Papa Leo XIV yasabye Abanya-Argentine gukomera kuri Kristu

Muri uru ruzinduko, Papa Leo XIV yatanze ubutumwa bushishikariza abakirisitu gukomeza ubumwe na Yezu Kristu, guharanira ubutagatifu no kwamamaza Ivanjili, anibutsa ko Kiliziya ikwiye gukomeza kuba umuryango muzima urangwa n'ukwemera n'ubutumwa.

Yasabye abakiristu guharanira ubutagatifu no kwamamaza Ivanjili

Papa Leo XIV yahagurutse i Buenos Aires mbere gato ya saa mbiri za mu gitondo, yerekeza i Córdoba, umujyi uherereye mu gice cyo hagati muri Argentina.

Agezeyo, yatuye Misa ku kibuga cy'Ishuri rya Gisirikare ry'Indege, ku munsi mukuru wa Mutagatifu Leo Mukuru, Papa yabayeho mu mateka ya Kiliziya Gatolika akaba ari na we izina rye ry'ubupapa rishingiyeho.

Mu nyigisho yatanze muri iyo Misa, yagarutse ku batagatifu n'abahire bakomoka muri Argentine, by'umwihariko abaturutse mu gace ka Córdoba, avuga ko ari urugero rwiza abakirisitu bakwiye kwigiraho mu rugendo rugana ku butagatifu.

Yagize ati “Ni inshingano ishimishije gusohoza ubutumwa Nyagasani yahaye buri wese muri twe. Bavandimwe nkunda, twese twahamagariwe kuba abatagatifu. Iyi ni yo nshingano dufite hano ku isi; kugera ku bumwe busesuye n'Imana.”

Yakomeje asaba abakirisitu gufungura imitima yabo, bakemera kuyoborwa n'ubuntu bw'Imana, bagaharanira ubutagatifu kandi bakamamaza Inkuru nziza.

Ati “Nimufungure imitima yanyu, kandi ku bw'ubuntu bw'Imana, nimugende mube abatagatifu, Nimugende mwamamaze Ivanjili!”

Nyuma ya Misa, Papa kandi yahuye n'imbaga y'abantu yari yakoraniye hafi y'icumbi rya Arikiyepisikopi, arayishimira, anashishikariza Abanya-Argentine gushimira Imana impano y'ubumwe yabahaye no gukomeza kubusigasira.

Yifuza Kiliziya ifite urubyiruko rufite umuhamagaro n'imiryango y'iyogezabutumwa ikomeye

Mu rugendo rwe i Córdoba, Papa Leo XIV yanahuye n'abepiskopi, abapadiri, abadiyakoni, abihayimana, abari mu maseminari ndetse n'abakora ibikorwa by'iyogezabutumwa.

Iyi nama yabereye muri Katedrali ya Bikira Mariya Ajyanwa mu Ijuru, aho Papa yabasabye kongera kwisunga inkomoko y'umuhamagaro wabo no kuvugurura umubano bafitanye na Kristu.

Yabasabye kudatinya kurota Kiliziya ikomeye mu kwemera, ifite urubyiruko rwumva umuhamagaro wo gukorera Imana, paruwasi zirangwa n'ubuzima bw'iyobokamana ndetse n'abihayimana bakurikiza umurage mwiza w'abashinze imiryango yabo.

Yagize ati “Mutinyuke kureba Argentine muyirebera mu maso y'Imana! Nimuze mwiyumvishe urubyiruko rwibaza niba Kristu aruhamagara; paruwasi ari imiryango y'ukwemera ifite ubuzima; imiryango y'abihayimana ifite ubutwari bwo gukurikiza umurage w'abayishinze; amaseminari n'amavugururiro y'abihayimana aharirwa abatagatifu. Nimurote Kiliziya ikomeza kugaragaza imbaraga n'ubuzima, nk'uko Papa Fransisiko, yabibasabye.”

Nyuma yo gusoza ibikorwa bye i Córdoba, Papa Leo XIV yasubiye i Buenos Aires, yasoje umunsi ahurira n'urubyiruko mu ijoro ry'amasengesho ryabereye ahitwa Monumento de los Españoles, ryitabirwa n'urubyiruko rugera kuri miliyoni imwe.

Mu butumwa bwe, Papa yasabye urubyiruko guha Kristu ubuzima bwabo, arwibutsa ko bidatinda kugira ngo umuntu yakire umuhamagaro w'Imana wo kuba uwera. Yanabijeje ko Kiliziya ari umuryango rufitemo umwanya kandi rushobora guhora rwiyumvamo ko ruri mu rugo.

Yagize ati “Ntimukapfukamire ikintu icyo ari cyo cyose kidashobora kubaha ubuzima. Niba hari igihe mwaguye, nimuhaguruke. Ntimukemere ko ikintu cyangwa umuntu uwo ari we wese abambura ubwisanzure Imana yabahaye.”

Yakomeje abwira urubyiruko ko urukundo rwa Yezu Kristu rutagendera ku mateka y'umuntu cyangwa amakosa yakoze.

Ati “Uwo uri we wese, n'ibyo waba warakoze byose, Yezu Kristu arakuzi, Yezu Kristu aragukunda kandi ashaka ko uba hafi ye.”

Ubu butumwa bwagaragaje ko Papa ashyira imbere urubyiruko mu rugendo rwo kubaka Kiliziya ifite imbaraga, ishingiye ku kwemera, urukundo no guharanira ubutagatifu.