Abepiskopi Gatolika muri Côte d’Ivoire Basabye Amahoro n'umutuzo Mbere na Nyuma y'Amatora ya Perezida

Abepiskopi basobanura ko nubwo mu myaka yashize amatora yagiye akurikirwa n’imvururu, ariko ko urugendo rwa 2025 rugomba kuba urw’amahoro, ubutabera, umutuzo n’ubwisanzure bwa buri wese.

Mu itangazo ryabo, batangaje ko hari abantu bamaze gupfa, abandi barakomereka, ndetse n’ibyangiritse byinshi byabayeho mu bice bimwe by’igihugu mu gihe hari imyigaragambyo n’imvururu.

Basabye abaturage amahoro no kwiyunga, kandi bakangurira buri wese gukomeza gusenga kugira ngo Imana ibafashe mu kubungabunga amahoro n’umutekano mu gihugu. Iri tangazo risozwa n’isengesho ryo gusaba Imana kurinda Côte d’Ivoire icyaha cyose no guha umugisha abaturage bayo.

Mgr Marcellin Yao Kouadio, wasomye iri tangazo, yibukije abaturage ko “umuntu wese udafatanyije n’Imana adashobora gukora ikintu na kimwe”, asaba abantu gusenga, gukunda ukuri no gukunda igihugu cyabo. Abepiskopi bashimangira ko inshingano y’Abanya-Côte d’Ivoire ari ukugaragaza icyizere ku bantu bose no gushyigikira igihugu mu nzira y’amahoro.

Amatora ya Perezida ya Côte d’Ivoire ari kuba kuri iyi itariki ya 25 Ukwakira 2025, nk’uko byemejwe n’Urukiko rw’Ikirenga ku itariki ya 29 Kanama 2025 nyuma yo kwemeza abakandida bose bemerewe kwiyamamaza.

Abakandida bahatanye muri aya matora bakuru ni: Alassane Ouattara , Perezida ucyuye igihe ushaka manda ya kane , Simone Gbagbo, Tidjane Thiam , Jean-Louis Billon , hamwe n’abandi bakandida bigenga barimo Henriette Lagou Adjoua na Ahoua Don Mello.

Mu myaka yashize, amatora ya Perezida muri Côte d’Ivoire, yagiye akurikirwa n’imvururu, imyigaragambyo mu bice bitandukanye by’igihugu. Muri 2010 na 2011, abantu barenga 3,000 barapfuye, abandi barenga 10,000 barakomereka abandi barahunga, ndetse hanangirika byinshi .

Abepiskopi basaba kandi gukomeza gusenga no gusabira igihugu cyabo, bakavuga ko gusenga no gutora mu mahoro ari inshingano ya buri Munya- Côte d’Ivoire