Papa Leo XIV yagize Sr. Mary Teresa Barron Umunyamabanga Wungirije w’Urwego rushinzwe Iyogezabutumwa

Sr. Mary Teresa Barron, ni umubikira wo mu muryango w'Ababikira b'Abamisiyoneri wisunze Bikira Mariya Umwamikazi w'intumwa. Akaba yari umuyobozi w'uyu muryango kuva mu mwaka wa 2018. 

Sr. Mary Teresa Barron yavukiye i Donegal muri Irilande, ku wa 7 Ugushyingo 1968.

Afite impamyabumenyi z’icyiciro cya gatatu cya Kaminuza ebyiri. Imwe yayikuye mu Kigo gishinzwe Imiyoborere Rusange i Dublin muri Irilande aho yize ibijyanye n’imiyoborere y’ubuzima rusange (Public Healthcare Administration). Indi ni iyerekeye Iterambere Mpuzamahanga (International Development), yayikuye mu Kigo cya Kimmage i Dublin.

Mu rwego rw’imirimo yakoze muri Kiliziya no mu miryango y’abiyeguriye Imana, Sr. Barron yabaye Perezida w’Urwego rushinzwe Ubushakashatsi n’ishyinguranyandiko ku birebana n'Iyogeabutumwa ku isi (Service of Documentation and Study on Global Mission – SEDOS) kuva mu mwaka wa 2022 kugeza mu 2025.

Yanabaye kandi Perezida w’Umuryango Mpuzamahanga w’Abakuru b’Imiryango y’Abiyeguriyimana (International Union of Superiors General – UISG) i Roma, kuva mu mwaka wa 2023 kugeza mu 2025.

Mu nshingano nshya yahawe na Papa Leo XIV, azagira uruhare mu murimo wo guteza imbere iyogezabutumwa rya Kiliziya, by’umwihariko mu bihugu Kiliziya ikirimo gutera intambwe nshya mu kwamamaza Ivanjili no kubaka Imiryango mishya ya Kiliziya.

Sr. Mary Teresa Barron azatangira ku mugaragaro izi nshingano nshya ku wa 4 Mutarama 2027. Azaba yungirije Arikiyepiskopi Fortunatus NWACHUKWU, Umunyamabanga mukuru w'Urwego rushinzwe Iyogezabutumwa ku Isi. Uyu Arikiyepiskopi Fortunatus akaba aherutse mu Rwanda tariki 4-6/8/2026, ubwo yitabiraga Inama yo ku rwego rw'Isi y'Ihuriro ry'Abakora mu rwego rw'Itangazamakuru rya Kiliziya Gatolika ryateraniye i Kigali tariki 3-8/8/2026.