Diyosezi ya Cyangugu yatangije umwaka w’iyogezabutumwa wa 2025–2026 wibanda ku buvandimwe, ubumwe, ubwiyunge n’amahoro

Umuhango wo gutangiza uyu mwaka w’iyogezabutumwa wabereye kuri Centre Ibanga ry’Amahoro iherereye muri Diyosezi ya Cyangugu, uyoborwa na Nyiricyubahiro Mgr Edouard Sinayobye, Umwepiskopi wa Diyosezi ya Cyangugu. Watangijwe n’igitambo cya Misa cyitabiriwe n’abakirisitu benshi baturutse mu maparuwasi yose y’iyi diyosezi.

Mu butumwa yagejeje ku bitabiriye uyu muhango, Mgr Edouard Sinayobye yibukije ko abakirisitu bose bahamagarirwa kubaho nk’umuryango umwe wunze ubumwe muri Kristu, barangwa n’urukundo n’amahoro.

Mgr Sinayobye yasabye abakristu kurangwa n’ubumwe n’urukundo bya kivandimwe, buri wese yumva yubashywe kandi akunzwe, bidashingiye ku by’inyuma bihindagurika.

Yagaragaje ko aka karere Diyosezi Gatolika ya Cyangugu iherereyemo, gahana imbibe na Repubulika Iharanira Demokarasi ya Kongo n’u Burundi, gakeneye ku buryo bw’umwihariko kwimakaza umuco w’amahoro no kurera abana n’urubyiruko mu ndangagaciro z’ubuvandimwe n’amahoro

Yagize ati:

“Turifuza kubaho mu bumwe n’urukundo bya kivandimwe, buri wese yumva azwi, yubashywe kandi akunzwe bidashingiye ku by’inyuma bihindagurika. Uyu mwaka uzaba uwo kubaka umuco w’amahoro, mu miryango, mu mashuri no mu matsinda yose y’abakirisitu. Aka karere gahana imbibe na Repubulika Iharanira Demokarasi ya Congo n’u Burundi, gakeneye ku buryo bw’umwihariko uwo muco w’amahoro.”

Yasabye abakirisitu bose kuzagira uruhare mu bikorwa bizakorwa muri uyu mwaka, by’umwihariko mu gutoza abana n’urubyiruko guhoha indangagaciro z’ubuvandimwe, ubumwe n’amahoro.

Mgr Edouard Sinayobye, yatangaje kandi ko uyu mwaka uzarangwamo ibikorwa binyuranye biteganyijwe, birimo:

•Urugendo rw’ubumwe n’ubwiyunge muri buri paruwasi binyuze mu nyigisho z’ubukangurambaga, gusura abagororwa, gufasha abahuye n’ingaruka za Jenoside yakorewe Abatutsi, no gufasha abakirangije ibihano kongera kwinjira mu muryango.

•Isanamitima no gukira ibikomere, aho paruwasi zizegera abakristu baremerewe n’ibyabababaje mu mibereho, zikabafasha kubisohokamo.

•Kwibuka Jenoside yakorewe Abatutsi ku nshuro ya 32 mu buryo bwa gikristu, hategurwa umwiherero wihariye uzabera kuri Centre Ibanga ry’Amahoro.

•Gutoza abana n’urubyiruko indangagaciro z’ubuvandimwe, ubumwe n’amahoro binyuze mu matsinda y’amashuri, amahugurwa, ndetse no mu bikorwa by’urukundo bizabahuza.

•Amarushanwa n’imyidagaduro murikamuco nka “Igikombe cy’amahoro” mu mupira w’amaguru, amarushanwa mu mashuri no mu matsinda y’abakristu, byose bigamije gucengeza indangagaciro z’ubumwe n’amahoro.

•Ibikorwa mpuzamipaka bizahuza abakristu bo muri diyosezi ya Cyangugu n’abaturanyi bo muri Arkidiyosezi ya Bukavu muri Repubulika Iharanira Demokarasi ya Kongo ndetse n’u Burundi, hakabaho ibitaramo by’umuco n’imikino byubaka amahoro.

•Ihuriro mpuzamatorero, rizahuza amadini akorera mu turere twa Rusizi na Nyamasheke mu rwego rwo gusabira amahoro no kugaragaza ubuvandimwe muri Kristu budakumirwa n’amadini.

Ku ruhande rw’abakirstu ba Diyosezi ya cyangugu bashimangira ko uyu ari umwaka uzabafasha kurwanya ikibi hagati yabo no gusenga. Bakomeza bavuga ko n’ubwo ibyo bikorwa bisanzwe mu maparuwa atandukanye ariko ari ingenzi cyane kubyitaho kuko haba hari abinangiye bakewneye kwegerwa mu buryo bw’isengesho kugira ngo bafashwe kwiyunga n’abo bafitanye amakimbirane.

Umuryango w’impuhwe mu maparuwasi wagiye unyurwamo n’abahanye imbabazi bakiyunga n’abo bahemukiye muri Jenoside yakorewe abatutsi. Mukansanzabaganwa Alvera ku ruhande rwe ngo arasanga n’imiryango ibanye mu makimbirane izaba ibonye umwanya wo kwiyunga no guhosha amakimbirane. Binyuze muri Groupe ‘Ngufitiye Inyota’ ngo barateganya kongera imbaraga mu kunga imiryango. Abasaveri nabo ngo bazafatanya na kiriziya gusakaza urukundo mu rubyiruko

Uyu mwaka mushya w'iyogezabutumwa wa 2025-2026 ufite insanganyamatsiko igira iti “Ubuvandimwe muri Kiristu, isoko y’ubumwe, ubwiyunge n’amahoro.” Uje ukurikira uwa 2024-2025 urangiye wari warahariwe Ubusaseridoti na Ukaristiya​.Mgr Sinayobye akaba asaba abakirisitu bose gufatanya muri ibi bikorwa, asaba ko buri Cyumweru Misa irangiye hazajya havugwa Isengesho ry’Amahoro rya Mutagatifu Fransisiko w’Asizi kugira ngo ribe intangiriro n’ishingiro ry’uyu mwaka wose w’iyogezabutumwa.“Tuzabigeraho twunze ubumwe kandi dufatanyije, dushingiye ku buvandimwe muri Kristu butubyarira ubumwe, ubwiyunge n’amahoro,”