Papa Leo XIV yakiriye abaharanira uburenganzira bw’abimukira bafungiye i Chicago

Abagize iri huriro bari baturutse i Chicago bajya i Roma kwitabira igikorwa cy’isengesho n’inyigisho rusange bya buri cyumweru bya Papa, bizwi nka General Audience. Bari abantu bagera kuri 30, barimo abapadiri, abadiyakoni, abanyeshuri n’abandi bayobozi ba Kiliziya Gatolika bakorana mu bikorwa byo gufasha abimukira.

Muri icyo gikorwa, bagejeje kuri Papa amafoto agaragaza ibikorwa byabo, ibirori n’izindi gahunda bakora mu gufasha abimukira, ndetse n’amabaruwa yanditswe n’abimukira bagamije kumugezaho ubuzima babayemo n’ingorane bahura na zo.

Abigail Ortiz Valles, umwimukira ukomoka muri Mexique akaba n’umulayiki ukorana n’abamisiyoneri ba Scalabrini, yari mu bagejeje kuri Papa ubuhamya bw’abimukira bafashwa n’iri huriro.

Mu marangamutima menshi, yavuze ko guhura na Papa byari umwanya ukomeye kuri we, amubwira uko yumva ameze iyo asuye ikigo cya Broadview, aho abimukira bafungirwa.

Yagize ati “Namubwiye ko igihe cyose nsuye Broadview, mpura na Yezu n’Ububabare bwe… Mumbabarire, ariko ubu amarangamutima arandenze cyane.”

Ihuriro CSPL rikorera mu gace ka Chicago, aho rifasha abimukira babarirwa mu magana baturuka muri Amerika yo Hagati no muri Amerika y’Epfo. Abo bimukira, abenshi baba mu nkengero z’umujyi, aho bahura n’inzitizi zijyanye n’imibereho zirimo no kutamenya uko ejo hazaza habo hazaba hameze.

Ibikorwa by’iri huriro birimo kubafasha mu buzima bwa buri munsi, kubasengera, kubaha ubufasha bw’ubuvuzi no kubaba hafi mu bihe bigoye.

Ihuriro riharanira ubutabera n’uburenganzira bw’abimukira [CSPL] rivuga ko intego yayo nyamukuru ari ukurengera uburenganzira bw’abantu batandukanye bo mu muryango mugari, barimo ababyeyi, abavandimwe n’abakozi batandukanywa n’imiryango yabo.

Nyuma y’uko mu ntangiriro bahuye n’imbogamizi n’ubukererwe mu kubona uruhushya rwo kwinjira muri icyo kigo, abagize iri huriro bemerewe by’agateganyo kujya bagisura buri munsi.

Kuva muri Gicurasi 2026, iri huriro ryari rimaze gusura icyo kigo inshuro zirenga 135, rikagera ku bimukira 725 bari bafungiyemo.

Amabaruwa y’abimukira yagejejwe kuri Papa

Abagize iri huriro bageze i Vatikani bambaye imipira y’umuhondo iriho ishusho ya Bikira Mariya, ikaba ari ishusho ifite igisobanuro gikomeye mu buzima bw’iyobokamana bw’Abagatolika benshi bo muri Amerika y’Epfo. Bari bafite kandi icyapa cyanditseho amagambo agira ati “Kiliziya ikeneye ubwigomeke butagatifu.”

Abagize iri huriro kandi bashyikirije impano Papa bari bamuzaniye, yari igizwe n’amafoto y’ibikorwa byabo n’amabaruwa y’abimukira bamwandikiye, bamugezaho ubuzima babayemo, ingorane bahura na zo n’icyizere bafite cy’ejo hazaza heza.

Nk’uko byasobanuwe na Musenyeri José María García Maldonado, umwepisikopi wungirije wa Chicago, ayo mabaruwa agaragaza uko abimukira bakomeza guhangana n’ingorane babifashijwemo n’ukwizera Imana n’abababa hafi.

Yagize ati “Bavuga ubuzima bwabo, nubwo bahura n’ingorane zitabarika, bakomeza urugendo babikesha icyizere cy’ejo hazaza heza, ubufasha bw’Umwami wacu n’ibikorwa by’imiryango nk’iyi.”

Uyu musenyeri yavuze ko iri huriro rifite uruhare rukomeye muri Kiliziya mu bikorwa by’ubugiraneza n’ubutabera, cyane cyane mu kurengera abimukira bari mu bihe bikomeye.