“Bahindure imbunda amasuka”Icyo Abepisikopi Gatolika mu Rwanda, u Burundi na DRC basabira akarere

Mu itangazo basohoye ku wa 14 Ukuboza, rikurikira Inteko Rusange yabo ya 15 yabereye muri Arikidiyosezi Gatolika ya Kinshasa muri RDC kuva ku wa 10 kugeza ku wa 14 Ukuboza 2025, aba Bepiskopi bagaragaje impungenge zikomeye ku kongera kututumba kw’intambara n’urugomo, by’umwihariko mu burasirazuba bwa RDC.

Bagize bati “Dushingiye ku miterere y’intambara n’urugomo bikomeje kwibasira akarere kacu, turongera guhamagarira ihagarikwa ry’intambara n’igaruka ry’amahoro mu bihugu byacu no hagati yabyo.”

Abepisikopi bavuze ko ibisasu guturitswa mu mugi wa Uvira, mu Ntara ya Kivu y’Epfo, byongereye ibyago by’uko intambara yakwira mu karere kose, bigasiga abasivili benshi bishwe, abandi bahunze cyangwa baba impunzi mu gihugu cyabo.

Nubwo bashimangiye icyizere cyatewe n’isinywa ry’amasezerano atandukanye agamije amahoro, by’umwihariko amasezerano yo ku wa 4 Ukuboza 2025 yashyiriweho umukono i Washington n’Abakuru b’Ibihugu bya RDC n’u Rwanda, imbere ya Perezida wa Leta Zunze Ubumwe za Amerika, Donald Trump, Abepisikopi bagaragaje impungenge zishingiye ku bibazo bikomeje kubangamira imibereho myiza n’ubusabane bw’abaturage ku mipaka y’ibihugu byabo.

Bagize bati“Kubera imibabaro y’abaturage bacu, tubagaragariza ubumwe, tubari hafi kandi tubasangiza akababaro kabo.” Banahamagarira impande zose zirwana guhagarika ubwicanyi n’ibyaha bimaze imyaka myinshi bisubiza akarere mu mwijima w’amarira n’agahinda.

Nubwo intambara imaze igihe kinini, Abepisikopi bagumanye icyizere, bagira bati“N’ubwo duhura n’ibihe bikomeye, twizera ko kubana mu bwumvikane n’amahoro arambye bishoboka mu karere kacu.”

Bashimangiye ko amahoro adashingiye gusa ku masezerano mpuzamahanga, ahubwo ashingira cyane ku bushake nyabwo n’ubwitange bw’abaturage n’abayobozi mu kuyashyira mu bikorwa mu buzima bwa buri munsi.

Bahamagariye ihinduka mu mitekerereze n’imibanire, bagira bati“Nitwiyambura inzika, kwikunda, kwikuza, irari ry’ubutegetsi n’icyizere gike, tuzashobora kongera kubaka umubano ushingiye ku rukundo, tugaha abaturage bacu amahirwe yo kubana neza uyu munsi n’ejo hazaza.”

Abepisikopi biyemeje gukomeza ubutumwa bwabo bwa gishumba, bavuga ko batazigera bareka gusenga, kwamamaza Ivanjili y’amahoro no gukorera hamwe kugira ngo amahoro atsinde intambara, urukundo rutsinde urwango.

Basabiye by’umwihariko abayobozi b’ibihugu, basaba Imana kubaha ubutwari bwo gushyira mu bikorwa ubuhanuzi bwa Mika bugira buti “Bazahindura inkota zabo amasuka … Igihugu ntikizongera kurwanya ikindi, kandi ntibazongera kwiga intambara” (Mika 4, 3–4).

Ku bayobozi b’ibihugu, Abepisikopi bagize bati “Mukoreshe ubwenge Imana yabahaye n’ububasha mwashyiriweho n’abaturage mu nyungu rusange, mu butabera, mu bwumvikane no mu mahoro.” Banabasabye gushyira imbere imvugo idahutaza, gufasha impunzi n’abandi bose bimuwe n’intambara gusubira mu byabo mu cyubahiro, no guhamagarira imbaraga zose z’ibihugu gufatanya mu gushaka amahoro arambye.

Ku muryango mpuzamahanga, Abepisikopi basabye guhagarika abafasha intambara mu ibanga bagamije inyungu zabo bwite, bavuga ko intambara zo mu karere ziterwa ahanini n’imbaraga z’amayobera zigamije kwungukira mu kavuyo.

Basabye kandi ko hajyaho uburyo buhuza ubutabazi, iterambere, amahoro n’ibidukikije mu gukemura burundu amakimbirane yo mu karere k’Ibiyaga Bigari.

Ku bakristu n’abaturage muri rusange, Abepisikopi babahamagariye kwanga amacakubiri n’imvugo zibiba urwango, bibutsa ko bose ari abavandimwe. Basabye buri wese kuba “umuhanzi w’ubuvandimwe.”

Basengeye akarere kose, basaba ko binyuze mu buhuza bwa Bikira Mariya, Nyina wa Yezu utanga amahoro, abaturage b’akarere k’Ibiyaga Bigari bahabwa ingabire y’ihinduka ry’umutima n’amahoro muri iki gihe cya Adiventi, kugira ngo bakire Yezu Kristu, Umwami w’Amahoro