Diyosezi ya Cyangugu irahamagarira abakristu gufata icyumweru cy’umuryango cyahujwe no guhimbaza Mutagatifu Valentin nk’umwanya wo kongera kwisuzuma mu muryango

Mu gihe Kiliziya Gatolika mu Rwanda iri guhimbaza icyumweru cyahariwe umuryango, Diyosezi ya Cyangugu, ibinyujije muri Komisiyo yayo ishinzwe ikenurabushyo ry’umuryango, ikomeje gahunda n’ibikorwa bitandukanye bizaranga iki cyumweru cyahujwe n’umunsi mukuru wa Mutagatifu Valentin

Ibi bikorwa byatangiye ku wa 06 Gashyantare bikazarangira ku wa 15 Gashyantare 2026, aho bizasozwa n’ibirori byo guhimbaza umunsi mukuru wa Mutagatifu Valentin mu maparuwasi yose agize Diyosezi ya Cyangugu.

Mu kiganiro yagiranye na Kinyamateka, Padiri Thaddée Nsengumuremyi, Ushinzwe Komisiyo y’ikenurabushyo ry’umuryango muri iyo Diyosezi, yasobanuye ko icyumweru cy’umuryango kigamije kongera gusubiza umuryango agaciro kawo no gufasha abakristu guhangana n’ibibazo biwugarije muri ibi bihe.

Yagize ati“Muri iki cyumweru cy’umuryango tuzahimbaza umunsi mukuru wa Mutagatifu Valentin n’abakristu bose. Ku wa 15 Gashyantare, mu maparuwasi yose hazatangwa umugisha wihariye mu gitambo cya Misa ku byiciro byose bigize umuryango, barimo ababyeyi batwite, abana, urubyiruko, abageze mu za bukuru, igimbi n’abangavu.”

Padiri Nsengumuremyi yasobanuye ko mbere y’umwaka wa 2023, umuryango wahimbazwaga ku munsi umwe gusa, ari wo w’Urugo Rutagatifu rw’i Nazareti mu gihe cya Noheli. Icyakora, kubera ibibazo byihariye biri kwibasira imiryango muri iki gihe, Inama y’Abepiskopi Gatolika mu Rwanda yafashe icyemezo cyo kujya ihimbaza icyumweru cy’umuryango cyose, mu minsi irindwi yegereye tariki ya 14 Gashyantare, umunsi wa Mutagatifu Valentin.

Yakomeje agira ati“Icyo tugamije ni uguha umuryango umwanya uhagije wo kuzirikana ku bwiza n’akamaro kawo, ariko no gusuzuma ibibazo biwugarije, abakristu bagafata ingamba zo kuwurinda no kuwukomeza. Ni n’umwanya wo gusubiza isura ya gikristu umunsi mukuru wa Mutagatifu Valentin, umurinzi w’abakundana bashyingiwe cyangwa bifuza gushyingirwa.”

Muri iki cyumweru, mu maparuwasi yose ya Diyosezi ya Cyangugu hari gukorwa noveni y’umuryango kuva ku wa 06 kugeza ku wa 14 Gashyantare 2026, ikaba iri kwibanda ku nsanganyamatsiko igira iti «Urugo nirusigasire umubano n’ubumwe by’abarugize, rugire uruhare mu kubaka ubumwe bwa Kiliziya.» Iyi noveni iri gukorwa cyane cyane mu miryangoremezo no mu mashuri aho bishoboka, hakoreshejwe impapuro zateguwe na Diyosezi.

Ibikorwa byihariye byo guhimbaza icyumweru cy’umuryango byatangiye tariki ya 09 bikazageza tariki 15 Gashyantare 2026, birimo amahuriro y’ibitekerezo ku muryango, inyigisho mu mashuri no mu bindi byiciro by’abakristu, n’ibikorwa by’urukundo bigamije gufasha abagize umuryango bababaye kurusha abandi, nk’abakecuru, abasaza, abafite ubumuga, abarwayi, abagororwa, abana bo mu muhanda n’abandi.

Ku Cyumweru tariki ya 15 Gashyantare 2026, hazaba ibirori byo gusoza icyumweru cy’umuryango no guhimbaza umunsi mukuru wa Mutagatifu Valentin. Misa y’uyu munsi izarangwa n’imitambagiro ihagarariye ibyiciro bitandukanye by’umuryango, uruhare rwihariye rw’ingo muri liturujiya, kwibuka yubile z’ugushyingirwa, no guhana impano hagati y’abashakanye n’abana babo.

Padiri Thaddée Nsengumuremyi yasabye abakristu ba Diyosezi ya Cyangugu kwitabira aya mahirwe yo kongera gusubiza umuryango agaciro, no kugira uruhare rufatika mu kubaka umuryango ukomeye, uhamye kandi ushingiye ku ndangagaciro za gikristu.