Guinée-Bissau : Papa Leo XIV yemeye ubwegure bwa Musenyeri José Lampra Cá wari Umwepiskopi wa Diyosezi ya Bissau

Inkuru y'ubwegure bw'uyu Musenyeri w'imyaka 62 yatangajwe n'Ibiro Ntaramakuru bya Vatikani bishinzwe itangazamakuru ku wa 7 Ugushyingo 2026. Yanatangarijwe mu kiganiro n'abanyamakuru cyabereye kuri Katedrali ya Bikira Mariya wa Candelária, muri Diyosezi ya Bissau.

Nk'uko bigaragazwa n'itangazo ry'Intumwa ya Papa muri Sénégal, ryasomewe abanyamakuru na n’Igisonga cy’Umwepiskopi wa Diyosezi ya Bissau, ibibazo by'ubuzima Musenyeri José Lampra Cá aherutse kugira ni byo byatumye afata icyemezo cyo kwegura, kugira ngo Diyosezi ibone undi Mushumba uyiyobora.

Muri Kiliziya Gatolika, Abepiskopi basanzwe basabwa gutanga ubwegure bw'inshingano zabo bagejeje ku myaka 75, ariko bashobora no kubutanga mbere y'iyo myaka mu gihe hari impamvu zikomeye, zirimo uburwayi cyangwa ibindi bibazo bikomeye bituma badakomeza inshingano zabo.

Musenyeri José Lampra Cá yavukiye muri Guinée-Bissau muri Mutarama 1964, ahabwa ubupadiri mu Kuboza 1997, ahabwa kuyobora Diyosezi ya Bissau mu Kuboza 2021. Yasimbuye Musenyeri José Câmnate na Bissign, wabaye Umwepiskopi wa mbere ukomoka muri Guinée-Bissau.

Mu butumwa bwashyizwe ahagaragara nyuma y'icyo cyemezo, Arikiyepiskopi Waldemar Stanisław Sommertag, Intumwa ya Papa muri Sénégal, yashimiye Musenyeri Lampra Cá kubera umurava, ubwitange n'umurimo wa gishumba yakoreye Kiliziya mu gihe yari ayoboye Diyosezi ya Bissau.Yamwijeje ko akomeje kumuba hafi kandi ko azakomeza kumusabira.

Musenyeri Víctor Luís Quematcha yagizwe Umushumba mushya wa Bissau

Mu cyemezo kimwe, Papa Leo XIV yagize Musenyeri Víctor Luís Quematcha, wari usanzwe ayobora Diyosezi ya Bafatá, Umushumba wa Diyosezi ya Bissau.

Uyu Mwepiskopi yavutse muri Mata 1967 i Cúmura, muri Diyosezi ya Bissau. Ni umupadiri wo mu muryango w'Abafransiskani b'Abakapusini (OFM Cap), yahawe ubupadiri muri Gicurasi 1998 i Nhoma muri Guinée-Bissau.

Mu mirimo yakoze amaze kuba umupadiri harimo kuba umuyobozi wungirije w'abari mu mahugurwa yo kwinjira mu muryango w'Abakapusini i Dapaong muri Togo, umuyobozi wa Seminari Nto ya Mutagatifu Kizito muri Guinée-Bissau, ndetse n'umwarimu wa Tewolojiya yerekeye imyitwarire ya gikristu (Moral Theology) muri Seminari Nkuru y'Abadiyosezi yitiriwe Musenyeri Settimo Arturo Ferrazetta i Bissau.

Yize Tewolojiya yerekeye imyitwarire ya gikristu mu Ishuri Rikuru rya Pontifical Alphonsian Academy i Roma, aho yakuye impamyabumenyi y'icyiciro cya gatatu cya kaminuza (Licence).

Yabaye kandi umuyobozi w'abafurere b'Abakapusini bari mu gihe cy'amasezerano y'agateganyo i Brá, ashinzwe ibikorwa by'uyu muryango muri Guinée-Bissau, Padiri Mukuru wa Katedrali ya Bikira Mariya wa Candelária i Bissau, ndetse n'umuyobozi w'ibitaro bivura indwara y'ibibembe bya Mal-de-Hansen i Cúmura.

Muri Werurwe 2025, Papa Francis yari yamugize Umushumba wa Diyosezi ya Bafatá.

Nk'uko byatangajwe, umuhango w’ibirori byo kwimikwa nk’umushumba muri Diyosezi ya Bissau uteganyijwe ku wa 15 Ugushyingo 2026, ukazabera kuri Katedrali ya Bikira Mariya wa Candelária.

Kugeza igihe Diyosezi ya Bafatá izagenerwa undi Mushumba mushya akinjira mu nshingano ze ku mugaragaro, Musenyeri Quematcha azakomeza kuyiyobora by'agateganyo nk'Umuyobozi wa Diyosezi washyizweho na Papa (Apostolic Administrator).

Mu butumwa bwe, Arikiyepiskopi Sommertag yavuze ko ishyirwaho rya Musenyeri Quematcha ari impamvu yo kwishimira no gushimira Imana kuri Kiliziya yose yo muri Guinée-Bissau.

Yavuze ko iki cyemezo gitangiza icyiciro gishya mu buzima bwa Diyosezi ya Bissau, asaba abakirisitu kwakira Umushumba wabo mushya mu kwemera, mu bumwe no mu cyizere.

Yagize ati “Turahamagarira abapadiri, abihayimana, abiyeguriye Imana n'abakirisitu bose gufasha Musenyeri Víctor Luís Quematcha binyuze mu masengesho no gukorana na we kivandimwe, kugira ngo asohoze ubutumwa bwe agamije kubaka ubumwe, ubusabane no kwamamaza Ivanjili.”

Yasabye kandi abakristu bose kugira uruhare mu kubaka Kiliziya irushaho kurangwa n'ubumwe, ubuvandimwe n'ubutumwa bw'iyogebutumwa.

Diyosezi ya Bissau yashinzwe muri Nzeri 1940. Ifite ubuso bwa kilometero kare 11.495, ikaba yari ifite abakirisitu Gatolika 172.575, nk'uko imibare yo mu mwaka wa 2018 ibigaragaza.