Cyangugu–Mugomba: GS Karambi, kuva ku cyumba cy’ibyatsi kugera ku ishuri ry’icyitegererezo, yatangiye urugendo rwa Yubile y’imyaka 100

Iki kigo kiri mu bigo by’ishuri 123 bya Diyosezi Gatolika ya Cyangugu, cyahise gihabwa impano ya moto n’iyo Diyosezi, igamije kurifasha kunoza imiyoborere no guteza imbere ireme ry’uburezi. Uyu munsi wanaranzwe n’ibirori bya kabiri byo gutanga impamyabumenyi ku banyeshuri baharangije amasomo yabo muri iri shuri rimaze imyaka 95 rishinzwe.

Padiri Jean Claude Ntamuturano,umuyobozi waryo, mu kiganiro na kinyamateka yasobanuye ko uru rugendo rwa Yubile atari ukwishimira imyaka ishize gusa, ahubwo ari n’umwanya wo kwitekerezaho no kunoza ejo hazaza h’ishuri.

Yagize ati “Urugendo rwa Yubile ni umwanya wo gusubiza amaso inyuma tukareba aho twavuye n’aho tugeze. Iri shuri ryatangiriye mu 1931 mu cyumba gisakaje ibyatsi, rifite abanyeshuri batarenze 10 bigishwaga n’abakateshiste. Uyu munsi rifite abanyeshuri 2492 biga mu byiciro bitandukanye, n’abarimu 62, ndetse rifite ibyumba by’amashuri 41 birimo 23 bijyanye n’igihe.”

Yakomeje agaragaza ko iri shuri ryateye imbere ku buryo bugaragara, haba mu mitsindire y’ibizamini bya Leta ndetse no mu mibereho myiza y’abanyeshuri.

Yavuze ko kuba riri mu mashuri 8 ya mbere mu Karere ka Nyamasheke yatsindishije neza no kuba rifite gahunda nziza yo kugaburira abanyeshuri (School Feeding), byagize uruhare mu kugabanya umubare w’abata ishuri.

Ati “ryigaragaje mu gutsindisha neza no kuba mu mashuri ya mbere mu mitsindire y’ibizamini bya Leta nk'uko ryaje mu bigo 8 bya mbere mu karere ka Nyamasheke. Kuba mu bigo bya mbere bigaburira abana neza ku ishuri bigatuma abana bata ishuri baragabanutse cyane. Indangagaciro z’ingenzi zakomeje gusigasirwa ni isengesho, imyitwarire myiza, gukorera hamwe n’ubufatanye n’ababyeyi no guhora duhanga udushya dutuma uburezi buryoha.”

Ku bijyanye n’impano ya moto bahawe na Diyosezi Gatolika ya Cyangugu, yavuze ko izafasha cyane mu kwihutisha serivisi z’ishuri no gukurikirana ibikorwa byaryo bya buri munsi.

Ati “Iyi moto izadufasha kwitabira vuba gahunda zitandukanye, gukurikirana ibikorwa by’ishuri no gufasha mu butabazi bwihuse, nko kujyana abarwayi ku ivuriro igihe bibaye ngombwa. Bizazamura ireme ry’imiyoborere n’uburezi muri rusange.”

Mu birori byo gutanga impamyabumenyi, abanyeshuri barangije basabwe gukomeza kurangwa n’indangagaciro nziza no gukoresha ubumenyi bahawe mu guteza imbere igihugu. Ishuri kandi ryishimiye bamwe mu baryizemo bagarutse kurikoramo, haba nk’abarimu, abakorerabushake n’abakozi bunganira ibikorwa byaryo.

By’umwihariko, hagaragajwe urugero rw’umwe mu baryizemo watangiye ibikorwa bibiri by’indashyikirwa muri uyu mwaka wa 2026: gufasha abana batishoboye kwishyurirwa gahunda yo gugaburwa(School Feeding) no gutangiza igikorwa cyo gukusanya inkunga yo gusana ibyumba bine bishaje by’ishuri.

Ubuyobozi bw’ishuri bwashimangiye ko uru ari urugero rwiza rw’uko abarirangijemo bakomeza kugira uruhare mu iterambere ry’aho bize, ndetse bikaba bizafasha GS Saint Dominique Savio de Karambi kugera ku ntego yo kwizihiza Yubile y’imyaka 100 rifite isura nshya kandi rikomeje kuba icyitegererezo mu burezi no mu kurera abanyarwanda b’ejo hazaza.

GS Saint Dominique Savio de Karambi, riri ku isonga mu mashuri ya Nyamasheke n’abanyeshuri 2492, riherereye mu cyaro cyegereye Pariki ya Nyungwe, aho n’amafoto y’abanyeshuri akunze kugaragaza ubwiza bw'iyi Pariki. N’ubwo riri kure y’icyicaro cy’Akarere, rikomeje kwishakamo ibisubizo bituma rirushaho kwifuzwa: kurikoreramo, kuryigamo, kurirereramo no kurisura.

Riri mu bigo by’imbere mu gushyira mu bikorwa gahunda yo kugaburirwa ku ishuri (School Feeding), kandi n’ubwo ryigamo abanyeshuri bataha (day school), riri mu bigo 8 bya mbere mu gutsindisha neza mu karere ka Nyamasheke. By’umwihariko, ryagabanyije cyane umubare w’abata ishuri binyuze mu kugaburira neza abanyeshuri, kubitaho mu myigire no kubaba hafi mu bihe byose.

N’ubwo GS Saint Dominique Savio de Karambi yishimira intambwe imaze gutera mu myaka 95 ishize, ifite icyifuzo cyo kuzizihiza Yubile y’imyaka 100 mu 2031 imaze gukemura zimwe mu mbogamizi zikiyibangamiye. Muri zo harimo kubura ibibuga bihagije byo kwidagaduriramo ku banyeshuri, cyane cyane ibibuga by’imikino y’intoki nka Basketball na Volleyball, ndetse n’ibyumba bimwe by’amashuri bikeneye kuvugururwa kugira ngo bikomeze kuzuza ibisabwa mu gutanga uburezi bufite ireme.