Myr Edouard aramagana abahohotera n'abasuzuguza umugore

Ibi birori byateguwe ku bufatanye na Komisiyo y'Ubutabera n'Amahoro, binyuze mu mushinga wo kurwanya ihohoterwa rikorerwa umugore, byahuje iyi Komisiyo, Diyosezi ya Cyangugu n'Akarere ka Nyamasheke.

Mu butumwa butandukanye, abafashe ijambo bagarutse ku ruhare rw'umugore mu mibereho y'umuntu na sosiyete, n'uko mu bihe n'imico bitandukanye, hagiye hagaragara imyitwarire n'imikorere itesha agaciro ikanahohotera umugore.

Ikibazo cy'ihohoterwa rikorerwa umugore, kikinagaragara muri Diyosezi ya Cyangugu n'ahandi henshi ku isi, nk'uko byagarutsweho, ni na cyo cyahagurukije iyi Diyosezi na Komisiyo y'Ubutabera n'Amahoro, mu rwego rwo guhangana n'icyo ari cyo cyose gitesha agaciro umugore, kuko iyo umugore ataye agaciro na sosiyete ntako ishobora kugira.

Asobanura icyubahiro cy'umugore yagize ati" Umugore ni umubyeyi. Imana yagennye ko umuntu asamwa akamara amezi 9 mu nda y'umugore, akamubyara, akamwonsa akamukikira akamurere. Buri wese ni umwana w'umugore. Umukobwa aba afite muri kamere ye iyo ngabire y'ububyeyi. Igihe cyose tuvuze ijambo umugore twibuka umubyeyi wahawe icyubahiro n'inshingano zo gutanga ubuzima. Abashakashatsi mu miterere ya muntu, bavuga ko iyo umwana amaze kuvuka aba akeneye kuba hafi ya nyina cyane nibura amezi 6 ya mbere. Ukumuba hafi bimushyiramo imbaraga zikomeye zituma ashobora guhanga n 'ubuzima. Ibi ni byo birema imitekerereze y'umwana bikamushyiramo imbaraga karemano zituma azashobora kuba umuntu muzima ufite ibyangombwa byose mu miterere ye."

Yakomeje asobanura ko umugore adatanga ubuzima bw'umubiri gusa ahubwo atanga n'ubuzima bw'umutima n'ubwa roho."

Uyu mutima na Roho, Myr Edouard avuga ko nabyo ari umwihariko Imana yahaye umugore. Ati"Umugore ni inyigisho. Atwigisha ubuntu, atwigisha ubumuntu. Iyo umugore abuze impuhwe imitima irahungabana".

Ibi ni na byo Myr Edouard Sinayobye Mu ijambo rye yashimangiye, avuga ibigwi umugore yibutsa ko buri wese afite inshingano yo kumurinda.

Myr Edouard ashima uko imitekerereze iheza abagore ikabatesha agaciro igenda ihinduka, nyamara akavuga ko hari byinshi bigikeneye gukorwa mu rwego rwo kurinda umugore guteshwa agaciro no gusuzugurwa.

Ati"Dufite inshingano zo kurinda umugore, kuko ari umutima w'urugo akaba n'umutima wa Sosiyete. Tumurinde gusuzugurwa.Imyumvire yose, imyifatire, ibikorwa byapfobya cyangwa byasuzuguza umugore n'ibyo kwamaganwa."

Mu byo Myr Edouard abona bikwiriye kwamaganirwa kure, kubera ingaruka bifite ku gaciro k'umugore harimo: gufatwa ku ngufu, Ruswa y'inshimishamubiri, icuruzwa ry'abangavu n'uburaya.

Myr Edouard yasabye buri wese gukora ibishoboka kugira ngo izi ngeso n'imigirire itesha agaciro umugore bicike kuko igihungabanyije umugore kigira ingaruka kuri sosiyete muri rusange.

Ibirori byo guhimbaza umunsi w'umugore muri Diyosezi ya Cyangugu byitabiriwe na Mayor wa Nyamasheke, Mupenzi Narcisse,wavuze ko n'ubwo hirya no hino hakigaragara, ibikorwa bihohotera umugore, hari ikizere ko bizagenda bigabanuka kubera umuhate Leta y'u Rwanda, Kiliziya Gatolika n'abandi bafatanyabikorwa bakomjeje kubishyiramo.

Ku ruhande rw'umushinga wo kurwanya Ihohoterwa rikorerwa abagore mu ngo no mu kazi, wa Komisiyo y'Ubutabera n'Amahoro, Padiri Hyacinthe Irakoze yavuze ko bishimira intambwe bakomeje gutera nyuma y'umwaka umwe gusa bakora, agasaba ingo zagize amahirwe yo kwegerwa n'uyu mushinga kwakira neza inyigisho bahabwa, bakareka ihohoterwa riri muri izo ngo bagatahiriza umugozi umwe bakubaka iterambere ry'imiryango n'iry'igihugu.

Kugera ubu, uyu mushinga ukorera muri Diyosezi ya Gikongoro na Cyangugu, ukaba ufashe imiryango irimo amakimbirane kuyasohokamo, ukanafasha abakobwa babyariye iwabo kutiheba no kwisuganye biyubakira ejo hazaza habo n'ah'imiryango yabo.