Diyosezi Gatolika ya Nyundo yungutse abapadiri batandatu bashya mu mwaka wa 2026

Uyu muhango wabereye mu Gitambo cya Misa cyayobowe na Nyiricyubahiro Musenyeri Anaclet Mwumvaneza, Umwepiskopi wa Diyosezi ya Nyundo, afatanyije na Musenyeri Jean Marie Vianney Twagirayezu, Umwepiskopi wa Diyosezi ya Kibungo, uvuka muri Paruwasi ya Crête Congo-Nil muri Diyosezi ya Nyundo.

Abahawe Ubupadiri ni Padiri Ndahimana Albert wo muri Paruwasi ya Crête Congo-Nil, Padiri Niyonsenga Théoneste wo muri Paruwasi ya Gakeri, Padiri Nsangiranabose Théophile wo muri Paruwasi ya Muhororo, Padiri Ntawukuriryayo Adrien wo muri Paruwasi ya Murunda, Padiri Tuyambaze Herman wo muri Paruwasi ya Kibingo na Padiri Uwimana André wo muri Paruwasi ya Crête Congo-Nil.

Uretse itangwa ry'ubupadiri, Diyosezi ya Nyundo yanatanze Ubudiyakoni ku Bafaratiri batanu, ari bo Bapfakurera Jean Damascène wa Paruwasi ya Rambo, Hakizarurema Célestin wa Paruwasi ya Muramba, Munyaneza Jean Berchmans wa Paruwasi ya Mubuga, Nzayituriki Alexis wa Paruwasi ya Mbugangari na Shema Thierry wa Paruwasi ya Gisenyi.

Abafaratiri batatu bahawe Ubutumwa bw'Ubuhereza ni Bigenimana Samuel wa Paruwasi ya Nyundo, Bikorimana Anastase wa Paruwasi ya Biruyi na Iradukunda Epaphrodite wa Paruwasi ya Crête Congo-Nil, mu gihe Ubutumwa bw'Ubusomyi bwahawe Kwizera Jean Baptiste wa Paruwasi ya Kavumu, Musabyimana Jean Marie Vianney wa Paruwasi ya Murunda na Twagirayezu Olivier wa Paruwasi ya Kora.

Mu ijambo ryavuzwe mu izina ry'abapadiri bashya, Padiri Ndahimana Albert yashimiye Musenyeri Anaclet Mwumvaneza, abapadiri bababereye abarezi n'abafashije mu rugendo rw'iyogezabutumwa, ndetse n'ababyeyi n'imiryango yabo yababaye hafi kuva batangira urugendo rw'umuhamagaro.

Yagize ati"Turashimira byimazeyo Nyiricyubahiro Musenyeri Anaclet Mwumvaneza watwakiriye nk'abana be kandi akaduherekeza kuva twinjira mu Iseminari Nkuru kugeza uyu munsi aduhaye ubupadiri. Turashimira kandi abasaseridoti, ababyeyi bacu, abavandimwe n'abakristu bose badushyigikiye. Tubasabye gukomeza kudushyigikira mu isengesho kugira ngo dusohoze neza ubutumwa twahawe."

Ibi birori byitabiriwe n'abayobozi batandukanye barimo Umuyobozi w'Akarere ka Rubavu, Mulindwa Prosper, Umuyobozi w'Akarere ka Ngororero, Umuyobozi wungirije w'Akarere ka Rutsiro ushinzwe Iterambere ry'Ubukungu, ndetse n'Umunyamabanga Nshingwabikorwa w'Umurenge wa Nyundo.

Mu butumwa bwe, Umuyobozi w'Akarere ka Rubavu, Mulindwa Prosper, yashimye abamaze guhabwa ubupadiri n'izindi nshingano muri Kiliziya, agaragaza ko umuhamagaro bahisemo ugirira akamaro Kiliziya n'igihugu muri rusange.

Yagize ati "Ndagira ngo abamaze guhabwa ubupadiri, ubudiyakoni ndetse n'imirimo y'ubusomyi n'ubuhereza tubashimire kuko bose bateye intambwe bageze ku nzozi zabo. Ibi si iby'umuntu wese kuko hari abatangiye urugendo ariko ntibabasha kurusoza. Turabizeza ubufatanye kandi turashimira Diyosezi Gatolika ya Nyundo uburyo yakomeje kubashyigikira muri uru rugendo."

Yakomeje agira ati "Uyu muhamagaro wanyu twese tuwufiteho inyungu. Ntabwo ari Kiliziya yonyine iwungukiramo, ahubwo ni abaturage bose kuko mwahisemo gukorera abandi. Gukorera Imana no gukorera igihugu ni ikintu kimwe. Gukorera Imana bitangirira ku gukorera abantu, kandi iyo ukoreye abantu uba ukoreye igihugu. Nta buryo wakorera Imana utabanje kuyibonera mu bantu bafite ibibazo bakeneye ubufasha n'inama."

Ku ruhande rwa Musenyeri Anaclet Mwumvaneza, Umwepiskopi wa Nyundo, yashimiye by'umwihariko ababyeyi n'imiryango y'aba bahawe inshingano nshya, avuga ko umuryango ari wo shingiro ry'imihamagaro yose.

Yagize ati "Iyo tuvuga umuryango n'imihamagaro byose bihera mu muryango. Ababyeyi bafite uruhare rukomeye mu kurera abana mu ndangagaciro za gikristu. Ndabashimira ku bw'uruhare rwanyu kuko ibyo twishimira uyu munsi tubikesha uburere mwabahaye."

Nyuma yo guhabwa Ubupadiri, aba bapadiri batandatu bahise boherezwa n'Umwepiskopi wa Nyundo gukora ubutumwa bwabo bwa mbere mu maparuwasi atandukanye agize Diyosezi ya Nyundo.