Abagore b’i Cyangugu na Bukavu barahamagarirwa kuzirikana bagenzi babo bo mu Karere bagihura n’ingaruka z’intambara

Kwizihiza uyu munsi muri Diyosezi ya Cyangugu kwabimburiwe n’Igitambo cya Misa abo bagore bo mu bihugu byombi baturiye hamwe nk'umwanya wo gusangira, gushimangira ubumwe n’ubufatanye, ndetse no kongera kwiyemeza gukorera hamwe mu kubaka amahoro n’imibanire myiza hagati y’abaturage b' i Bukavu muri Repubulika Iharanira Demokarasi ya Congo n’ab'i Cyangugu mu Rwanda.

Insanganyamatsiko y’uyu mwaka igira iti“Dufatanye guteza imbere uburenganzira, ubutabera n’ibikorwa bifasha abagore n’abakobwa bose.” Iyi nsanganyamatsiko iributsa akamaro ko gukomeza gushyigikira no kurengera uburenganzira bw’abagore n’abakobwa, no guteza imbere uburinganire mu muryango no muri sosiyete muri rusange.

Padiri Valens Niragire, Umunyamabanga Mukuru wa Komisiyo y’Ubutabera n’Amahoro mu Nama y’Abepiskopi Gatolika mu Rwanda (CEJP Rwanda), yibukije abagore b' i Cyangugu mu Rwanda n’ab'i Bukavu muri Repubulika Iharanira Demokarasi ya Congo, ko mu gihe bizihiza Umunsi Mpuzamahanga w’Umugore bakwiye no kuzirikana bagenzi babo bo mu Karere k’Ibiyaga Bigari bagihura n’ingaruka z’intambara n’ihohoterwa rikorerwa uburenganzira bwabo bw’ibanze.

Mu ijambo rye kandi, Padiri Valens Niragire yagaragaje ko Umunsi Mpuzamahanga w’Umugore ari umwanya mwiza wo kongera kuzirikana agaciro k’umugore muri sosiyete, anashimangira uruhare rwe mu iterambere ry’umuryango n’igihugu.

Yagize ati “Uyu munsi uduha umwanya wo kongera kureba no guha agaciro nyakuri umugore. Umugore ntari inyuma y’umugabo; ahubwo baragendana kandi bagafatanya kugira ngo bagere ku ntsinzi.”

Yagize ati “Mu Karere k’Ibiyaga Bigari dutekereza ku bagore bose bahuye n’ingaruka z’intambara n’ihohoterwa rikorerwa uburenganzira bwabo bw’ibanze. Turazirikana by’umwihariko abagore bikoreye umutwaro w’ubuzima bonyine nyuma yo kubura abagabo babo cyangwa abana babo. Twibuka kandi abagore benshi babayeho mu bukene, bakoreshwa nabi cyangwa bagashyirwa ku ruhande, ku buryo uburenganzira bwabo buguma bubangamirwa.”

Yanashimiye by’umwihariko abagore bahangana n’ibibazo bikomeye by’ubuzima bwa buri munsi, cyane cyane abatakaje abagabo cyangwa abana babo, bagasigara bikoreye umutwaro w’inshingano z’umuryango bonyine.

Ibirori byo kwizihiza Umunsi Mpuzamahanga w’Abagore byabereye muri Diyosezi ya Cyangugu byabaye umwanya mwiza wo kwizihiza ibyo abagore bagezeho mu mibereho ya sosiyete, ariko binaba n’umwanya wo kongera gushimangira ubucuti, ubufatanye n’imibanire myiza hagati y’abaturage bo ku mpande zombi z’umupaka.