Bukavu:“Hashize imyaka 29 Mgr Christophe Munzihirwa yishwe,amahoro ntaragaruka mu Burasirazuba bwa Kongo” — Mgr François-Xavier Maroyi

Kuri uyu wa gatatu tariki 29 Ukwakira 2025, Kiliziya Gatolika muri Arikidiyosezi ya Bukavu yifatanyije n’abakirisitu bose mu Misa yo kumwibuka yabereye muri Katedrali ya Bukavu, iyoborwa na Nyiricyubahiro Arikiyepiskopi François-Xavier Maroyi, arkiyepiskopi wa Bukavu, ari kumwe n’abapadiri, abihayimana, n’imbaga y’abakirisitu baturutse mu bice bitandukanye by’iyi Arkidiyosezi.

Abitabiriye uwo munsi bari bambaye imyenda yihariye yateguwe ku bw’uyu munsi w’urwibutso, n’ubwo imvura yaguye gahoro, ntibyababujije guhimbaza Misa no gusengera uwo mushumba witangiye ubuzima bw’abarengana.

Mgr Maroy yagize ati “ Roho yo kwikunda no kwishyira hejuru yaratwokamye. Twese turashaka kuba abayobozi, ariko nta n’umwe ushaka kuyoborwa. Ndetse no mu maparuwasi yacu, ibyo bigenda bifata indi ntera. Urugero rwa Mgr Christophe Munzihirwa rukwiye kudukangura, rukadusaba kuba abantu b’inyenyeri n’abiyoroshya. Ntidushobora kubaka igihugu cyacu cyangwa Kiliziya yacu tudafite umutima w’ubwiyoroshye n’ubwitange,”

Yakomeje ashimangira ko urupfu rwa Mgr Munzihirwa rutagomba gufatwa nk’akababaro gusa, ahubwo nk’ishuri rikomeye ryo gukunda Imana no gukunda abantu. Yavuze ko uyu mushumba yabaye urumuri rw’abanyagihugu n’inyenyeri y’amahoro mu bihe by’umwijima.

Yakomeje ashimangira ko urupfu rwa Mgr Munzihirwa rutagomba gufatwa nk’akababaro gusa, ahubwo nk’ishuri rikomeye ryo gukunda Imana no gukunda abantu. Yavuze ko uyu mushumba yabaye urumuri rw’abanyagihugu n’inyenyeri y’amahoro mu bihe by’umwijima.

Ati “Yari umunyabwenge, usenga  kandi ukunda igihugu. Yatinyutse kuvugira abarengana, arinda impunzi, yitangira amahoro n’ubumuntu. Ubu ni we utubereye ishusho y’ukwemera kutajegajega,”

Mgr Maroyi, yasabye abakirisitu gukomeza inzira yo kubaka amahoro no kuba abavugizi b’ukuri.

Ku rundi ruhande, Padiri Boniface Kanozire, Perezida w’Urukiko rwa Kiliziya muri Arkidiyosezi ya  Bukavu akaba ari no muri komite y’abari gukurikirana  igikorwa cyo  gushaka gushyira Mgr Christophe Munzihirwa mu rwego rw’abahire ndetse akaba yanazamurwa akaba umutagatifu, yatangaje ko hari ibyamaze kugenzurwa na Roma kndi hari ibyemewe.

Yasobanuye ko Padiri Sylvestre Cebolada, ushinzwe iyo dosiye i Roma, akomeje gukora akazi ke neza mu Dikasiteri ishinzwe iby’abatagatifu.

Ati “Nta mpungenge zihari. Turacyari mu nzira nziza. Kiliziya yacu izakomeza gusenga no gukorana umwete kugira ngo ubutwari bwa Mgr Munzihirwa bwemerwe ku rwego mpuzamahanga,”Gusa bakristu sababu bavandimwe ndabasaba gukomeza gusengera iyi gahunda.

Nyuma y’iyo Misa, habaye umuhango wo gushyira indabo ku mva z’abepiskopi batatu baruhukiye aho kuri  Katedrali ya Bukavu aribo : Mgr Christophe Munzihirwa, Mgr Emmanuel Kataliko, na Mgr Charles Mbogha Kambale.

Arikiyepiskopi Maroyi yibukije ko n’ubwo imyaka 29 ishize Mgr Munzihirwa yitangiye amahoro,ariko Uburasirazuba bwa Repubulika Iharanira Demokarasi ya Kongo bukiri mu bibazo by’umutekano muke.

Yagize ati “Amahoro nyayo ntaragaruka. Turacyabaho mu gihe cy’amakimbirane n’intambara, ariko ibyo ntibikwiriye kuduca intege. Tugomba gukomeza kuba intumwa z’amahoro, kuko ari byo Mgr Munzihirwa yadusigiye,”

Mgr Christophe Munzihirwa Mwenengabo yavukiye mu Burasirazuba bwa Kongo mu mwaka wa 1926, mu miryango yoroheje ariko ikunda Imana. Yinjiye mu muryango w’Abajezuwiti (Jésuites), aho yamenyekanye nk’umusore w’umunyabwenge, utinya Imana kandi uharanira ubutabera.

Yahawe isakaramentu ry’Ubusaserdoti mu mwaka wa 1958, akomeza ibikorwa by’uburezi n’ubwigisha mu mashuri y’Abajezuwiti no mu bikorwa bya Kiliziya.

Mu mwaka wa 1993, yatorewe kuba Arikiyepiskopi wa Bukavu, mu bihe igihugu cyari mu makuba y’intambara n’ubuhunzi. Yakoze uko ashoboye kose kugira ngo arinde abaturage n’impunzi, by’umwihariko abari barahungiye muri Kongo baturutse mu Rwanda n’ahandi.

Ku wa 29 Ukwakira 1996, ubwo intambara yageraga mu mujyi wa Bukavu, Mgr Munzihirwa yanze guhunga. Yagize ati “Umushumba ntahunga, aguma iruhande rw’intama ze.”

Yafashwe n’abasirikare baramwica, ariko urupfu rwe rwabaye igihamya cy’urukundo rw’Imana n’ubutwari bwa gikristu.

Uyu munsi, Kiliziya Gatolika imufata nk’umunyamugisha w’amahoro, kandi ibikorwa byo kumushyira  mu rwego rw’abahre n’abatagatifu birakomeje i Roma.

Mgr Munzihirwa asigaye yibukwa nk’“Ijwi ry’abatishoboye”, umushumba wicishije bugufi, utarabaye imbata y’ubwoba, kandi wakomeje kuvuga ukuri kugeza ku munota wa nyuma