Ubwishingizi bwatumye abashora Imari mu buhinzi n'ubworozi biyongera

Nk'uko imibare y'abashoramari mu buhinzi n'ubworozi muri aka karere ibigaragaza, ubwishingizi bw'inkoko buri hejuru y'ibihumbi 100, ubw'inka hejuru y'Ibihumbi 6, ubw'ingurube hejuru y'ibihumbi 45, ubw'umuceri hejuru ya Hectare 1000, ibigori hejuru ya Hectare 200 ni naho ubw'bishyimbo bukaba hejuru ya Hectare 30.

Ubu bwitabire bwo gushora imari mu buhinzi n'ubworozi bushingiye ku musaruro wa gahunda ya "Tekana Urishingiwe Muhinzi Mworozi" yafashije abashora Imari mu buhinzi n'ubworozi gukira igihunga cy'igihombo baterwaga n'ihindagurika ry'ikirere, ibiza n'ibyorezo.

Iyi gahunda ya Leta y'ubwishingizi bw'ibihingwa n'amatungo, yunganira Abahinzi n'Aborozi ku kigero cya 40% ku kiguzi cy'ubwishingizi. Yatangiye ku mugaragaro tariki 23 Mata 2019 ikaba ishyirwa mu bikorwa na Minisiteri y'Ubuhinzi n'Ubworozi ibinyujije mu bigo bitandukanye by'ubwishingizi bifitanye amasezerano y'imikoranire ari byo: BK Insurance, RADIANT, Prime, SONARWA na UAP.

Iyi gahunda yishingira igishoro umuhinzi yashoye mu buhinzi bwe kuva mu gutegura umurima kugeza asaruye.

Bamwe mu bahinzi b'umuceri bakorera mu gishanga cya Rurambi, giherereye mu murenge wa Mwogo, mu Karere ka Bugesera batangarije Kinyamateka ko "Tekana Urishingiwe Muhinzi Mworozi" yatumye bitabira ubuhinzi n'ubworozi batikanga igihombo.

Yadufashije Alphonsine umwe mu bahinzi b'umuceri bakorera muri icyo gishanga yagize ati "muri ubu buhinzi dukora, dukunze kwibasirwa n'ibiza. Mbere twarahingaga, Ibiza byaza tugahomba. Aho tumariye gushinganisha imyaka yacu, ubu nta kibazo tugihura na cyo haba igihe imyaka yacu yarwaye cyangwa se yatwawe n'umwuzure, kuko ubwishingizi bwacu butwishyurira hakurikijwe igihombo wahuye na cyo."

Umuyobozi wa gahunda y'Ubwishingizi muri Minisiteri y'Ubuhinzi n'Ubworozi, Joseph Ntezimana Museruka, aganira na Kinyamateka yavuze ko iyi gahunda yashyiriweho kugira ngo ifashe abahinzi n'aborozi kubona ibisubizo igihe bahuye n'igihombo gitewe n'ingaruka z'imihindagurikire y'ikirere. Iyi gahunda kandi ibabasha kongera umusaruro no kubona inguzanyo mu bigo by'imari bitandukanye.

Ati"iyi gahunda yaje ije gukemura bimwe mu bibazo bamwe mu bahinzi n'aborozi bahuraga na byo igihe babaga bahuye n'imyuzure, izuba ry'igihe kirekire, amapfa n'ibindi bishobora gutuma ibyo bahinze byangirika bakabura uwabashumbusha, ugasanga n'inguzanyo bafashe mu bigo by'imari habuze ubwishyu."

Kugera ubu 'Tekana Urishingiwe muhinze Mworozi' yishingira ubuhinzi bw'Umuceri, Ibigori, Urusenda, Imiteja, Soya, Imyumbati n'ibirayi mu gihe ku matungo yishingira:Inka,Ingurube ,Inkoko n'amafi.

Ushaka ubwishingizi yegera Agoronome cyangwa Veterineri w'Umurenge cyangwa umujyanama w'ubworozi n'uwubuhinzi umwegereye, akamuhuza n'ikigo cy'ubwishingizi. Ashobora no guhamagara nimero ya telephone ya MINAGRI 4127 itishyurwa agafashwa guhabwa ubu bwishingizi.