Diyosezi Gatolika ya Gboko muri Nigeria yahagaritse by'agateganyo ibikorwa by'amashuri, paruwasi n'ibitaro kubera umutekano muke

Mu ibaruwa ya gishumba n'iteka byashyizweho umukono ku wa Mbere, tariki ya 12 Ukwakira, Myr William Amove Avenya, Umwepiskopi wa Diyosezi ya Gboko, yatangaje ko iki cyemezo cyafashwe mu rwego rwo kurinda ubuzima bw'abapadiri, abihayimana, abarimu, abanyeshuri, abaganga n'abarwayi.

Ibigo byahagaritswe birimo ishuri ryisumbuye rya St. Winifred, ishuri ry'incuke n'abanza rya St. Winifred, ibitaro bya St. Thomas, ikigo cyita ku buzima bwo mu mutwe cya Subin Mind Care Center, ibikorwa by'ikenurabushy bikorera muri ibyo bitaro, ndetse na Paruwasi ya St. Winifred. Ibi byose biherereye muri Ihugh, muri Diyosezi ya Gboko.

Iri teka ryatangiye gukurikizwa ku wa 12 Ukwakira, riteganya ko abakozi ba Diyosezi bose bakoreraga muri ibyo bigo bahavanwa, bakoherezwa mu zindi nshingano cyangwa ahandi bakorera. Abo barimo abapadiri, abihayimana, abakateshiste, abakozi b'ikenurabushyo, abarimu, abaganga n'abandi bakozi bashinzwe ubuyobozi.

Myr Avenya yasobanuye ko nta muntu uzemererwa gusubira mu kazi cyangwa gukora umurimo wa Kiliziya mu izina rya Diyosezi muri Ihugh atabiherewe uruhushya rwanditse na we ubwe.

Iri hagarikwa ryasobanuwe nk'irigamije kuba iry'agateganyo, ariko ridafite igihe ntarengwa kizwi. Rizakomeza kubahirizwa kugeza igihe Umwepiskopi, amaze kugisha inama abo bafatanya kuyobora Diyosezi, azasanga umutekano wagarutse kandi hari icyizere gihagije cy'uko abakozi n'abaturage bashobora gukorera no gukoresha ibyo bigo nta kaga.

Nk'uko iri teka ryashyizweho umukono na Myr Avenya afatanyije na Padiri Marcellinus Wende, umuyobozi ushinzwe ibijyanye n'amategeko n'inyandiko za Diyosezi, icyemezo cyo kongera gufungura ibyo bigo kizatangazwa binyuze mu rindi teka.

Ibitero byagiye bigabwa ku bigo bya Kiliziya

Mu ibaruwa ya gishumba iherekeje iri teka, Myr Avenya yavuze ko icyemezo cyo guhagarika ibikorwa cyafashwe nyuma y'ibitero byagiye bigabwa ku bigo bya Kiliziya, kwangiza imitungo n'ibindi bikorwa by'ihohoterwa byagiye bigaragara muri Ihugh.

Mu byagarutsweho harimo inkongi z'umuriro zagiye zitwika amacumbi y'abanyeshuri biga muri St. Winifred Secondary School. Izo nkongi zavuzwe ko zabaye ku wa 28 Ukwakira 2025, ku wa 10 Gicurasi, ku wa 15 Gicurasi no ku wa 11 Ukwakira 2026.

Diyosezi yanagaragaje ko Paruwasi ya St. Winifred yagiye yibwa kenshi, mu gihe no ku bitaro bya St. Thomas habereye ibikorwa by'ubugizi bwa nabi.

Ibaruwa inibutsa imvururu zabaye ku wa 21 Kamena 2024, ubwo ibyo bitaro byongeraga gufungura. Icyo gihe, bamwe mu baturage baho bigaragambije, bitwaje ibyapa kandi bavuga amagambo agaragaza ko batagishaka ko ababikira bakorera muri ako gace.

Myr Avenya yavuze ko ibi bikorwa bigaragaza ikibazo kimaze igihe cy'urwango n'ubugizi bwa nabi byibasira imitungo ya Kiliziya. Yongeyeho ko ibyo bitero byateje ubwoba, igihombo ku bakozi b'ibyo bigo no ku baturage babigenerwaga.

Diyosezi ivuga ko yabanje gushaka umuti binyuze mu biganiro

Umwepiskopi wa Gboko yavuze ko mbere yo gufata icyemezo cyo guhagarika ibikorwa, Diyosezi yagerageje gushaka umuti binyuze mu biganiro, ubwiyunge n'ubufatanye n'abaturage.

Nk'uko ibaruwa ibivuga, abahagarariye Diyosezi bagiranye ibiganiro n'abaturage bo muri Ihugh, bahura n'abayobozi gakondo n'abakuru b'imiryango, ndetse bageza ibibazo byabo ku nzego za Leta n'izishinzwe umutekano.

Gusa, ibyo biganiro ntibyatanze umusaruro wari gutuma Kiliziya ibona amahoro n'umutekano bikenewe kugira ngo ibikorwa bikomeze.

Myr Avenya yagize ati“Kiliziya ntishobora, ibitewe n'umutimanama wayo, gukomeza gushyira mu kaga abapadiri bayo, abihayimana, abarimu, abakozi b'ubuvuzi, abanyeshuri n'abarwayi.”

Uko abanyeshuri, abarwayi n'abakozi bazafashwa

Nubwo ibikorwa by'ibyo bigo byahagaritswe, Diyosezi yatangaje ko izakora ibishoboka kugira ngo ifashe abantu bazagirwaho ingaruka n'icyo cyemezo.

Abanyeshuri bigaga mu mashuri y'incuke, abanza n'ayisumbuye bazafashwa, uko bishoboka, gukomereza amasomo mu yandi mashuri ya Kiliziya Gatolika ari muri Diyosezi. Andi makuru ajyanye n'uko bazimurwa azatangwa n'umuyobozi ushinzwe serivisi z'uburezi Gatolika.

Ku barwayi bavurirwaga mu bitaro bya St. Thomas, Diyosezi yavuze ko bazoherezwa mu bindi bigo nderabuzima. Hazanategurwa uburyo bwo kwimura neza abarwayi bakeneye ubuvuzi bwihutirwa, kugira ngo batabura ubufasha bukenewe.

Ku bakozi bahagaritswe mu kazi, Diyosezi yiyemeje kubitaho mu buryo buboneye kandi burangwa n'urukundo, ikurikije inyigisho za Kiliziya ku cyubahiro cya muntu n'agaciro k'umurimo.

Umuhamagaro wo kugarura amahoro n'ubwiyunge

Mu ibaruwa ye, Musenyeri Avenya yasabye abaturage ba Ihugh, abayobozi gakondo, urubyiruko, abayobozi ba Leta n'inzego zishinzwe umutekano gufatanya mu kugarura amahoro no kurinda ubuzima bw'abaturage n'umutungo wabo.

Yanasabye inzego zibifitiye ububasha gukora iperereza no kugeza imbere y'ubutabera abagaragaweho uruhare mu bitero byagabwe ku bigo bya Kiliziya.

Umwepiskopi yashimangiye ko Diyosezi nta rwango ifitiye abaturage bo muri ako gace, agira ati “Nta rwango dufitiye abavandimwe na bashiki bacu.”

Yamaganye urugomo, gutwika imitungo no kuyisenya, avuga ko ibyo bikorwa binyuranyije n'Ivanjili ndetse n'inyungu rusange z'abaturage.

Myr Avenya yavuze ko gusubira gukorera muri Ihugh bizashoboka igihe hazaba habayeho ukwicuza nyakuri, gusana ibyangijwe cyangwa kwishyura ibyahombye, kwiyemeza ku buryo budasubirwaho kubungabunga amahoro no gutanga icyizere gifatika kandi kirambye cy'umutekano w'abakozi n'imitungo ya Kiliziya.

Mu rwego rwo gushakira igisubizo iki kibazo, Umwepiskopi yasabye abakirisitu gukomeza gusenga basabira amahoro n'ubwiyunge. Yanasabye paruwasi zose zo muri Diyosezi gutura amasengesho y'abemera no guhimbaza Misa isabira amahoro.

Yashishikarije kandi imiryango gusengera hamwe Rozari, anagena ko ku wa Gatanu, tariki ya 23 Ukwakira, hazaba umunsi w'amasengesho no kwiyiriza ubusa hagamijwe gusabira ubwiyunge.

Myr Avenya amaze igihe yamagana ubwicanyi n'umutekano muke muri Benue

Myr William Amove Avenya amaze igihe agaragaza impungenge ku bitero bidafite impamvu n'ubwicanyi bwibasira abaturage b'inzirakarengane muri Leta ya Benue, iri mu gace akoreramo umurimo we w'ubushumba.

Muri Kamena umwaka ushize, yagaragaje ishusho ibabaje y'imyaka hafi 20 irangwa n'urugomo rudashira, kwimurwa kw'abaturage ku gahato no kubabazwa n'umutekano muke muri kamwe mu turere twa Nigeria twibasiwe cyane n'ibibazo by'umutekano.

Mu itangazo rye ryari rifite umutwe ugira uti “ Ijwi ry'ububabare rituruka mu Kibaya cya Benue”, Umwepiskopi yavuze ko muri iyo myaka abaturage bagiye bicwa, bagakomereka bikomeye, abandi ibihumbi bakirukanwa mu butaka gakondo bw'iwabo, bakamburwa n'uburyo bwari bubatunze.

Yongeyeho ko benshi mu bavuye mu byabo ku gahato baba mu nkambi z'abimuwe n'ibibazo by'umutekano, aho babayeho mu buzima bugoye kandi butesha agaciro ikiremwamuntu. Abo bantu ahanini bafashwa n'imiryango y'ubugiraneza, mu gihe abandi bacumbikiwe na bagenzi babo, cyane cyane bene wabo.

Nubwo yagaragaje uburemere bw'ibyo bibazo, Myr Avenya yashimangiye ko igikenewe ari amahoro.

Yagize ati “Icyo dukeneye ni amahoro, kandi kuyasaba si ibintu birenze urugero. Gushinjanya bimaze igihe kirekire cyane. Igihe cyo kugira icyo dukora kirageze.”