Abepiskopi ba Sudani y’Epfo bababajwe n’imvugo z’abayobozi bakuru b’ingabo zishishikariza ubugizi bwa nabi

Mu butumwa yagejeje kuri Vatican News kuri uyu wa Kabiri tariki ya 27 Mutarama 2026, Karidinali Ameyu yagaragaje impungenge n’agahinda Abepiskopi ba Sudani y’Epfo batewe n’amagambo yavuzwe n’umuyobozi mukuru mu nzego z’igisirikare, aho yasabye ingabo kudasiga ubuzima na bumwe, ibintu Abepiskopi bafata nk’ihamagarira Jenoside.

Karidinali Ameyu yagize ati “Guhamagarira ihohoterwa ridatoranya rikorerwa abasivili bo muri Jonglei, no gutegeka ingabo kudasiga n’umwe, ni uguhamagarira Jenoside ku mugaragaro. Turasaba ingabo zose kutumvira amabwiriza ayo ari yo yose yashyira mu kaga ubuzima bw’abasivili b’inzirakarengane kandi agatera amacakubiri mu baturage.”

N’ubwo mu mwaka wa 2018 hashyizweho amasezerano agamije kugarura amahoro no kubaka Guverinoma y’Ubumwe bw’Inzibacyuho, Sudani y’Epfo iracyahura n’imirwano n’umutekano muke mu bice bitandukanye by’igihugu.

Raporo z’Umuryango w’Abibumbye zigaragaza ko imirwano iherutse mu Ntara ya Jonglei igeze ku rwego rutigeze ruboneka kuva mu mwaka wa 2017. Iyi ntara, iherereye mu Burasirazuba bwa Sudani y’Epfo ku mupaka wa Etiyopiya, ikomeje kuba indiri y’umutekano muke bitewe n’imirwano ihanganishije Ingabo za Leta (SSPDF) n’abarwanyi biyemeje gukurikira umutwe wa SPLA-In-Opposition.

Muri iki cyumweru, ubuyobozi bw’ingabo za Sudani y’Epfo bwategetse abasivili, abakozi b’Umuryango w’Abibumbye ndetse n’imiryango itari iya Leta (NGOs) kuva mu turere dutatu twa Jonglei, mu rwego rwo kwitegura igikorwa cya gisirikare kigamije kurwanya ingabo zibarwanya.

Karidinali Ameyu yasabye abayobozi bose bagize Guverinoma y’Ubumwe n’abandi batashyize umukono ku masezerano mashya y’amahoro kureka inzira y’intambara bagahitamo ibiganiro.

Yagize ati “Turahamagarira abayobozi bose guhagarika intambara no guhitamo inzira y’ibiganiro. Nimwumve abo muyobora. Abaturage si umutungo ni abantu bafite agaciro. Bagomba kumvwa ububabare bwabo, inzara bafite y’amahoro, n’icyifuzo cyo kubaho mu bwisanzure.”

Karidinali Ameyu yanibukije urugendo rwa Papa Fransisko muri Sudani y’Epfo muri Gashyantare 2023, aho yakomeje gusaba abayobozi b’igihugu guhagarika amaraso amenwa no kureka amacakubiri ashingiye ku moko, bagaharanira ubumwe bw’igihugu.

Yanagaragaje ko kandi Papa Fransisko, mu butumwa bwe, yashimangiye ko amahoro nyayo adashobora kuboneka igihe abaturage bakomeje gutandukanywa n’ivangura n’inyungu za politiki.

Karidinali Ameyu yaboneyeho gusaba umuryango mpuzamahanga kudacika intege mu gufasha Sudani y’Epfo, agaragaza ko abaturage b’igihugu bashimira uruhare n’ubufatanye bagaragarizwa.

Ati “Ku bafatanyabikorwa bacu, imiryango yo mu karere n’umuryango mpuzamahanga, abaturage ba Sudani y’Epfo barabizi neza ko mwabaye inshuti mu bikorwa. Turabasaba kudacogora mu gukora icyiza ku bw’abaturage bababaye.”

Karidinali Stephen Ameyu Martin Mulla yasoje ahamagarira Abihayimana, abiyeguriye Imana n’abantu bose bafite umutima mwiza gushyira imbere isengesho ryo gusabira amahoro igihugu, agira ati “Ndasaba Kiliziya yose n’abantu bose bafite umutima w’impuhwe kwitangira amasengesho asabira amahoro arambye muri Sudani y’Epfo.”