Abakozi ba Diyosezi ya Kabgayi bizihije umunsi w’umurimo Myr Ntivuguruzwa abashimira ubwitange mu butumwa bwa Kiliziya

Ibi birori byabimburiwe n’Igitambo cya Misa cyabereye muri Bazilika Nto ya Kabgayi, kiyobowe na Nyiricyubahiro Musenyeri Balthazar Ntivuguruzwa. Misa yitabiriwe n’abakozi bakorera muri serivisi zitandukanye, komisiyo n’ibigo binyuranye bya Diyosezi ya Kabgayi, hamwe n’imbaga y’Abasaserdoti baje kwifatanya na bo muri uyu munsi wihariye. Hari kandi n’abahagarariye inzego bwite za Leta mu Karere ka Muhanga.

Mu nyigisho yatanzwe muri Misa, Musenyeri Ntivuguruzwa yagarutse ku butumwa bwa Mutagatifu Yosefu nk’urugero rw’umukozi urangwa n’ubudahemuka, ukwiyoroshya no kwitangira Imana n’abantu. Yibukije abitabiriye ko umurimo atari uburyo bwo gushaka imibereho gusa, ahubwo ari umuhamagaro n’ubutumwa umuntu ahabwa n’Imana.

Yagize ati “Umurimo dukora ni umuhamagaro n’inshingano Imana yaduhaye, yo yaturemye mu ishusho yayo. Gukora ni ugukomeza igikorwa Imana yatangiye igihe yaremaga isi n’ibiyirimo.”

Yakomeje asobanura ko umurimo ufasha umuntu kubaka isi nziza no kwiteza imbere, ukamuha ibimutunga ndetse n’ubushobozi bwo gufasha abandi no gukora ibikorwa by’urukundo. Yongeyeho ko umurimo uhuza abantu, ukubaka ubuvandimwe n’ubufatanye, kandi ukibutsa abantu ko babana basabana kandi bafashanya.

Musenyeri Ntivuguruzwa yashimiye by’umwihariko abakozi ba Diyosezi ya Kabgayi ku bwitange bagaragaza mu nshingano zabo za buri munsi, nubwo hari imirimo imwe n’imwe idakunze kugaragara cyane mu ruhame.

Yagize ati “Ndabashimira umurimo wanyu n’ubwo waba utagaragara, kuko ni ingenzi cyane mu gufasha Kiliziya gusohoza ubutumwa bwayo bwo kwamamaza Inkuru Nziza.”

Yanabashishikarije gufata umurimo nk’umuhamagaro, aho ibyo bakora byose babihindura isengesho, nk’uko byagarutsweho na Mutagatifu Yohani Pawulo wa II, wavuze ko umurimo ufasha umuntu kuzuza kamere ye no kugera ku nshingano Imana yamuhamagariye.

Uyu munsi wabereye abakozi ba Diyosezi ya Kabgayi umwanya wo gushimira Imana ku mpano y’umurimo, no kongera kuzirikana agaciro kawo mu buzima bw’umuntu no mu iterambere rya Kiliziya n’iry’igihugu muri rusange