Abepiskopi Gatolika  bo mu Burasirazuba bwa Afurika Barahumuriza Tanzania nyuma y’ibihe Bitoroshye Yanyuzemo mu Matora

Uyu muryango ugizwe n’ Inama z’Abepiskopi Gatolika bo mu bihugu umunani byo mu Burasirazuba bwa Afurika, ari byo: Eritrea, Etiyopiya, Kenya, Malawi, Sudani y'Epfo, Sudani, Tanzaniya, Uganda na Zambiya. Djibouti na Somaliya bo ni abanyamuryango b’afatanyabikorwa

Mu itangazo ryashyizwe ahagaragara ku wa Gatatu, tariki ya 12 Ugushyingo, ryohererejwe Perezida w’Inama y’Abepiskopi Gatolika muri Tanzania, Musenyeri Wolfgang Pisa, Perezida wa AMECEA, Musenyeri Charles Sampa Kasonde, yahumurije abanya- Tanzania.

Mge Kasonde yagize ati"Mbandikiye mbagezaho ubutumwa bw’ihumure no kwifatanya namwe, bavandimwe bo mu Nama y’Abepiskopi Gatolika  ba Tanzania, imiryango yabuze ababo, abakomeretse, ababuriwe irengero n’abaturage ba Tanzania muri ibyo bihe bikomeye kandi bibabaje by’amateka y’igihugu cyanyu.”

Yakomeje agira ati: “Ibyabaye nyuma y’amatora yo ku wa 29 Ukwakira 2025 byaduteye agahinda kenshi. Imyigaragambyo yakurikiye ayo matora yabaye intandaro y’imfu z’abantu, abandi benshi barakomereka no guhangayika gukabije kw’imiryango yagizwho ingaruka.”

Musenyeri Kasonde yavuze ko Abepiskopi bo mu bihugu icyenda bigize AMECEA “bari ku ruhande rw’abatanzania  mu kunamira ababuze ubuzima, kandi bizeye ko Uhoraho azakira roho zabo mu rukundo n’imbabazi ze zidashira.”

Yongeraho ati“Turifashisha amasengesho yacu ku bakomeje guhangana n’ingaruka z’aya makuba— yaba ku mubiri cyangwa ku mutima. Dusengera kandi n’abahungabanyijwe n’ibyabaye, kugira ngo bongere bagire ituze n’icyizere.”

Imyigaragambyo yatangiye gukwirakwira mu bice bitandukanye bya Tanzania nyuma y’amatora yo  ku wa 29 Ukwakira, ubwo abaturage bigaragambyaga kubera ko amatora ngo atari anyuze mu mucyo nk’uko imwe mu m=miryango mpuzamahanga yakurikiranye ayo  matora yabyemeje—by’umwihariko nyuma yo gukumira bamwe mu banyepolitiki batavuga rumwe n’ubutegetsi.

Amakuru atangazwa n’inzego zitandukanye agaragaza ko nibura abantu 240 bakurikiranyweho icyaha cy’ugukora ibikorwa bigamije guhungabanya igihugu (treason), mu gihe imiryango iharanira uburenganzira bwa muntu ivuga ko abantu ibihumbi bishwe mu mvururu zakurikiye amatora, ndetse hakaba n’impungenge ko bamwe bashobora kuba barajyanwe mu bihuru bakahashyingurwa mu buryo bw’amayobera.

Mu butumwa bwe , Perezida wa AMECEA yagize ati: “Tanzania yahoze imenyerewe nk’ igihugu cy’intangarugero mu mahoro, ubumwe n’ubwiyunge. Ibi bihe bikomeye bisa n’ibihungabanya uwo murage mwiza n’ubuvandimwe bwakundaga kuranga Abatanzaniya.”

Yakomeje agira ati“Twe nk’abashumba bo mu karere, turashaka kubizeza ko tubari inyuma mu buryo budahinduka. Iyo umwe muri twe ababara, natwe twese turababara. Mukomeze kuba ijwi rihamya ukuri, ubutabera n’ubwiyunge mu gihugu cyanyu. Mukomeze kuba abashumba batanga ihumure ku bababaye n’abavugira abatagira kivugira. Mukomeze kuba umucyo w’icyizere mu bihe by’umwijima.”

Yarangije avuga ati“Umuryango wose wa AMECEA wifatanyije namwe, urabasengera kandi urabashyigikiye muri ubu butumwa bwanyu bwo kuyobora umuryango w’Imana muri ibi bihe bitoroshye

Musenyeri Kasonde asoza asaba Imana gukomeza Abatanzaniya bose. Ati “Imana ibahe gukomera, kandi Roho Mutagatifu ayobore Abatanzaniya bose mu nzira z’amahoro, ubutabera n’ubwiyunge.”