Butare: Myr Jean Bosco Ntagungira yasabye abakristu bafite kiliziya zifunze kudacika intege no gushakira igisubizo hamwe.

Paruwasi ya Busoro, Nyamiya na Ruyenzi ni zimwe muzahuye n’ikibazo cy’ifungwa rya kiliziya muri iyi Diyosezi ya Butare kimwe n’ahandi hose mu gihugu muri gahunda yo gufunga insengero na kiliziya zitujuje ibisabwa.

Myr Jean Bosco Ntagungira, Umwepiskopi mushya wa Diyosezi ya Butare yasabye abakirisitu kwirinda gucibwa intege n'iki kibazo.

Myr Filipo Rukamba, Umwepiskopi wa Butare uri mu kiruhuko cy'izabukuru, na we yakomoje kuri iki kibazo ahumuriza abakristu abasaba gukomera.

Ati” Twageze muri Paruwase ya Busoro aho amwe mu masantarali yaho afunze, i Nyamiyaga ku cyicaro cya paruwase harafunze, Ruyenzi, harafunze usibye Santalari imwe. Ntimugacike intege kuko twizeye ko bizarangira cyane ko hari aho batangiye gufungura. Turizera ko mu bihe biri imbere, kiliziya nyinshi zizaba zafunguwe abantu bagatangira kubona aho basengera."

Yabasabye kandi kwishyira hamwe bagafungura compte kugira ngo bishakemo ibisubizo. Myr Rukamba yabijeje ko batazigera baba bonyine kuko mu Kiliziya basenyera umugozi umwe.

Muri Santarali eshani zigize paruwasi ya Busoro, Eshatu ari zo: Murinja, Kareba na Mututu zifunze.Busoro ku cyicaro cya Paruwasi harafunguye kimwe na Santarali ya Rwanamiza.

Ni mu gihe kiliziya ya Paruwasi ya Nyamiyaga yo ifunze bitewe no kuba isakaje amabati atemewe (ya Fibrosima). Abakirisitu bayo bavuze ko mu gihe inzego za Leta zari mu gikorwa cyo gufunga Insengero na kiliziya zitari zujuje ibisabwa, bagerageje kwisuganya ngo buzuze ibisabwa kugira ngo Kiliziya yabo idafungwa ariko ntibyabakundira birangira ifunzwe.

Abakristu bashimira abapadiri babo bakomeza kubaba hafi mu turere tw'ubutumwa twa Santalari ya Nyamiyaga bakaba bari gushaka uko bakwisuganya ngo bakureho amabati atemewe bashyireho agezweho.

Paruwasi ya Ruyenzi yo yagizweho ingaruka n'iki cyemezo kuko kiliziya 3 muri 4 ifite zose zifunze uhereye kuri kiliziya nkuru ya paruwasi, na yo yazize kuba isakajwe amabati ya Fibrociment atemewe mu Rwanda.Kiliziya imwe ifunguye ni Santarali ya Bugali.