Abakirisitu basabwe gushyigikira abatuye ku Butaka Butagatifu
Mu gihe Kiliziya Gatolika yitegura kwizihiza Pasika, Ubuyobozi bw’Urwego rw’Abafaransisikani rushinzwe kurinda no kwita ku Butaka Butagatifu bwahamagariye abakirisitu bo hirya no hino ku isi gutanga umusanzu wihariye kuwa Gatanu Mutagatifu, mu rwego rwo gushyigikira abatuye muri ako karere no guteza imbere amahoro.
Ubu busabe bwagarutsweho na Fr. Francesco Lelpo, ushinzwe kuyobora uru rwego, ashimangira ko gutanga uwo musanzu ari ikimenyetso gikomeye cy’ubufatanye n’icyizere ku bahamya ukwemera aho amateka y’agakiza yabereye.
Yagize ati “Mu gihe dutekereza ku bubabare bwa Kristu wabambwe, turabasaba kwibuka mu masengesho yanyu no mu bikorwa by’urukundo abahamya Inkuru Nziza mu hantu h’icungurwa ryacu. Ubufatanye bwanyu ni ikimenyetso gifatika cy’icyizere n’amahoro.”
Uyu musanzu watangijwe ku busabe bwa Papa Paul VI mu 1974, ugamije gushimangira ubumwe hagati y’abakirisitu ku isi yose n’ahantu hatagatifu. Uyu munsi ukaba ukiri imwe mu misanzu y’ingenzi ya Kiliziya Gatolika.
Muri uyu mwaka, uwo musanzu uzatangwa ku wa 3 Mata, ukaba ari isoko nyamukuru ifasha ibikorwa bya Kiliziya mu Butaka Butagatifu, birimo kubungabunga inzibutso z’iyobokamana no gufasha imibereho y’abakirisitu bahatuye.
Inkunga ikusanywa inifashishwa mu mishinga irambye, cyane cyane mu burezi no kuzamura imibereho. Kugeza ubu, ifasha imiryango irenga 630 kubona aho kuba, igafasha amashuri 15 yigamo abanyeshuri basaga ibihumbi 12, ndetse ikanatanga akazi ku bantu barenga 1,100.
Abaturage bo mu bihugu bitandukanye birimo Yeruzalemu, Isiraheli, Palestine na Jordan ni bamwe mu bagenerwa ubu bufasha.
Ubutaka Butagatifu ni agace ko mu Burasirazuba bwo Hagati gafatwa nk’inkomoko y’ukwemera kwa gikristu, aho ubuzima bwa Yezu Kristu bwabereye; aho yavukiye, yigishirije, yabambwe, agapfa akanazuka. Nubwo ari ahantu h’agaciro gakomeye, abahatuye bahura n’ibibazo by’ubukene n’umutekano muke, ari na byo bituma Kiliziya isaba abakirisitu bo ku isi yose kubatera inkunga.
Ibitekerezo (0)
- Nta gitekerezo kirahaba. Ba uwa mbere utanga igitekerezo.
