Centre Diocesain de Pastorale Incuti yatashye "Salle Incuti" yakira abagera ku 1200

Centre Diocesain de Pastorale Incuti, ni Hoteli y'Inyenyeri Eshatu ya Diyosezi ya Cyangugu, yakira abantu bo mu gihugu no hanze, ikabaha Serivisi zitandukanye zirimo kubacumbikira, ifunguro, Inama, ubukwe n'ibindi birori.

Mu rwego rwo guteza imbere Serivisi iha abakiriya bayo, iyi Hoteli yatashye Inzu Mberabyombi ifite ubushobozi bwo kwakira abagera ku 1200.

Iyi nzu mberabyombi iherereye ahasanzwe hakorera iyi Hoteli, mu mujyi wa Rusizi, hafi ya stade ya Rusizi, iruhande rwa paruwasi Katederali ya Cyangugu ahitegeye ikiyaga cya Kivu n'umujyi wa Bukavu muri Repulika Iharanira Demokarasi ya Kongo.

Padiri Benjamin Bapfakurera, umuyobozi w'iyi Hoteli akaba yaragize n'uruhare mu mirimo yo kubaka iyi Salle, yatangarije Kinyamateka ko umushinga muremure wo kubaka iyi Nzu Mberabyombi waturutse ku gitekerezo cya Diyosezi cyo gusubiza ikibazo cy'ibura ry'ahantu hagutse hafite ubushobozi bwo kwakira abantu benshi mu gace ka Rusizi no mu Ntara y'i Burengerazuba muri Rusange.

Avuga ko iyi Salle yatangiye kubakwa mu mwaka wa 2020, ariko imirimo iza kudindizwa n'icyorezo cya Covid-19. Padiri Benjamin yakomeje avuga ko yishimiye kuba iyi Salle igeze ku musozo, aha n'ikaze Inzego zitandukanye n'abantu bategura ibikorwa byagutse bikenera ahantu Heza kandi hafite ubushobozi bwo kwakira abantu benshi.

Myr Eduard Sinayobye, wahaye umugisha iyi Salle, yashimiye abatekereje iki gikorwa n'abagikurikiranye kugera kirangiye.Avuga ko ari ikimenyetso cyo gutinyuka no gushimangira uruhare rwa Kiliziya mu Iterambere ry'Abaturage.

Ati" Nakunze cyane igitekerezo cy'intangiriro, uko abapadiri ba hano bakoraga ubutumwa mu biro by'icungamutungo rusange bya diyosezi, muri CDPI na paruwasi, barebye kure, bagatinyuka bakiyemeza kuzigama udufaranga duke duke mu bukene bwa Diyosezi, ngo bateganyirize ejo hazaza."

Myr Sinayobye,yakomeje avuga ko kuba abapadiri baratinyutse gukora igikorwa kinini nk'iki ari ubuhamya bukomeye ko kugira ngo iterambere rigerweho bisaba gutinyuka maze abantu bakareba kure.

Uretse Salle, inyubako ya Salle Incuti, ifite igice cyagenewe Ibiro, bikaba biteganyijwe ko kizakoreramo Serivisi na Komisiyo za Diyosezi ya Cyangugu zari zisanzwe zikorera ahahoze Eveche ya Cyangugu.