Kabgayi na Ruhengeri mu mikino ya gicuti bashimangiye umugani “Ifuni ibagara ubucuti ni akarenge”

Mu kiganiro Kinyamateka yagiranye n’abepiskopi b’izi diyosezi, Musenyeri Balthazar Ntivuguruzwa wa Diyosezi ya Kabgayi yasobanuye intego y’uru ruzinduko agira ati “Abapadiri ba Diyosezi ya Kabgayi basuye abapadiri ba Ruhengeri bakina imikino irimo Volleyball, Basketball na Football. Iyi mikino ifite igisobanuro gikomeye; ni ugukuza ubuvandimwe hagati y’abasaserdoti, gusabana no gukora igikorwa cy’iyamamazabutumwa.”

Yakomeje ashimangira ko kwamamaza ubutumwa bwa Yezu Kristu bitagarukira ku magambo gusa.

Ati “Kwamamaza ubutumwa ntabwo ari ukuvuga gusa, cyangwa guhimbaza Liturujiya gusa, ahubwo n’ibi bikorwa by’ubuvandimwe n’ubusabane hagati y’abasaserdoti, bafatanyije n’umuryango w’Imana n’abalayiki, ni uburyo bwo kwamamaza Ivanjiri y’amahoro n’ubusabane.”

Musenyeri Ntivuguruzwa yanagaragaje ko ibi bikorwa biha imbaraga abapadiri bari mu butumwa hirya no hino, agira ati “Bituma bumva ko batari bonyine. Umusaserdoti uri mu butumwa muri paruwasi, mu mashuri cyangwa ahandi, iyo ahuye n’abandi yumva ubutumwa abusangiye n’abandi, bityo bikamukomeza.”

Yasoje asaba abitabiriye iyi mikino gukomeza kwimakaza ubuvandimwe mu buzima bwa buri munsi.

Ati “Ivanjiri twigisha ntigomba kuba mu magambo gusa, igomba kugaragara mu buzima busanzwe, mu gusurana, mu gusabana, mu kwishima no mu gusangira ibyiza n’ibibi.”

Ku ruhande rwa Musenyeri Vincent Harolimana, Umwepiskopi wa Diyosezi ya Ruhengeri, yashimiye uru ruzinduko, avuga ko rwashimangiye ubumwe bw’abasaserdoti.

Ati “Abapadiri bishimiye kwakira bagenzi babo cyane ko abenshi batari baherukanye. Kongera guhura nyuma y’igihe, bamwe barabanye i Nyakibanda n’i Rutongo, ni iby’agaciro gakomeye.”

Yakomeje ati “N’abakristu ba Diyosezi ya Ruhengeri bishimiye kwakira aba bapadiri muri iyi mikino. Ni umwanya mwiza wo kwidagadura no gushimangira ubuvandimwe.”

Musenyeri Harolimana yanagarutse ku mugani w’ikinyarwanda ugira uti “ifuni ibagara ubucuti ni akarenge”, avuga ko nabo bagiye kwitegura bakazishyura iyi Diyosezi.

Ati “Nk’uko babivuga mu Kinyarwanda, ifuni ibagara ubucuti ni akarenge. Ubu baje kudusura, natwe mu gihe gikwiye tuzabasura i Kabgayi, kugira ngo ubu butumwa bwo kubaka ubuvandimwe bugere hose.”

Iyi mikino yanashyigikiwe n’abapadiri ku mpande zombi, bagaragaje ko ari igitekerezo cyiza bari barifuje, ndetse abapadiri ba Ruhengeri bifuza kuzajya gusura Kabgayi mu rwego rwo gukomeza gushimangira ubu bumwe.

Mu mikino y’intoki (Basketball na Volleyball), abapadiri ba Diyosezi ya Kabgayi bitwaye neza batsinda Ruhengeri: muri Basketball batsinze ku manota 45-14, naho muri Volleyball batsinda maseti 2-0, begukana ibikombe bibiri.

Mu mupira w’amaguru ho, Diyosezi ya Ruhengeri yatsinze Kabgayi ibitego 3-2, nayo yegukana igikombe cy’uwo mukino.

Iyi gahunda isize ishimangiye ko ubuvandimwe n’ubusabane ari inkingi ikomeye mu iyogezabutumwa, aho ibikorwa bifatika bigaragaza Ivanjiri mu buzima bwa buri munsi.