Abanyeshuri 27 ba College Sainte Marie Reine Kabgayi bakiriye amasakaramentu y'ibanze ku munsi mukuru w'ishuri

Ibirori byabimburiwe n’Igitambo cya Misa cyayobowe na Myr Jean de Dieu Hodari, Igisonga cy’Umwepiskopi wa Diyosezi ya Kabgayi. Muri iyo Misa, abanyeshuri 27 bahawe amasakaramentu y’ibanze arimo Batisimu, Ukaristiya ya mbere ndetse n’Ugukomezwa, intambwe ikomeye mu rugendo rwabo rw’ukwemera.

Muri uyu munsi mukuru, mu butumwa bwatanzwe bwahujwe n’izina ry’ishuri ryeguriwe Bikira Mariya Umwamikazi (Marie Reine), bituma ubutumwa bwa Myr Hodari bwibanda ku ruhare rwa Bikira Mariya mu kuyobora abakristu bose kuri Yezu Kristu, ari na we soko y'ubuzima bw’abemera.

Mu nyigisho ye, Myr Hodari yagarutse ku murongo fatizo w’ubutumwa bwa Bikira Mariya, agaragaza ko icyubahiro ahabwa kitigenga kuri Kristu ahubwo kimuganaho.

Yagize ati“Nta kindi kigenza Bikira Mariya uretse ko tumenya umwana we Yezu Kristu. Nitumumenya, nitumwumvira, nitumuhimbaza, nitumushimisha, nawe uwo mubyeyi Bikira Mariya aba yishimye.”

Yasobanuye ko kubaha Bikira Mariya bidakuraho umwanya wa Kristu ahubwo ko ari we utuma abayoboke be barushaho kumenya no gukunda Umukiza.Ku ishuri ryitiriwe Bikara Mariya Umwamikazi (Marie Reine), iri jambo ryumvikanye nk’umuhamagaro wo gukurikira urugero rwa Bikira Mariya, wigishaga abantu gukora icyo Kristu ababwira.

Aho ubutumwa bwe bwibanze cyane ni ku Isakaramentu Ritagatifu ry’Ukaristiya, Kiliziya yemera ko ririmo Yezu Kristu ubwe, nubwo amaso y’umubiri abona gusa umugati na divayi.

Musenyeri Hodari yibukije abanyeshuri n’abakristu bose ko ukwemera ari ryo rembo ryinjiza umuntu muri iri yobera.

Yagize ati“Iyo bavuze yuko Yezu ari mu Isakaramentu ry’Ukaristiya we wese kandi ko ari ukuri ari umubiri we, amaraso ye, ubugingo bwe nk’Imana, akaba arimo igisa nk’umugati, akagati gatoya ndetse unakarebye ntabwo kakumara inzara y’umubiri. Iyo ubihuje rero n’iryo yobera ry’ukwemera biravunana.”

Aha yagaragaje ikibazo cyakunze kubaho kuva mu gihe cya Kristu kugeza n’ubu: kwemera ko Imana ishobora kwigaragaza mu buryo bworoheje umuntu ashobora gusuzugura.

Yahise yifashisha urugero rwo mu Ivanjili aho abantu benshi batashoboye kwakira inyigisho ya Yezu ku mugati w’ubugingo bakamureka.Ati “Hari abarimo bumva Yezu Kristu ababwira ko azabaha umubiri we ukaba ifunguro, akabaha amaraso ye akaba ikinyobwa, barahaguruka barigendera.”

Ariko yibukije ko Petero yahisemo kuguma kuri Kristu, akavuga ati“Twajya hehe?”

Ku bwe, uwo ni wo mwanzuro umukristu wese asabwa gufata imbere y’amayobera y’ukwemera: kutigendera nubwo atasobanukiwe byose.

Mu gusesengura amasakaramentu y’ibanze yahawe abanyeshuri 27, Myr Hodari yagaragaje ko ibikorwa by’Imana bikorera mu bimenyetso byoroheje ariko bikazana impinduka zikomeye mu buzima bw’umuntu.

Yibukije ko muri Batisimu hakoreshejwe amazi, amavuta, urumuri n’igitambaro, nyamara ibyo bimenyetso bigahindura umuntu akaba ikiremwa gishya muri Kristu.

Yagize ati“Hirya y’ayo mazi, ayo mavuta, urumuri n’igitambaro kera hari ikiganza k’Imana kirimo gukora ibitagaragara.”

Ni ubutumwa bwari bugenewe by’umwihariko abanyeshuri bahawe ayo masakaramentu, kugira ngo bamenye ko icyo bahawe kirenze umuhango wabereye imbere y’imbaga, ahubwo ko ari ubuntu bw’Imana bwatangiye gukora muri bo.

Mu bice by’ingenzi by’ubutumwa bwe, Musenyeri Hodari yagaragaje imyumvire idakwiye bamwe bagira kuri Ukaristiya, bibwira ko guhaza cyangwa kwakira Yezu bigomba guhita bihindura ibintu byose mu buzima bwabo.

Yagize ati“Ukaristiya rero iyo tuvuze ngo Yezu arimo ukamuhabwa hanyuma ukagera aho wari ugiye ugasanga ntacyahindutse, ugasanga ubuzima bwawe ntacyo buhindukaho, ugasanga ingorane wari ufite iracyahari, ukibaza uti ‘Yezu undimo ari he, arimo gukora iki?’”

Yasobanuye ko Imana ikora mu buryo butandukanye n’ubw’abantu.

Ati “Kristu ntaza nk’umunyabubasha ushaka gukora ibitangaza bihita bigaragara buri gihe, ahubwo akorera mu mutima no mu rugendo rw’ubuzima bw’umuntu, akamuyobora ku gakiza.”

Ni yo mpamvu umukristu asabwa kwiringira Imana no mu bihe adahita abona imbuto z’ibyo yayisabye.

Musenyeri Hodari yanagarutse ku gaciro ko kuramya Isakaramentu Ritagatifu, agaragaza ko atari umuhango ushingiye gusa ku byo amaso abona.Yagize ati“Iyo bari gutamabagiza Isakaramentu burya tuba turebesha amaso ariko amaso akarenga ibyo areba akoresheje ukwemera.”

Yongeyeho ko kuramya Ukaristiya ari uburyo bwo kwegera Kristu no kumwemerera gukorera mu mutima w’umuntu, kabone n’iyo yaba atumva cyangwa atabona ibimenyetso bidasanzwe.

Ku ishuri rya College Sainte Marie Reine Kabgayi, uyu munsi mukuru wabaye umwanya wo guhuza inshingano ebyiri z’ingenzi: gutanga uburezi bufite ireme no kurera abanyeshuri mu ndangagaciro z’ukwemera kwa gikristu.

Kuba abanyeshuri 27 bahawe Batisimu, Ukaristiya ya mbere n’Ugukomezwa byagaragaje ko ishuri ritita gusa ku mitsindire y’amasomo, ahubwo rinita ku mikurire y’umuntu wese mu mubiri, mu bwenge no mu buzima bwa roho.

Mu gusoza ubutumwa bwe, Myr Hodari yasabye abanyeshuri, abarezi n’ababyeyi gukomeza gusabira ishuri riragijwe Bikira Mariya, kugira ngo rikomeze kurera abakristu bafite ukwemera gukomeye kandi babasha kubera abandi urumuri.

Yagize ati“Uyu munsi rero tumusabe adusabire kwemera kurushaho Ukaristiya, kumuhabwa Yezu uko bikwiye, aturere tube abakristu nyabo bazi amasakaramentu bahabwa, bayemera, bayakunda kandi bazi imbuto nziza zivamo.”

Yasoje asaba ko abakiriye Kristu mu buzima bwabo baba abahamya be aho bari hose, ku buryo abo babana na bo babona ko bahuye na Yezu Kristu wabakunze kugeza aho abahaye umubiri we n’amaraso ye kugira ngo abageze ku bugingo bw’iteka.

Uyu munsi mukuru wa College Sainte Marie Reine Kabgayi wabaye umwanya wo gushimangira ko uburezi Gatolika budatandukanijwe n’iyogezabutumwa, ahubwo ko bugamije kurera umuntu wuzuye, ushoboye kuba umunyeshuri mwiza, umukristu mwiza ndetse n’umuturage mwiza urangwa n’indangagaciro zishingiye kuri Kristu.