Abepiskopi Gatolika bo mu Rwanda batangiye Inteko Rusange ya 176 izamara iminsi ine

Iyi Nteko Rusange yitabiriwe n’Abepiskopi baturutse mu madiyosezi yose agize Kiliziya Gatolika mu Rwanda, ikaba ari urubuga rwo kungurana ibitekerezo ku mibereho rusange ya Kiliziya n’uko ikomeza gusohoza ubutumwa bwayo mu nzego zitandukanye.

Padiri Kayisabe Vedaste, Umunyamabanga Mukuru w’Inama y’Abepiskopi Gatolika mu Rwanda, yasobanuye ko iyi nama iri muri enye zikorwa buri mwaka.

Ati “Ni inama isanzwe ihuza Abepiskopi bo mu Rwanda, bayita Inama Rusange isanzwe y’Abepiskopi. Ikaba ari imwe mu nama enye zikorwa mu mwaka wose.”

Yongeyeho ko mu rwego rw’umwaka w’ikenurabushyo wa Kiliziya, iyi ari Inama Rusange ya kabiri, kuko umwaka w’ubutumwa utangira muri Nzeri.Ati “Ku mwaka wacu w’ikenurabushyo, ubu ng’ubu ni Inama ya kabiri kuko umwaka wacu utangira muri Nzeri. Indi iheruka yabaye muri Nzeri uyu mwaka wa 2025.”

Padiri Kayisabe yavuze ko Inama Rusange yo mu kwezi k’Ukuboza yibanda cyane ku gusuzuma ibikorwa by’ikenurabushyo, harebwa ibyagezweho n’imbogamizi Kiliziya yahuye nazo.

Ati “Iyi nama yo mu kwezi k’Ukuboza iba irimo cyane cyane kureba ibikorwa by’ikenurabushyo, kureba ibyagenze neza n’ahagiye habaho imbogamizi.”

Mu byigwa by’ingenzi, Abepiskopi barasesengura byimbitse ibijyanye no gutegura abiyeguriye Imana, by’umwihariko abazaba abasaseridoti, harebwa ireme ry’uburere n’imyigishirize bahabwa.

Padiri Kayisabe yakomeje abisobanura agira ati “Hazigwa cyane cyane ibijyanye no gutegura abaziha Imana, abazaba abasaseridoti: uburyo bikorwa, imyaka biga, abakora imenyereza (stage)’, abinjira muri seminari nkuru n’igihe biga, harebwe niba ibyo bigishwa bifitiye akamaro abazaba abasaseridoti n’uko babishyira mu bikorwa.”

Iyi nama izanaganira ku mishinga itandukanye ya Kiliziya, irimo n’aho ibikorwa bijyanye n’ingoro ya Bikira Mariya wa Kibeho bigeze n’uko abayigana bakirwa.Padiri Kayisabe yagize ati “Hazabamo no kuvuga aho ibya Kibeho bigeze, gutegura ingoro ya Nyina wa Jambo n’abagana iyo ngoro.”

Abepiskopi bazanibanda ku butumwa buhabwa abakristu muri iki gihe, by’umwihariko ku mbogamizi zishingiye ku magambo n’ibikorwa bishobora gucogoza ukwemera.Ati “Hari ubutumwa bwinshi bushyigikira ukwemera, hakaba n’ubundi bugusha ukwemera, aho abantu bavuga nabi ukwemera na Kiliziya. Ibyo byose bizaganirwaho harebwe uko bikosorwa.”

Padiri Kayisabe yashimangiye ko gukomeza abakristu mu kwemera ari inshingano nyamukuru y’Abepiskopi.Ati “Ukwemera ni ubuzima bw’umukristu. Hatariho ukwemera, Kiliziya yaba itakiriho. Inshingano ya mbere ikomeye y’Abepiskopi ni ugukomeza abavandimwe mu kwemera

Kubera ko iyi Nteko Rusange iba mu mpera z’umwaka, Abepiskopi bazanagira umwanya wo kwifurizanya Noheli nziza n’Umwaka Mushya wa 2026 muhire. Hazanabaho kandi gutangiza ku mugaragaro umwaka w’ubucamanza bwa Kiliziya, hagamijwe gukomeza ubutabera n’imiyoborere myiza mu buzima bwa Kiliziya Gatolika mu Rwanda