Sudani y’Epfo: Abana barenga ibihumbi 450 mu kaga k’imirire mibi; Papa Leo XIV arasaba ko intambara ihagarara

Raporo ya UNICEF igaragaza ko kuva mu ntangiriro z’umwaka wa 2026, abantu bagera ku 250,000 bimuwe n’imirwano mu bice byo mu majyaruguru no hagati bya Jonglei. Ibi byatumye serivisi z’ubuzima n’iz’imirire zihagarara, bituma abana benshi basigara nta bufasha bw’ibanze bafite.

Uhagarariye UNICEF muri Sudani y’Epfo, Noala Skinner, yavuze ko imiterere y’ibihe ihangayikishije cyane, cyane cyane ku bana bato.

Yagize ati “Tuzi ko utu duce ari two dufite umubare munini w’abana bafite imirire mibi, kandi umwana ufite imirire mibi utahawe ubuvuzi ku gihe aba afite amahirwe yo gupfa incuro 12 kurusha abandi.”

Mu butumwa bwa Papa Leo XIV buheruka, yagaragaje impungenge zikomeye ku mibereho y’abana bo muri Sudani y’Epfo, asaba impande zose ziri mu mirwano gushyira imbere ubuzima bw’abantu, by’umwihariko abana.

Papa Leo XIV yasabye ko intambara ihagarara, anibutsa ko abana badakwiye kwishyura igiciro cy’amakimbirane ya politiki n’ubushyamirane. Yashimangiye ko gufasha abatishoboye ari inshingano rusange y’ikiremwamuntu, asaba ko inzira z’ubutabazi zifungurwa nta nkomyi.

UNICEF ivuga ko umutekano muke wakomeje kubangamira ibikorwa by’ubutabazi, aho inzira zo mu mazi, mu kirere no ku butaka zagiye zifungwa. Muri Jonglei, counties esheshatu zamaze kubura ibiribwa cyangwa ziri hafi kubibura burundu, mu gihe hakenewe cyane ubufasha ku bana bafite imirire mibi ikabije.

Hafunzwe kandi ibigo nderabuzima 17 hirya no hino mu gihugu, bituma serivisi z’imirire zihagarara. Hanabayeho ibikorwa 10 byo gusahura ibikoresho by’ubuzima n’imirire, aho kimwe cya kabiri cyabyo byabereye muri Jonglei.

Nubwo kugera mu bice byibasiwe bigoye, UNICEF ikomeje kohereza ubufasha. Muri Duk County, hoherejwe ibikoresho byo gutunganya amazi, indobo n’isabune, mu rwego rwo kwirinda icyorezo cya kolera.

Mu mujyi wa Akobo, hatanzwe imiti ya malariya, ibiribwa byihariye bigenewe abana bafite imirire mibi, ndetse n’ibikoresho by’ubuvuzi byihutirwa bigenewe kwita ku bantu barenga 10,000.

Papa Leo XIV yongeye gusaba umuryango mpuzamahanga kongera imbaraga mu gutabara Sudani y’Epfo, ashimangira ko amahoro ari yo nzira yonyine yatuma abana babona ejo hazaza heza.