Diyosezi Gatolika ya Cyangugu yatangije amahugurwa y’iminsi itatu kuri Sinodi

Amahugurwa yitabiriwe n’abapadiri bakuru bose ba paruwasi zigize diyosezi, umukristu uhagarariye abalayiki muri buri paruwasi, abahagarariye abihayimana bo mu miryango itandukanye, inzobere ku bijyanye na Sinodi zatumiwe zivuye mu yandi madiyosezi, urubyiruko ruhagarariye abandi ndetse n’abakozi ba diyosezi bahagarariye abandi.

Mu ijambo rye ryo gutangiza aya mahugurwa, Mgr Edouard Sinayobye yagarutse ku rugendo rwa Sinodi rwatangiye mu mwaka wa 2021, yibutsa ko Kiliziya yahereye ku gikorwa cyo gutega amatwi abakristu bose bagize umuryango w’Imana, ibyo bitekerezo bikakusanywa mu makuru yagiye atangwa n’amadiyosezi ku rwego rw’igihugu, akoherezwa ku rwego rw’imigabane ndetse bikagezwa ku rwego rw’isi yose.

“Uru rugendo rwa Sinodi turimo rurakorwa n’abagize umubiri wa Kristu twese. Twarutangiye mu Kwakira 2021, dutangira ku mwitozo wageze ku bakristu bose wo gutega amatwi buri wese mu muryango w’Imana. Ibyo twakusanyije mu maparuwasi byoherejwe mu rwego rwa diyosezi, hanyuma diyosezi ishyikiriza urwego rw’igihugu. Raporo z’igihugu zoherejwe ku rwego rw’imigabane, na zo zirakusanywa kugeza ku rwego rw’isi yose.”

Mgr Sinayobye yakomeje asobanura ko ibyo bitekerezo byakusanyijwe ku isi yose byatanze umusingi w’ibiganiro byabereye i Roma mu nama yambere ya Sinodi yabaye mu Kwakira 2023. Nyuma y’iyo nama, raporo yasubijwe amadiyosezi yose ku isi ngo yongere kuyigira iyayo no kuyungura ibitekerezo bishya.

“Ibyasuzumwe n’iryo hugurwa rya mbere ryasubijwe amadiyosezi yose ngo abyungure, byongera gukusanywa bigashyikirizwa inama nkuru y’abepiskopi gatolika, na yo ikora ikegereranyo cyoherejwe i Roma. Uko niko byagenze na hano mu Rwanda. Ibyo byose nibyo byavuyemo inyandiko isoza ya Sinodi (Final Document) yashyizwe ahagaragara mu mwaka wa 2024 na Nyakwigendera Papa Fransisiko nk’urwandiko rutanga umurongo ngenderwaho w’ubuzima bwa Kiliziya no mu butumwa bwayo.”

Mgr Sinayobye yibukije ko kuva iyo nyandiko yashyikirizwa umuryango w’Imana, hatangiye igihe cyo gushyira mu bikorwa amabwiriza ayikubiyemo, haba mu mibereho y’abakristu no mu mikorere y’ubutumwa bwa za diyosezi.

Mu gushimangira akamaro k’aya mahugurwa, umwepiskopi yagize ati:

“Aya mahugurwa ya none dutangiye afite intego yahawe n’ubuyobozi bwa Kiliziya, ni ukuvuga gushyira mu bikorwa amabwiriza ya Sinodi yo kugendera hamwe. Murabona ko turi hano duhagarariye umuryango w’Imana wose: umwepiskopi, abasaseridoti, abihayimana n’abalayiki bo mu ngeri zose. Turi ikimenyetso cy’ubumwe buranga abanyamuryango ba Kiliziya. Ndabasaba rero kugira umutima w’umwigishwa.”

Mgr Sinayobye yakomeje agaragaza ko iyi Sinodi atari inama isanzwe y’itora cyangwa yo gufata imyanzuro, ahubwo ari inzira y’ubushishozi n’ugushakisha icyo Roho Mutagatifu abwira Kiliziya.

“Papa Fransisiko yadukanguriye kenshi ati: iyi Sinodi , ntabwo ari inama yo gutora no gufata imyanzuro ihuriweho na benshi. Uwayumva kuri ubwo buryo yahusha. Sinodi igamije guhindura ubuzima bwacu, kongeramo umusemburo Roho Mutagatifu yifuza mu buryo tubamo no mu buryo dukora ubutumwa.”

Uburyo amahugurwa azakorwa

Abitabiriye bazashyirwa mu matsinda y’abantu icumi, aho bazaganira ku ngingo z’ingenzi ziri mu nyandiko isoza ya Sinodi, bungurane ibitekerezo kandi bategerane amatwi.

"Tuzasozereza ku nyandiko izaba ikubiyemo amabwiriza azava muri bya bitekerezo byose twatanze. Ayo mabwiriza azashyikirizwa umwepiskopi wa diyosezi, akayakira kandi akongera kuyasangiza n’abamufasha kwita ku muryango w’Imana kugira ngo dukomeze kurushaho kunoza ubushishozi. Aho rero hazavamo urumuri rutubera umurongo ngenderwaho mu mibereho no mu butumwa bwa diyosezi yacu ya Cyangugu.”

Yasoje abifuriza amahugurwa arimo ubushishozi n’umutima wumvira Roho Mutagatifu:

“Mbifurije kwiga neza, mbifurije gufata, mbifurije rero mwese kuzabasha kumva icyo Roho Mutagatifu atubwira.”

Amahugurwa azamara iminsi itatu, akazasozwa ku wa Gatandatu tariki ya 20 Nzeri 2025. Biteganyijwe ko azasiga havutse inyandiko izafasha Diyosezi ya Cyangugu gukomeza kunoza inzira ya Sinodi, mu bumwe, mu bufatanye no mu butumwa bwayo muri Kiliziya Gatolika.​