Abepiskopi bo muri Antilles batabarije abaturage ba Cuba bari mu bibazo bikomeye

Mu itangazo ryashyizweho umukono na Perezida wa AEC, Nyiricyubahiro Myr Charles Jason Gordon, Arikiyepisikopi wa Port of Spain, hamwe n’izindi nzego z’ubuyobozi bw’iyi nama, Abepiskopi bagaragaje ko bahangayikishijwe n’ingaruka z’ibura rikabije rya lisansi n’ibikoresho by’ibanze. Ibi byatumye habaho ibura ry’amashanyarazi rikabije, guhagarara kwa serivisi z’amazi, ihungabana ry’ibikorwa by’amavuriro, ndetse n’icyuho gikomeye mu kubona ibiribwa n’ibindi bikenerwa mu buzima bwa buri munsi.

Abepiskopi bavuga ko ibi bibazo byiyongera ku mibabaro abaturage ba Cuba bari basanzwe bafite, bikaba bishobora kurushaho guteza umutekano muke mu mibereho y’abaturage, cyane cyane imiryango, abana, abageze mu zabukuru n’abandi batishoboye.

Bagize bati “Cuba ikeneye impinduka n’ivugurura byiza, ariko ntikeneye kongererwa ububabare. Nta nubwo abaturage bayo bakwiye kumva ko basigaye bonyine mu bihe by’amage.” Bibukije ko nk’abagize umuryango umwe w’ikiremwamuntu kandi bahujwe no kuba Umubiri umwe wa Kristu, Kiliziya idashobora guceceka igihe icyubahiro cy’umuntu gishyizwe mu kaga, cyangwa igihe kubona ibiribwa, ubuvuzi n’ibindi by’ibanze bigenda birushaho kugorana.

Inama y’Abepiskopi bo muri Antilles yanashimangiye amahame agenga ubutabazi: ubumuntu, kutarobanura, kutabogama no kwigenga. Yagaragaje ko ubufasha bugomba kugera ku babukeneye kurusha abandi, budahinduwe igikoresho cya politiki cyangwa ngo butindwe kubera inyungu zindi zitari iz’ubutabazi.

Abepiskopi bavuze kandi ko bashyigikiye amajwi y’abayobozi batandukanye bo mu karere ka Karayibe basabye ko politiki zishobora kurushaho guteza ububabare abaturage zisubirwamo byihutirwa. Bibukije ko ibihugu byo muri aka karere bihuriye ku mateka n’icyerekezo, bityo ko iyo igihugu kimwe kibabaye, n’akarere kose kabigiramo uruhare.

Mu gusoza itangazo ryabo, AEC yahamagariye abakirisitu bose bo mu karere gusabira abaturage ba Cuba, kugira ngo haboneke ubutabazi bwihuse, abayobozi bagire ubwenge n’ubushishozi, kandi haboneke inzira iganisha ku mahoro, ubutabera n’ubwiyunge. Baninginze ko ukwishyira hamwe gusimbura ukutita ku bandi, kandi urukundo rukarenga amacakubiri.

Basabye kandi ubuvugizi bwa Bikira Mariya, Nyina w’Urukundo rwa El Cobre, Umurinzi wa Cuba, kugira ngo akomeze guherekeza abana b’iki gihugu mu kwizera, cyane cyane muri ibi bihe bikomeye barimo kunyuramo.

Inama y’Abepiskopi bo mu karere ka Antilles (Antilles Episcopal Conference – AEC) ni urwego ruhuza Abepiskopi ba Kiliziya Gatolika bo mu bihugu n’intara byo muri Karayibe, Amerika yo Hagati no mu majyaruguru ya Amerika y’Epfo byahoze ari ubukoloni bw’u Bwongereza, u Buholandi n’u Bufaransa (uretse Haiti). Igizwe na Arikidiyosezi 5, Diyosezi 14 n’ahandi hantu habiri hihariye h’iyogezabutumwa (missions sui iuris), bikorera mu bihugu 13 byigenga, intara 6 z’u Bwongereza zo hakurya y’inyanja, n’ibice 3 by’u Bufaransa, ibihugu 3 bigize Ubwami bw’u Buholandi ndetse na komini 3 zo mu Buholandi ubwabwo.