Abanyamuryango ba Kolping mu Rwanda bifatanyije n’ab’isi yose mu rugendo rwo gusabira Padiri Adolph Kolping kugirwa umutagatifu

Iri sengesho rusange ryahujwe n’igitambo cya Misa cyayobowe na Padiri Festus Nzeyimana, omoniye w’umuryango wa Kolping mu Rwanda. Mu nyigisho ye, Padiri Festus yibukije uruhare rukomeye rw’uyu muhire Adolph Kolping mu guteza imbere abantu ku buryo bwuzuye—ku mubiri no kuri roho—binyuze mu mahame ya Kiliziya Gatolika.

Padiri Festus,yanagarutse ku nkingi eshatu z’uyu muryango ari zo: Senga, Iga, Kora, ashishikariza abanyamuryango kubigira inkingi z’ubuzima bwabo bwa buri munsi.

Yagize ati: “Adolph Kolping yabaye umushumba mwiza uharanira icyubahiro cya buri muntu, by’umwihariko abakene, abatagira ijambo muri sosiyete, n’urubyiruko rutishoboye. Yifuzaga ko abantu babaho mu buryo bubaha agaciro n’icyubahiro, akabikora mu izina ry’ukwemera. Natwe duhamagariwe gukiza ibikomere by’abari mu bukene, gufasha imiryango isenyuka, gufasha urubyiruko rutagira icyerekezo.”

Umuryango wa Kolping washinzwe na Padiri Adolph Kolping, w’Umudage, wavukitse ku ya 8 Ukuboza 1813, yitaba Imana ku ya 4 Ukuboza 1865. Yatangiye uyu muryango awise “Journey Men’s Association”, ugamije gutanga ubufasha ku rubyiruko rw’abanyabukorikori bari mu bibazo by’imibereho n’amahame.

Nyuma y’urupfu rwe, uyu muryango wahindutse International Kolping Society, ukomeza gukura kugeza uba umuryango mpuzamahanga ubarizwa ku migabane yose y’isi, uretse muri Ositaraliya.

Mu mwaka wa 1991, Papa Yohani Pawulo II yashyize Padiri Adolph Kolping mu rwego rw’abahire. Kuri ubu, abakristu batandukanye hirya no hino ku isi barakomeza gusenga no gusaba ko yashyirwa mu rwego rw’abatagatifu, bikozwe binyuze mu gusaba ibimenyetso bifatika bigaragaza ubutagatifu bwe nk’uko Kiliziya ibisaba.

Umuryango wa Kolping wageze mu Rwanda ku wa 19 Ukuboza 1999, utangirana n’ubukangurambaga bwo kwigisha no guteza imbere ubuzima bw’abantu bushingiye ku mahame ya gikirisitu. Uyu muryango wahise ugaragaza umwihariko mu miryango ya Agisiyo Gatolika, ushyira imbere iterambere ryuzuye ry’umuntu—ku mubiri no kuri roho—binyuze mu nkingi eshatu: gusenga, kwiga no gukora.

Mu gusoza urwo rugendo nyobokamana, abanyamuryango ba Kolping basabwe kumva ko ubutumwa bwa Padiri Kolping bukiri ngombwa cyane muri iki gihe, aho imibereho y’abantu ihura n’ibibazo by’ubukene, ubwigunge, igitugu n’icyuho cy’ubumenyi. Basabwe gukomeza gusenga ngo Kiliziya ihamye ubutagatifu bwa Adolph Kolping, ariko bakanemera kumwigiraho no kumukurikiza mu mibereho yabo.

Padiri Festus yagize ati’’Bavandimwe, dusabire umuhire Adolph KOLPING, kandi twemere kumwigiraho. Uyu munsi twisunze mutagatifu Luka, umwanditsi w'Ivanjli, turasaba ko kiliziya yashyira Kolping mu rwego rw'abatagatifu. Ibyo byose kugira ngo Kiliziya ibikore ikeneye gihamya, ikineye ibimenyetso kandi bifatika. Dusabe Imana kugira ngo ikoresheje umuryango wayo Kiliziya iduhe ibimenyetso bigaragarazi umuryango w'Imana ko umuhire mukuru wacu yatashye mu ijuru. Icyo tusabwa bavandimwe n’uko natwe imana yaduha kwitangira abandi nk'uko uwo dusabira yabigenjje.’’

Uyu munsi, Kolping mu Rwanda ubarizwamo abanyamuryango batari bake kuko basaga ibihumbi 8, ukorera mu madiyosezi yose, ugashyira imbere ibikorwa bigamije gufasha imiryango kugira imibereho myiza, guteza imbere urubyiruko, kongerera abantu ubumenyi no kubashishikariza kugira uruhare mu iterambere ry’igihugu n’iry’isi yose.

Padiri Festus yibukije ko ibikorwa byose bya Kolping byubakiye ku kwizera no gukunda Imana n’abantu. Yagize ati: “Senga: kuko nta gikorwa cyiza kibaho hatari isengesho. Iga: kuko ubumenyi butanga icyerekezo n’icyubahiro. Kora: kuko ukwemera n'ubumenyi bisaba gushyirwa mu bikorwa.” Yanongeyeho ko Kolping yari umusaseridoti w’icyerekezo, ushishikariza abantu kuba intangarugero mu muryango, mu mirimo no mu buzima bw’ukwemera.

Buri munyamuryango yasabwe kuba intumwa y’impinduka aho ari hose, agaharanira gusiga ahantu asanze neza kurushaho. Kandi nk’uko Padiri Kolping yabigenje, abanyamuryango ba Kolping bagomba kurangwa no guharanira iterambere rishingiye ku butabera, ukwemera n’urukundo.

Ubutumwa bw’uyu munsi bwasoje bugira buti“Duharanire ubumenyi nka Kolping, duharanire gusenga nka Kolping, duharanire gukora nka Kolping. Byose tubikore ku buntu bw’Imana no ku nyungu z’abayo. Kugira ngo Kolping agire impinduka muri twe, ni uko natwe twaba nka we.”