Papa Leo XIV yavuze ko ahazaza h’isi hadashingiye ku kwihorera

Papa Leo XIV yavuze ko nta hazaza h’isi hubakiye ku kwihorera, intambara no guhatira abaturage guhunga. Mu butumwa bwe Papa agaragaza ko amahoro arambye ashingiye ku bwiyunge, ubutabera, n’ubworoherane. Yagize ati”Nta hazaza hashingiye k’ urugomo, kwirukanwa ku ngufu, no kwihorera. Nta hazaza hashobora kuboneka binyuze mu nzira yo kurimbura abandi cyangwa kubima uburenganzira bwabo. Amahoro ni yo nzira yonyine iganisha ku hazaza hizewe.”

Nyirubutungane Papa yashimangiye ko urukundo nyakuri rw’abaturage ba Palestina n’abatuye mu karere kose rudashingiye ku nyungu za politiki, ahubwo rugaragarira mu bikorwa bigamije kububakira amahoro arambye no kubaha icyubahiro nk’abantu bafite agaciro kamwe mu maso y’Imana.

Papa Leo yasabye abayoboke ba Kiliziya Gatolika, ibigo byayo bifasha abaturage n’imiryango y’ivugabutumwa gukomeza guharanira ubutabera no kugaragaza ibikorwa bifatika bigamije kurengera ubuzima bw’abantu. Yanasabye imiryango mpuzamahanga n’abayobozi b’ibihugu kudahwema guharanira ko abaturage ba Gaza n’Isi yose bagira amahoro, umutekano n’icyizere cy’ejo hazaza.

Ubu butumwa bwa Papa bwakiriwe nk’isomo rikomeye ku bayobozi ndetse n’abakristu ku rwego rw’isi yose, kuko bwibutsa ko amahoro aturuka mu bikorwa by’ubumuntu n’ubwiyunge, aho kwakira impunzi ku ngufu cyangwa ku nyungu zishingiye ku butegetsi.

Mu isengesho rya Angelus, Papa Leo XIV yagaragaje ko atewe impungenge cyane n’abaturage bo muri Gaza “Ndasabira cyane abaturage ba Palestine muri Gaza, bakomeje kubaho mu bwoba, mu buzima budakwiriye landi bakirukanwa ku butaka bwabo.”

Papa yibukije isi yose itegeko ry’Imana “Ntuzice”, asaba abantu bose kwemeza ko buri muntu afite agaciro kadahungabanywa, kagomba kubahwa no kurindwa.”

Kuva intambara yatangira mu 2023, nyuma y’igitero cya Hamas cyahitanye abasivile barenga 1,200, Abanya-Palestina barenga 65,000 bamaze kwicwa, nk’uko bitangazwa n’inzego z’ubuzima za Gaza.