Cameroun: Umupadiri wa nyuma muri batandatu ba Arikidiyosezi ya Bamenda bari bashimuswe yarekuwe

Uburyo yarekuwemo ntibiratangazwa, kuko inzego za Kiliziya n’abayobozi b’inzego za Leta mu gace ka Bamenda bakomeje gukoresha ubushishozi mu gutangaza amakuru, bitewe n’ubukana n’uburemere bw’iki kibazo.

Mu mashusho yakwirakwijwe ku mbuga nkoranyambaga nyuma yo kurekurwa, Padiri Berinyuy yasobanuye uko bashimuswe, asaba ko hashakwa inzira y’ibiganiro bigamije kugarura amahoro mu bice bituwe n’abavuga icyongereza bya Cameroun bikomeje guhura n’intambara n’icuraburindi.

Yagize ati “Dusaba ko haba ibiganiro bigamije gushakira igisubizo ikibazo cya Cameroun y’Amajyepfo, haba ubutabera n’amahoro arambye.”

Padiri Berinyuy yasabye imiryango iharanira uburenganzira bwa muntu n’imiryango mpuzamahanga gukurikirana iki kibazo, anasaba Kiliziya Gatolika kugira uruhare rugaragara mu gushakira amahoro n’ubutabera abanya-Cameroun y’Amajyepfo.

Ati“Dusaba ibiganiro hagati y’abavandimwe kugira ngo amahoro yongere kugaruka muri Cameroun y’Amajyepfo.”

Yanahamagariye Arikiyepiskopi Andrew Fuanya Nkea na Papa Leo wa XIV gukoresha ububasha bafite mu gushishikariza impande zose kwicarana ku meza y’ibiganiro no guharanira ubutabera.

Iri nshimutwa ryateye impungenge nyinshi mu Ntara ya Bamenda. Arikiyepiskopi Nkea yamaganye iki gikorwa, yibutsa ko Kiliziya igendera ku ihame ryo kutigeraiha barushimusi ingurane ngo barekure abashimuswe, kandi asaba impande zose zishyamirana kutibasira Abapadiri, Abihayimana cyangwa abaturage basanzwe.

Yagize ati “Hari abasivili benshi bakomeje guhura n’ihohoterwa, gushimutwa no gukorerwa urugomo muri Arikidiyosezi ya Bamenda. Abo baturage bakeneye kubaho mu mahoro no mu ituze.”

Yanenze kandi bamwe mu bashinzwe umutekano bashinjwa kurenganya abaturage, abasaba kuba indashyikirwa mu mwuga wabo, kubahiriza uburenganzira bw’abaturage no kwirinda ibikorwa bya ruswa cyangwa ihohoterwa iryo ari ryo ryose.

Arikiyepiskopi Nkea yongeye gusaba impande zose ziri mu ntambara yo mu bice bivuga icyongereza – imaze imyaka icyenda – gukora ibishoboka byose kugira ngo ibiganiro bitangire maze ituze risubire mu baturage.

Yagize ati “Abatuye Intara za North West na South West baragowe bihagije; bakeneye ubuzima butekanye no gukora imirimo yabo mu mahoro.”

Intambara yo mu bice bituwe n’abavuga icyongereza yatangiye mu 2016 nyuma y’imyigaragambyo y’abarimu n’abanyamategeko yahindutse urugomo. Nyuma yo guhashywa kw’iyo myigaragambyo, havutse umutwe w’abarwanyi biyemeje kwitandukanya na Cameroun, bifuza gushinga igihugu bise Ambazonia.