Abakristu ba Arkidiyosezi ya Bukavu muri DRC bifatanyije n’aba Diyosezi Gatolika ya Cyangugu mu Rwanda gutera ikiti cy’amahoro kuri Centre Ibanga ry’Amahoro

Icyo gikorwa cyabimburiwe n’igitambo cya Misa cyaturiwe muri Chapelle nto ya Centre Ibanga ry’Amahoro, kiyoborwa na Mgr Ignace Kabera, igisonga cy’Umwepiskopi wa Diyosezi Gatolika ya Cyangugu.

Nyuma y’igitambo cya Misa, abaturutse muri Komisiyo y’Ubutabera n’Amahoro ya Arkidiyosezi ya Bukavu bahuriye n’aba Diyosezi ya Cyangugu mu Rwanda mu gikorwa cyo gutera igiti cy’amahoro, igikorwa cyabaye ikimenyetso cy’ubufatanye mu gusakaza amahoro mu karere k’Ibiyaga bigari.

Mgr Edouard Sinayobye, Umwepiskopi wa Diyosezi Gatolika ya Cyangugu wifatanyije nabo muri iki gikorwa, yashimangiye ko gutera igiti cy’amahoro ari ikimenyetso cy’uko amahoro azakwirakwira mu karere uko amashami yacyo azashibuka impande zose.

Muri ubwo butumwa, Mgr Sinayobye yagaragaje ibyishimo byo guhura n’abavandimwe b’abakristu baturutse Bukavu,ashimira abashinzwe komisiyo y’Ubutabera n’Amahoro ya Cyangugu ku buryo bw’urugwiro babakiranye bagenzi babo b'i Bukavu.

Ati” "Nishimiye kubasanga hano ku Ibanga ry’Amahoro. Ndashimira abavandimwe b’abapadiri n’abandi bashinzwe komisiyo y’ubutabera n’amahoro ya Cyangugu bakoze ibishoboka byose kugira ngo tubakire mu buryo bw’urugwiro. Muri uyu mwanya turi kuvuga amahoro tunatera igiti cy’amahoro, kandi dusaba amahoro ku isi no muri aka karere dutuyemo. “Iki ni igiti cy’amahoro nk’ikimenyetso gihagarariye amadiyosezi yacu. Mubwire abakuru ba diyosezi yanyu, umuvandimwe Musenyeri wa Bukavu, uhari hano mu buryo bw’ukwemera, ko turi kumwe nk’abagize umubiri umwe, aho we ahagarariye imbaga y’abakristu ba Bukavu, natwe duhagarariye abakristu ba Cyangugu. Iki giti twagiteye nk’ikimenyetso kizakura kandi kikagira amashami ku buryo buri gihe kizatwibutsa ko aka gace dutuye kagomba kugira amahoro arambye.”

Yibukije abari aho ko ubutumwa bwa Yezu “nimugire amahoro” buvuga ko buri wese agomba kuba intumwa y’amahoro. Yavuze ko amahoro arenga imbibi, amoko, ndetse n’amateka y’amakimbirane ashobora gutandukanya abantu. Yongeyeho ko amahoro agomba kwemezwa mu bikorwa bifatika, mu mishyikirano, mu bufatanye bw’abaturage ndetse no mu gusabana ku mpande zose.

Ku ruhande rwa Arkidiyosezi ya Bukavu, abari bitabiriye icyo gikorwa, barimo Telesphore Mugisha Buhendwa, umukozi wa komisiyo y’ubutabera n’amahoro, yagaragaje ibyishimo byo guhura n’abavandimwe babo bo muri diyosezi ya Cyangugu. Mugisho yavuze ko gutera igiti cy’amahoro ari ikimenyetso cy’ubufatanye n’icyizere ko abaturiye imipaka bazashobora kubana mu mahoro, kandi ko amahoro arambye aturuka ku bufatanye no ku kubahana.

Jusle Musengo, ukora muri Komisiyo y’Ubutabera n’Amahoro ya Arkidiyosezi ya Bukavu mu mushinga wo kurwanya ihohoterwa rishingiye ku gitsina, yavuze ko yagize umutuzo kandi yakiriwe neza n’abavandimwe b’abanyarwanda. Yongeyeho ko ubutumwa bwe nk’umukristu ari ugusakaza amahoro, agashishikariza abakongomani n’abanyarwanda gusangira ibikorwa by’ubukungu, siporo n’umuco bigamije guteza imbere amahoro mu karere.

Yagize ati"Ndumva mfite umutuzo kandi nakiriwe neza n’abavandimwe bacu b’abanyarwanda. Urugero n’uko dushobora gutegura natwe ibikorwa ndangamuco nka siporo bihuriza hamwe abakongomani n’abanyarwanda, kugira ngo dukomeze gusakaza ubutumwa bw’amahoro n’ubwumvikane."

Iki gikorwa cyo gutera igiti cy’amahoro kuri Centre Ibanga ry’Amahoro kigaragaza ko hari ubufatanye hagati y’amadiyosezi aturanye mu Rwanda no muri RDC kandi bwita ku guhumuriza abaturage no kububakira amahoro arambye. By’umwihariko, Mgr Sinayobye yibukije abakitabiriye ko gusabana, gusurana no gukora ibikorwa bihuriza hamwe abaturage b’ibihugu byombi bigaragaza ko haboneka amahoro ashingiye ku kwizerana, ku bufatanye no ku bwubahane.