga bitandukanye, hatangira umukino wa VolleyBall, utangizwe n'Umwepiskopi wa Gikongoro.

Ubu busabane bwabimburiwe n'Igitambo cya Misa yayobowe n'Umushumba wa Diyosezi ya Gikongoro, Myr Celestin Hakizimana ari kumwe na Mugenzi we wa Butare Myr Filipo Rukamba.

Nyuma yo guhatana ku makipe yombi, umukino wa Volleyball warangiye abapadiri ba Diyosezi ya Gikongoro batsinze aba Butare amaseti 2-0.

Hakurikiyeho umukino wa Basketball warangiye Abapadiri ba Diyosezi ya Butare bishyuye Gikongoro babatsinda uyu mukino ku manota 34 kuri 25. Iyi mikino yombi ikaba yabereye muri Petit Seminari Saint Jean Paul II.

Bakomereje kuri Stade ya Nyagisenyi, Stade y'Akarere ka Nyamagabe, mu mukino w'umupira w'amaguru. Uyu mukino ukaba watangiranye imbaraga ku makipe yombi kuko igice cya mbere cyarangiye anganya igitego 1 kuri 1. Gusa uko iminota yagiye yigira imbere ishyaka ryagiye rigabanuka, ku buryo igice cya kabiri cyarangiye nta kindi gitego kibonetse, umukino urangira ari Igitego 1-1.

Padiri Bwema Lambert mu izina rya bagenzi be ba Diyosezi ya Butare, yashimiye abashumba babo batumye bahura nk'abapadiri ba Diyosezi zombi bagasabana bahereye mu gitambo cya Misa asaba ko uyu muco utacika kuko ubafasha gusubira mu buto bwabo abakiri bato bakamenya ko ibyiza biri imbere. Yashimiye kandi abapadiri bakuze bifatanyije na bo n'ubwo ku bw'imbaraga zabo batabashije gukina asaba abakiri bato kubigiraho.

Yashishikarije kandi abapadiri gushyira imbaraga muri Siporo kuko bifasha kongera kuba mushya ikongera n'ubuvandimwe, ubukirisitu n'ubupadiri. Ati"Abapadiri baherukanaga biga mu Nyakibanda, ni byiza ko bongeye guhura bakongera kunoza ubupadiri bwabo, ubukirisitu bwabo, ubumuntu n'ubucuti bukiyongera bafatanya mu byiza no mu ngorane.

Umushumba wa Diyosezi ya Gikongoro, Myr Celestin Hakizimana aganira na Kinyamateka yavuze ko iyi mikino yateguwe mu rwego rwo kwizihiza yubile y'impurirane irimo iya 2025 y'ugucungurwa kwa bene muntu na 125 inkuru nziza igeze mu Rwanda, kugira ngo bature Imana Diyosezi yabo, abakirisitu babo, bazahimbaze iyi Yubile bafite amahoro ku mutima no ku mubiri.

Myr Eugene Dushimurukundo, mu izina ry'abapadiri ba Gikongoro yagaragaje ibyishimo batewe n'uyu munsi, ashima by'umwihariko kuba wabereye mu Iseminari Nto ya Gikongoro, avuga ko byatumye Abaseminari bagira inyota yo gutera ikirenge mu cya bakuru babo.

Yavuze kandi ko yishimiye ko imikino yari ku rwego rwiza kuko abapadiri bo ku mpande zombi bari biteguye gukina bafite ishyaka numurava kandi babikorana ubuvandimwe n'ubusabane.

Igikorwa nk'iki cyaherukaga kuba muri Diyosezi ya Gikongoro, igihe cya yubile y'ubusaseridoti. Umwepiskopi wa Gikongoro akaba yizeza abapadiri ko bizahabwa umurongo iko gikorwa kikajya kiba ku buryo buhoraho.