Diyosezi Gatolika ya Cyangugu yibutse ku nshuro ya Gatanu padiri Ubald Rugirangoga

Uyu muhango watangijwe n’Igitambo cy’Ukaristiya cyayobowe na Nyiricyubahiro Mgr Edouard Sinayobye, Umwepiskopi wa Diyosezi Gatolika ya Cyangugu. Yari afatanyije na Mgr Tadeyo Ntihinyurwa, wabaye Umwepiskopi wa mbere wa Diyosezi ya Cyangugu, Mgr Célestin Hakizimana wabaye Administrateur Apostolique wa Diyosezi ya Cyangugu, ndetse na Mgr Willy Ngumbi, Umwepiskopi wa Diyosezi ya Goma muri Repubulika Iharanira Demokarasi ya Congo. Uyu muhango wanitabiriwe n’umuryango wa Padiri Ubald Rugirangoga, abapadiri bo mu Rwanda no mu mahanga, abihayimana n’abakristu baturutse mu madiyosezi atandukanye y’u Rwanda no hanze yarwo.

Mu nyigisho ye, Nyiricyubahiro Mgr Edouard Sinayobye yagarutse ku iyobera ry’ubuzima, urupfu n’izuka, abihuza n’urugendo rwa Padiri Ubald Rugirangoga.

Ati “Ubuzima bwacu ni ka kabuto kagwa mu butaka kagahuguta hanyuma ububasha bw’Imana bugatuma kera imbuto. Yezu Kristu yanyuze muri iyo nzira yo kwihindura ubusabusa mu bubabare bwe, mu rupfu rw’agashinyaguro, ararutsinda, atsinda icyaha, atsinda ikibi, arazuka yicara mu ikuzo iburyo bw’Imana. Urupfu n’izuka bye byadukinguriye amarembo y’ikuzo byo kuzabaho iteka ryose.”

Mgr Sinayobye yakomeje asobanura ko iyo nzira ya Kristu ari yo na Padiri Ubald yanyuzemo, ayinyuramo mu bwitange n’umurava byamuranze mu buzima bwe bwose.

Ati “Iyo nzira yo kunyura mu iyobera ryo guhinduka ubusabusa, mu bubabare no mu rupfu asanga ubuzima bw’ikuzo, niyo na Padiri Ubald Rugirangoga nawe yanyuze. Turibuka Padiri Ubald asendereye ibigango n’umwete wo kuzenguruka isi ubutananirwa, ubutarambirwa. Turibuka na ya foto ari mu marembera aho yari arwariye adusezeraho. Turibuka tumubona tumusezeraho bwa nyuma mu ishyingurwa rye hano muri uru rugo rw’Ibanga ry’Amahoro. Yabaye ka kabuto Imana yashatse ko kajya mu gitaka ngo gahugute maze kabone kwera imbuto nyinshi.”

Yasabye Imana kwakira uwo murage w’ubwitange, ikawubyazamo imbuto nyinshi mu buzima bwa Kiliziya n’abantu muri rusange.Ati “Turasaba Imana ngo ukwitanga kwe Imana ikubyazemo umurumbuko w’imbuto nziza nyinshi.”

Mu gukomeza inyigisho ye, Mgr Sinayobye yibukije iyobera riri mu mutima wa Yezu watikujwe icumu, agasobanura isano iri hagati y’amazi n’amaraso byasohotsemo n’ubuzima bw’abakristu.

Ati “Mu gihe tuzirikana iri yobera ry’urupfu n’izuka, twibuke uko byagenze igihe umwe mu basirikare yatikuye icumu mu mutima wa Yezu. Ivanjili itubwira ko hasohotsemo amaraso n’amazi. Umutima utikurwa icumu wakira inabi maze wo ugatanga ineza, ugatanga imbazi, ugatanga urukundo rukiza. Ayo mazi ni asukura imitima, amaraso ni urukundo rubeshaho.”

Yashimangiye ko uwo mutima wa Yezu ari wo wahindutse isoko y’ubutumwa Padiri Ubald yakomotseho ubuzima bwe bwose.

Ati “Muri uwo mutima wa Yezu ni ho hari ibanga ry’imbabazi ribohora uzitanze n’uzihawe. Uwo mutima ni wo wari waratwaye umutima wa Padiri Ubald Rugirangoga, agahora awitegereza mu kwemera mu isengesho ryo gushengerera. Uwo mutima ni wo yavomyemo imbaraga zo kubabarira no kwigisha ubutarambirwa Ivanjili y’urukundo rubabarira.”

Mgr Sinayobye yibukije amagambo ya Yezu ku musaraba agaragaza isumbwe ry’imbabazi ku nabi.Ati “Mu gihe Yezu yasambiraga ku musaraba yatatse agira ati ‘mfite inyota’. Abari aho ng’aho aho kumuramiza amazi bamuhaye divayi irura ngo anywe. Muri uwo munwa wa Yezu buhiye divayi irura, ni ukuvuga inabi, ni ho hasohotse amagambo y’imbabazi ati ‘Dawe bababarire kuko batazi icyo bakora’.”

Yerekanye ko gushengerera Yezu mu Ukaristiya ari isoko Padiri Ubald yavomyemo imbaraga zo kwamamaza imbabazi.Ati “Gushengerera Yezu mu Ukaristiya ntagatifu, umwitozo Padiri Ubald yakoraga kenshi akanawutoza abantu, byatumye abonesha mu kwemera kwe umutima wa Yezu washavujwe n’inabi ariko nyamara ukavubukamo imbazi zitembera kuri bose. Urukundo rubabarira rwa Yezu rwatweretse ko imbazi za Yezu ari umutsindo w’ikibi. Uwo mutima Yezu yawusangije abakiriye iryo banga barimo na Padiri Ubald.”

Yahereye kuri ubwo butumwa agaragaza akamaro k’imbabazi mu kubohora umuntu no kubaka amahoro, cyane cyane mu mateka y’u Rwanda.Ati “Imbabazi zirabohora, imbabazi zitanga kubaho, imbabazi ni zo zisana iteme hagati y’uwahemutse n’uwahemukiwe. Imbabazi ni ryo banga umutima wa Yezu waduhishuriye ngo tubashe kunesha inabi yateye icyago cya Jenoside yakorewe abatutsi muri uru Rwanda rwacu, ngo bityo tugere ku bwiyunge nyabwo.”

Yongeye kwibutsa ko ubwo butumwa Padiri Ubald yabuhamije mu bikorwa bye byamugejeje ku kuzenguruka isi hose.

Ati “Padiri Ubald amaze kubohoka atyo ni bwo twamubonye azenguruka isi yose, yigisha imbabazi, ubwiyunge, ubuvandimwe n’amahoro.”

Yasobanuye ko Ibanga ry’Amahoro ari umurage w’ingenzi Padiri Ubald yasigiye Kiliziya n’igihugu.Ati “Uwo murage ni wo yadusigiye hano ku Ibanga ry’Amahoro. Urugo rw’Ibanga ry’Amahoro ribumbatiye ibanga rihishe mu mutima wa Yezu. Iryo banga Nyagasani ni we ubwe urihishurira abagana uru rugo rwe hano.”

Yerekanye ko ubutumwa bw’aho bugamije kugaragaza isoko y’ubuzima iri mu mutima wa Yezu.Ati “Ubutumwa bukorwa hano ku Ibanga ry’Amahoro ni ukurangira abatugana bose ko mu mutima wa Yezu ari ho havubuka isoko y’urukundo ruvura ibikomere, rugatanga ubutwari bwo kubaho, ubutwari bwo kubabarira, ubutwari bwo gusaba imbabazi.”

Yasoje ashimira Imana ku mpano ya Padiri Ubald, ayisabira umugisha ku butumwa bukomeje.Ati “Nyagasani twongeye gushimira impano nziza waduhaye, Padiri Ubald Rugirangoga n’ubutumwa bwe hagati muri twe. Duhe ubutwari n’ubushishozi, ubutumwa bw’uru rugo bukomeze bube icyomoro n’ikiramiro cy’abashaka kuruhukira iruhande rwawe. Ha umugisha wawe ibyo dukora n’ibyo twimirije imbere, bidutagatifuze kandi byere imbuto nziza. Amina.”