Abanyamuryango ba Legio Maria bakoreye urugendo nyobokamana muri Indonesia

Uru rugendo rwari rugamije gusengera imbere y’ibisigazwa byitiriwe Mutagatifu Petero Intumwa, gukomeza ukwemera no kwibutswa ko urukundo rw’Imana rugomba kugaragarira mu bikorwa bifatika byo gufasha abakene, kwita ku batishoboye no gukorera abandi.

Lewouran yakiriye abagenzi mu byishimo n’ukwemera

Ku baturage ba Lewouran, umudugudu muto uherereye mu burasirazuba bwa Flores, kwakira abagenzi bagera ku 1.000 byabaye igikorwa gikomeye mu buzima bwabo bw’iyobokamana.

Padiri Moses Atasoge, umupadiri wa Paruwasi ya Mutagatifu Yozefu ya Lewotobi, yavuze ko ku bakirisitu bo muri iyo paruwasi, kuza kw’abo bagenzi byari umwanya wihariye wo gukomeza ubumwe no gusobanukirwa neza umurage wa Mutagatifu Petero.

Yagize ati “Ku bakirisitu bo muri Paruwasi ya Lewotobi, ukuza kw’aba bagenzi ni umwanya w’amateka. Babona ko uyu munsi ufite igisobanuro gikomeye.”

Padiri Moses yashimangiye ko urugendo nk’uru rwibutsa abakirisitu akamaro ko kubana kivandimwe, gukorera hamwe no kwiringira Imana.

Yagize ati “Twigira hamwe kubaka ubumwe bukomeye bwa kivandimwe, gukorana neza no kugira umutima wo kwiyegurira Imana, twishingikirije ku burinzi n’imbaraga zayo. Twemera ko iyo Imana itagira uruhare muri iki gikorwa, nta buryo cyari kugerwaho neza.”

Sisi Leba, wari uyoboye komite yateguye uru rugendo nyobokamana, yasobanuye ko iki gikorwa ari urugendo ngarukamwaka rw’abanyamuryango ba Renha Rosari Larantuka Comitium, rukorwa buri kwezi k’Ukwakira.

Sisi yavuze ko uru rugendo rufite igisobanuro gikomeye mu buzima bwa Kiliziya, kuko ruhuza kubaha Bikira Mariya no kubaha Mutagatifu Petero, bombi bafite umwanya ukomeye mu mateka y’iyobokamana rya gikristu.

Yagize ati “Mu Ivanjili, Bikira Mariya na Mutagatifu Petero bahora begereye Yezu mu buryo bwinshi, bakorana na we. Ni yo mpamvu dutangira urugendo kuri Bikira Mariya tukerekeza kuri Mutagatifu Petero.”

Yasobanuye ko Lewouran ari nk’isoko y’amahoro yo mu mutima, ahantu umuntu ashobora kujya gushaka ituze no kwegera Imana. Yagereranyije uwo mudugudu na Nazareti ntoya, ahantu hasa n’aho abantu benshi batazi, ariko hashobora kubera ibintu bikomeye mu buzima bw’ukwemera.

Ibisigazwa bya Mutagatifu Petero, ikimenyetso cy’ubumwe na Kiliziya ku isi hose

Ibisigazwa byitiriwe Mutagatifu Petero Intumwa n’agace k’ibuye ryavuye ku Muryango Mutagatifu wa Bazilika ya Mutagatifu Petero i Vatikani, byazanywe i Lewouran na Padiri Marco Solo Kewuta, wo mu muryango w’abamisiyoneri ba Verbiti, uzwi nka SVD. Padiri Marco akomoka muri uwo mudugudu, ariko akaba akorera umurimo w’ubupadiri i Vatikani, i Roma.

Kuba ibyo bisigazwa byaragejejwe muri uwo mudugudu bifite igisobanuro cyihariye ku baturage baho. Padiri Marco yibukije ko igihe ikirunga cya Lewotobi Laki-Laki cyarukaga kikagira ingaruka ku duce tugikikije, umudugudu wa Lewouran utagize ingaruka zikomeye nk’ahandi, ku buryo abaturage baho batigeze banahungishwa.

Yanasubije amaso inyuma yibuka umwaka wa 2001, ubwo yahaga umugisha Kiliziya yari yarubatswe n’abaturage baho babigiranye umuhate n’ubwitange. Muri icyo gihe, yahisemo ko yitirirwa Mutagatifu Petero Intumwa. Nyuma y’imyaka itandatu, mu 2007, yahamagawe kujya gukorera umurimo i Vatikani, ahantu hazwi cyane kubera imva ya Mutagatifu Petero.

Padiri Marco yavuze ko atagamije kugaragaza Lewouran cyangwa Kiliziya yayo nk’ahantu hatagatifu ku buryo bwihariye kurusha ahandi, ahubwo ko ibyo bintu abibona nk’ibice by’ubushake bw’Imana, abantu badashobora gusobanukirwa byuzuye.

Yagize ati “Sinshaka gutuma Lewouran cyangwa Kiliziya yacu bifatwa nk’ahantu hatagatifu ubwaho, ariko ibi byabayeho bifite ubwiru bwerekana imbaraga z’Imana, wenda abantu benshi batarasobanukirwa.”

Icyakora, Padiri Marco yatanze umuburo ko urugendo nyobokamana rudakwiye kurangirira ku gutangazwa n’ibisigazwa by’abatagatifu cyangwa ku marangamutima umuntu agira igihe asenga.

Isengesho rigomba kuvamo ibikorwa byo gufasha abandi

Padiri Marco yasabye abanyamuryango ba Legio Maria kutagarukira ku byishimo n’ihumure bakuye mu rugendo nyobokamana, ahubwo ko bagomba kubihindura ibikorwa bifatika bigirira akamaro abantu babakikije.

Yagaragaje bimwe mu bibazo byugarije abaturage, birimo kutabona umusaruro w’imyaka bitewe n’ibibazo by’ubuhinzi, imibereho igoye y’imfubyi, imiryango ikennye, abarwayi, abasaza n’abakecuru, ndetse n’abantu bagizweho ingaruka n’icuruzwa ry’abantu.

Yashimangiye ko umurimo wa Legio Maria ushobora kugaragarira mu kwegera abo bantu, kubatega amatwi no kubafasha uko bishoboka.

Uru rugendo ntirwari urwo gusura ahantu hatagatifu gusa, ahubwo rwari n’umwanya wo kongera gusuzuma inshingano z’abakirisitu mu buzima bwa buri munsi. Abitabiriye uru rugendo bibukijwe ko gusenga no kubaha abatagatifu bigomba kubabyarira umutima w’impuhwe, ubwitange n’urukundo rugaragarira mu bikorwa.