Venezuela: Hari benshi basigaye mu mazu ashobora kubagwaho nyuma y'ibiza by'umutingito

Mu kiganiro yahaye Vatican News ku wa Mbere tariki ya 29 Kamena 2026, Padiri García yavuze ko ubwo yari atangiye kuganira n'umunyamakuru, indi nyeganyega y'ubutaka yongeye kumvikana i Caracas, ibintu byatumye bongera kwibuka umutingito ukomeye wabaye ku wa 24 Kamena ugahitana abantu barenga 1,400.

Uyu mupadiri yavuze ko ibibazo abaturage bahuye na byo bibabaje cyane, cyane cyane mu gace ka La Guaira, aho umutingito wangije ibintu ku rwego rutigeze ruboneka mu mateka ya vuba y'icyo gihugu.

Yagize ati "Mu by'ukuri ibintu birababaje cyane. Nk'uko mwabibonye mu makuru, ibyangiritse muri La Guaira ni byinshi cyane. Hari n'abavuga ko biruta ibyatewe n'inkangu zikomeye zabaye mu 1999. No hano i Caracas ingaruka zaragaragaye cyane. Hari abantu benshi basigaye mu mazu ashobora kubagwaho, abandi babuze ubuzima, kandi twisanze mu kibazo nta muntu wari warigeze atekereza ko cyabaho."

Nubwo bimeze bityo, Padiri García yavuze ko Kiliziya Gatolika yahise yihutira kwegera abagizweho ingaruka n'ibi biza.

Ati "Twabashije kwitanga no kwishyira hamwe. Mbona ibi byadufashije gushyira mu bikorwa wa muco wo kugendana twasengeye kandi dutekerezaho mu Mwaka Mutagatifu w'Icyizere."

Yakomeje avuga ko n'ubwo igihugu kitari kimenyereye umutingito ufite ubukana nk'uwo, byabaye umwanya wo kugaragaza ubutumwa bwa Kiliziya bwo gufasha abababaye.

Ati "N'ubwo ibi ari ibyago bikomeye, cyane ko mu mateka ya vuba y'igihugu cyacu, cyane cyane muri Caracas na La Guaira, tutari twarigeze duhura n'umutingito ungana utyo, byatumye natwe nka Kiliziya dukanguka. Twatanze ubufasha bw'imibereho, tunakomeza umurimo wo kwamamaza Inkuru Nziza. Twahumurije abahuye n'ibyago, dusengera hamwe mu bibuga rusange, dusangira Lituriji n'amasengesho, kandi ibyo byaduhaye ihumure."

Padiri García yashimye cyane ubutumwa bwa Papa Leo XIV bwo kwifatanya n'abaturage ba Venezuela muri ibi bihe bikomeye, avuga ko bwabongereye icyizere.

Yagize ati "Amagambo ya Papa Leo XIV yatubereye isoko ikomeye y'ihumure n'inkunga. Abahuye n'ibi byago bumvise ko batari bonyine kandi barabishimira cyane."

Uyu mupadiri wa Paruwasi yanagarutse ku byangiritse kuri Kiliziya yabo, avuga ko bimwe mu bice byarwo byasenyutse ku buryo bishobora gushyira ubuzima bw'abaturage mu kaga.

Yagize ati "Igisenge cy'igice cyitiriwe Bikira Mariya wa Coromoto cyarasenyutse burundu. N'ikindi gice cy'igisenge cyaraguye, mu gihe umwe mu minara y'inzogera usigaye uhagaze nabi ku buryo ushobora kugwa igihe icyo ari cyo cyose. Ibi bishyira mu kaga igice gisigaye cya Kiliziya ndetse n'abaturage bahaturiye."

Nubwo Kiliziya yangiritse, yavuze ko ibyo byabaye uburyo bwo kurushaho kwegera abaturage, kuko ibikorwa bya Liturijiya n'amasengesho byimuriwe mu mihanda no mu bibuga rusange.

Yagize ati "Dukomeze kuba Kiliziya isohoka ikajya aho abantu bari. Dukomeze kujyana no kuba hafi y'abandi. Kuba urusengero rwarangiritse byatumye turushaho kwegera abantu aho bari, kuko ari ho dusigaye twizihiriza Liturijiya n'amasengesho."

Yanagaragaje icyizere ko Imana izakomeza kubitaho muri uru rugendo rwo kongera kwiyubaka.

Ati "Ni Umwami Imana warinze ubuzima bwacu, kandi azakomeza kutuba hafi kugeza igihe twese tuzongera guhagarara neza nyuma y'ibi bihe bikomeye."

Padiri García yasabye kandi abantu bo hirya no hino ku isi gukomeza gushyigikira Venezuela, cyane cyane binyuze mu nkunga zinyuzwa mu buryo bwemewe na Kiliziya.

Yagize ati "Abifuza gutanga ubufasha, harimo n'ubw'amafaranga, turabasaba gukoresha konti zemewe z'Inama y'Abepiskopi ba Venezuela. Iyo nkunga izagera rwose ku bayikeneye kurusha abandi."