Cyangugu:umuryango wa Legio Mariae, Regia Gikongoro yungutse Comitsium nshya ya Mushaka, ibyawe na Comitsium ya cyangugu

Ibirori byo gutangiza iyi Komitsiyumu ya Mushaka bikaba byabimburiwe n’Igitambo cya Misa, yaturiwe muri paruwasi ya Mushaka, iyoborwa na Mgr Ignace Kabera, igisonga cy’umwepiscopi wa Diyosezi gatolika ya Cyangugu. Mu butumwa bwe Mgr Ignace Kabera, yabashimiye aba balegio Mariae kuba bazi neza abanyamuryango bafite, abasaba by'umwihariko gukora ubutumwa banatoza abana bakiri bato kuyoboka uyu muryango.

Ubusanzwe abalegio Mariae bo mu maparuwasi ya Mushaka, Mibilizi na Mashyuza, bahuriraga muri Komitsiyumu ya Cyangugu, urugendo rungana na Km 21.5 uvuye i Mibilizi, km 29 uvuye i Mushaka, na 41 uvuye muri Paruwasi ya Mashyuza. Aba Balegio bakavuga ko hababeraga kure ndetse akenshi ugasanga imisanzu bari gutanga yakagombye gufasha umuryango wabo ishiriye mu ngendo. Ubu bakaba bishimira ko begerejwe urwego ruzabafasha hafi

Donatiani Murangwa ufite imyaka 80, winjiye muri uyu muryango wa agisiyo Gatolika wa Legio Mariae afite imyaka 40 yagize ati" kuba batwegereje Komitsiyumu biradufasha cyane cyane nkatwe tugeze mu zabukuru, tuzajya tuza hano tudatanze n'amatike menshi, byatuvunaga kubera twaburaga intwererano yo gufasha Komitsiyumu kuko yabaga yashiriye mu ngendo."

Imibare yagaragajwe kuri uyu munsi yerekana ko kugeza ubu abagize Legio Mariae benshi bari hejuru y’imyaka 45, ibi bikerekana ko mu myaka iri imbere abanyamuryango bazaba bari kugabanuka.

Renovate Harerimana, umwe muri aba Balegio Mariae avuga ko hakwiye ubutumwa bwihariye mu rubyiriko no mu bato, aho yagize ati" mu butumwa dukora ubu, turi kugenda dutoza abana ku bigo by'amashuri, aho tuba dufite amaperesediyumu duheka ndetse na ba bana bato tukagira uburyo tugenda tubigisha."

Yakomeje agira ati" iyo bibaye ngobwa kuri ba bana bato, mu butumwa bwa Legio Mariae tubatoza, tugenda tuvangamo udukino tw'abana kugira ngo babone ko abana bashyushye kuko Legio y' abana igira uburyo ikorwamo bitandukanye n"abakuru. Abana ubashyiramo uturirimbo mu gihe ubonye ko batangiye kurambirwa. Icyo kintu natwe tukimirije imbere ku buryo natwe tuzabona abazadusimbura mu gihe tuzaba twashaje"

Uwamurengeye Françoise, ni umwe mu rubyiruko uvuga ko yagiye muri Legio Mariae afite imyaka 8, ngo asanga hari ibyiza byinshi yigiye muri uyu muryango ku buryo n’urundi rubyiruko rwabyigiraho rukawugana

Ati" icyuatumye mba umulegio ni uko abalegio bakuru banshishikarizaga kumenya ibyiza by'umubyeyi Bikira Mariya. Icyo nabwira urubyiruko bagenzi bange ni uko kuba umulegio nta gihombo kirimo kuko biturinda imyitwarire mibi, muri Legio Mariae tuhakura uburere butuma uzavamo umuntu mukuru mwiza wubatse umuryango mwiza."

Padiri Emmanuel Ndayisaba, umuyobozi w'urwego rwa Regiya ya Gikongoro, ihuriyemo Diyosezi ya Butare, Gikongoro na Cyangugu, mu ijambo rye yasabye abo balegio gukomera ku butumwa bahamagarirwa, bakirinda gucika intege kuko aricyo Kiliziya ibitezeho

Umuryango wa Legio Mariae,ugira inzego arizo Konsiliyumi ari rwo rwego rwa Legio mpuzabihugu, Senatus igahuza aba legio mariae mu gihugu, Legia ihuza amadiyosezi yegeranye, Komisiya igahuza amaparuwasi yegereranye muri diyosezi, Kuriya yo igakorera ku rwego rwa Paruwasi naho Prezidiyumu ikaba urwego rwa mbere umulegio wese atangiriramo. Iyi Kuriya ya Mushaka yagizwe komitsiyumu kuri uyu wa 25/05/2025 yashiznwe 1964, ihuje amaparuwasi atatu ariyo Mushaka, Mashyuza na Mibilizi, ikaba igizwe na Kuriya 15 n’abanyamuryango 2757 mu gihe 663 muri bo bari munsi y’imyaka 45.