“Amasengesho yanyu yatanze umusaruro”: Kiliziya muri Kameruni yishimiye irekurwa rya Padiri n'Abafurere babiri bari bashimuswe

Mu ibaruwa yasohowe mu ijoro rya tariki ya 1 Nyakanga, Umunyamabanga mukuru wa Diyosezi ya Nkongsamba, padiri Luc Roger Dodo, yashimiye Imana n'abakomeje gusenga no gushyigikira abo bari bashimuswe kugeza babonye umudendezo.

Yagize ati "Turashimira buri wese ku masengesho n'ubufatanye bwanyu, kuko byatanze umusaruro." Yanifashishije amagambo yo muri Zaburi agira ati "Nari mu kaga ntakira Uhoraho, aranyumva, arandokora."

Mbere y'aho, ku wa Kabiri tariki ya 30 Kamena, yari yatangaje ko abo bagabo batatu bashimuswe mu ijoro ryo ku wa Gatandatu, tariki ya 27 Kamena.

Nk'uko byatangajwe na Myr Joseph Tchinda Dountio, wari uhagarariye Diyosezi, Padiri John Bosco Bihkong yari yagiye mu mudugudu yavukiyemo wa Melim, hafi ya Ndop, mu Ntara ya North-West, aho yari yagiye gusoma Misa ye ya mbere ku wa Gatanu, tariki ya 26 Kamena.

Yari aherekejwe na furere Sylvester Sewong, umuyobozi w’urugo rw'Umuryango w’Abafransiskani ba Emmanuel i Kékem, ndetse na furere Marie Rodrigue Sop, uri kwitegura gusezerana burundu muri uwo muryango w'abihaye Imana. Aba batatu bashimuswe mu ijoro ryakurikiyeho.

Diyosezi ntiyatangaje amakuru arambuye ku babashimuse, impamvu yabyo, cyangwa niba hari ibiganiro byabaye hagati y'ababashimuse n'inzego bireba mbere y'uko barekurwa.

Intara ya North-West ni imwe mu ntara ebyiri ziganjemo abakoresha Icyongereza muri Cameroun, zikomeje kwibasirwa n'umutekano muke umaze imyaka myinshi ushingiye ku makimbirane hagati ya Leta n'imitwe yitwaje intwaro.

Muri ako gace, abayobozi b'amadini, abihaye Imana n'abasivili bakunze gushimutwa, mu gihe ibikorwa by'urugomo bikomeje guhungabanya umutekano n'imibereho y'abaturage.